ନୂଆଦିଲ୍ଲୀ, ୨୦/୧୨: ପାକିସ୍ତାନୀ ମ୍ୟାଜିକ୍ ୱିନ୍ ଗାମ୍ବଲିଂ ଆପ୍ ସହଜଡ଼ିତ ମନିଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଫିଲ୍ମ ଅଭିନେତ୍ରୀ ମଲ୍ଲିକା ଶେରାୱତ୍ ଏବଂ ଟିଭି ଅଭିନେତ୍ରୀ ପୂଜା ବାନାର୍ଜୀଙ୍କୁ ଜେରା କରିଛି । ତେବେ ପଚରାଉଚରାରେ ଇଡିକୁ କିଛି ମିଳି ନ ଥିବା ଜଣାପଡ଼ିଛି ।
ରିପୋର୍ଟ ଅନୁସାରେ, ଏହା ଏକ ପାକିସ୍ତାନୀ ଆପ୍ । ଦୁବାଇରେ କେତେକ ଭାରତୀୟ ନାଗରିକ ଏହାର ଅପରେସନ କରୁଥିଲେ । ମଲ୍ଲିକା ଶେରାୱତ ଏବଂ ପୂଜା ବାନାର୍ଜୀ ଏହି ଆପ୍ର ପ୍ରମୋସନ କରିଥିବା ଅଭିଯୋଗ ରହିଛି । ଇଡି ନୋଟିସ୍ର ଜବାବରେ ମଲ୍ଲିକା ଶେରାୱତ ଇମେଲ୍ ଜରିଆରେ ଇଡିକୁ ଜବାବ ପଠାଇଥିଲେ । ପୂଜା ବାନାର୍ଜୀଙ୍କୁ ଇଡି ଅହମଦାବାଦ କାର୍ଯ୍ୟାଳୟକୁ ଡାକି ଜେରା କରିଥିଲା । ଆଗକୁ ଆଉ କେତେକ କଳାକାରଙ୍କୁ ଏ ବାବଦରେ ଇଡି ପଚରାଉଚରା କରିପାରେ । ମାମଲାରେ ଇଡି ଗତ ୬ ମାସରେ ଦେଶବ୍ୟାପୀ ପ୍ରାୟ ୬୭ ସ୍ଥାନରେ ଚଢ଼ାଉ କରିଛି । ଏହି ଆପ୍ ଜରିଆରେ ଟି୨୦ ବିଶ୍ୱକପ୍ ମ୍ୟାଚଗୁଡ଼ିକୁ ବେଆଇନ ଭାବେ ପ୍ରସାର କରାଯାଉଥିଲା ବୋଲି ମଧ୍ୟ ଅଭିଯୋଗ ରହିଛି । ଆପ୍ ଜରିଆରେ ବେଟିଂ କରାଯାଉଥିଲା ଏବଂ ବିଭିନ୍ନ ସେଲ୍ କମ୍ପାନୀର ବାଣିଜ୍ୟିକ ବ୍ୟାଙ୍କ ଆକାଉଣ୍ଟ ମାଧ୍ୟମରେ ଖେଳାଳି ବା ବେଟରଙ୍କୁ ସେମାନେ ଜିତିଥିବା ରାଶି ଟ୍ରାନ୍ସଫର କରାଯାଉଥିଲା ।
