ଭୁବନେଶ୍ୱର,୦୧/୧୦: ବହୁଚର୍ଚ୍ଚିତ ଭରତପୁର ଥାନାରେ ହଙ୍ଗାମା ମାମଲାରେ ଆରମ୍ଭ ହେଲା ବିଚାର ବିଭାଗୀୟ ତଦନ୍ତ। ବସିଲା କମିସନଙ୍କ ପ୍ରଥମ ବୈଠକ। ଆହ୍ୱାନ କରାଯିବ ସତ୍ୟପାଠ। ମଙ୍ଗଳବାର ପ୍ରକାଶ ପାଇବ ବିଜ୍ଞପ୍ତି। ୨୧ ଦିନ ଯାଏଁ ସତ୍ୟପାଠ ଆହ୍ୱାନ କରାଯାଇଛି ।
କେମିତି ହେବ ତଦନ୍ତ ପ୍ରକ୍ରିୟା?
ମଙ୍ଗଳବାର ପ୍ରଥମେ ଗଣମାଧ୍ୟମରେ ବିଜ୍ଞପ୍ତି ପ୍ରକାଶ କରାଯିବ । ବିଜ୍ଞପ୍ତି ପ୍ରକାଶ ପରଠୁ ୨୧ ଦିନ ଯାଏଁ ସତ୍ୟପାଠ ଆହ୍ୱାନ କରାଯିବ । ଏହାବାଦ୍ ଯିଏ ଘଟଣା ସମ୍ପର୍କରେ ଜାଣିଛନ୍ତି, ସେମାନେ ଲିଖିତ ଭାବେ ସତ୍ୟପାଠ ପାଇଁ ଆବେଦନ କରିବେ । ସେନାଧିକାରୀ, ତାଙ୍କ ବାନ୍ଧବୀଙ୍କ ସହ ୫ ନିଲମ୍ବିତ ପୁଲିସ ଅଧିକାରୀ ଓ ୭ଜଣ ଅଭିଯୁକ୍ତଙ୍କ ବାଦ୍ ଅନ୍ୟମାନେ ବି ଆବେଦନ କରିପାରିବେ । ଆବେଦନକାରୀଜଣକ କେମିତି ଘଟଣା ସହ ଜଡି଼ତ? ସେନେଇ ଉଲ୍ଲେଖ କରିବେ । ଶ୍ରୀ ଦାଶଙ୍କ ଅଧ୍ୟକ୍ଷତାରେ ଏସବୁ ଆବେଦନପତ୍ରକୁ ତର୍ଜମା କରାଯାଇ ଏକ ତାଲିକା ପ୍ରସ୍ତୁତ କରାଯିବ । ଯେଉଁ ଆବେଦନକାରୀମାନେ ତଦନ୍ତ ପ୍ରକ୍ରିୟାରେ ସାମିଲ୍ ନାହାନ୍ତି, ସେମାନଙ୍କୁ ବାଦ୍ ଦିଆଯିବ । ପକ୍ଷଭୁକ୍ତ ଆବେଦନକାରୀଙ୍କୁ କମିସନଙ୍କ ପକ୍ଷରୁ ସେମାନଙ୍କ ନିକଟକୁ ସମନ ପଠାଯିବ । ସେମାନଙ୍କୁ ୧୪ ଦିନ ଭିତରେ ହାଜର ହୋଇ ପକ୍ଷ ରଖିବାକୁ କୁହାଯିବ । ସମସ୍ତଙ୍କ ବୟାନ ରେକର୍ଡ କରାଯିବ । ୨ ମାସ ଭିତରେ କମିସନଙ୍କ ପକ୍ଷରୁ ପ୍ରସ୍ତୁତ ରିପୋର୍ଟ ରାଜ୍ୟ ସରକାରଙ୍କୁ ହସ୍ତଗତ କରାଯିବ ।
୧୩ ଜଣିଆ ସ୍ୱତନ୍ତ୍ର ଦଳ ସହଯୋଗ କରିବେ
କମିସନ ଅଧ୍ୟକ୍ଷ ଶ୍ରୀ ଦାଶଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଦଳ ୨ ମାସ ଧରି ଘଟଣାର ତଦନ୍ତ କରିବ । ଶ୍ରୀ ଦାଶଙ୍କ ବ୍ୟକ୍ତିଗତ ସଚିବ ଭାବେ ଅବସରପ୍ରାପ୍ତ ଜିଲ୍ଲା ଜଜ୍ ଶୁଭେନ୍ଦୁ ମହାନ୍ତିଙ୍କୁ ନିଯୁକ୍ତି ଦିଆଯାଇଛି । ତଦନ୍ତରେ ସହଯୋଗ ପାଇଁ ଅଧ୍ୟକ୍ଷଙ୍କ ଅଧୀନରେ ଜଣେ ଅତିରିକ୍ତ ସଚିବ, ୨ଜଣ ସୁପରିଣ୍ଟେଣ୍ଡେଣ୍ଟ, ଜଣେ ଷ୍ଟେନୋ ରହିବେ । ୨ଜଣ ଆଇନ୍ ଛାତ୍ର ରହିବେ । ୨ଜଣ ସରକାରୀ ଆଇନ୍ଜୀବୀ ରହିବେ । କମିସନଙ୍କ ପକ୍ଷରୁ ୨ଜଣ ଆଇନ୍ଜୀବୀଙ୍କୁ ନିଯୁକ୍ତି ଦିଆଯିବ । ଏହାସହ ଆସେସର ପ୍ରଦୀପ କୁମାର ମହାପାତ୍ର ଏବଂ ଦୟାନନ୍ଦ ମହାପାତ୍ର ମଧ୍ୟ ତଦନ୍ତରେ ସହଯୋଗ କରିବେ।
