ନୂଆଦିଲ୍ଲୀ: ଉତ୍ତରପ୍ରଦେଶର ଆମେଥିରୁ ଏକ ଲୋମହର୍ଷକ ଘଟଣା ଏବେ ସାମ୍ନାକୁ ଆସିଛି । ଏଠାରେ ଦୁର୍ବୃତ୍ତ ମାନେ ଘରେ ପଶି ଶିକ୍ଷକଙ୍କ ସମେତ ତାଙ୍କ ସମଗ୍ର ପରିବାରକୁ ହତ୍ୟା କରିଛନ୍ତି । ଏହି ଘଟଣା ପରେ ସ୍ଥାନୀୟ ଲୋକ ମାନେ ଭୟଭୀତ ହୋଇ ପଡ଼ିଛନ୍ତି ।
ମିଳିଥିବା ସୂଚନା ଅନୁଯାୟୀ ଶିକ୍ଷକ, ତାଙ୍କ ପତ୍ନୀ ଏବଂ ଉଭୟ ପିଲାଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ଶିକ୍ଷକ ତାଙ୍କ ପରିବାର ସହିତ ଆମେଥିରେ ଏକ ଭଡା ଘରେ ରହୁଥିଲେ । ଘଟଣା ସମ୍ପର୍କରେ ସୂଚନା ପାଇବା ପରେ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚିଛନ୍ତି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଧିକାରୀ ମାନଙ୍କୁ ତୁରନ୍ତ ଘଟଣାସ୍ଥଳରେ ପହଞ୍ଚିବାକୁ ନିର୍ଦ୍ଦେଶ ଦେଇଛନ୍ତି ଏବଂ ଦୋଷୀ ମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି ।
ଏହି ଦୁଃଖଦ ଘଟଣା ଆମେଥିର ଶିବରତନଗଞ୍ଜ ପୋଲିସ ଷ୍ଟେସନ ଅଞ୍ଚଳର ଭବାନୀ ନଗର ଛକରେ ଘଟିଥିବା କୁହାଯାଉଛି । ସୂଚନାନୁସାରେ, ଶିକ୍ଷକ ସିଂହପୁର ବ୍ଲକର ପାନହୌନା ପ୍ରାଥମିକ ବିଦ୍ୟାଳୟରେ ନିଯୁକ୍ତ ଥିଲେ । ମୃତ ଶିକ୍ଷକ ସୁନୀଲ କୁମାରଙ୍କୁ ପନହୌନାର କମ୍ପୋଜିଟ୍ ସ୍କୁଲରେ ସହକାରୀ ଶିକ୍ଷକ ଭାବେ ନିଯୁକ୍ତି ଦିଆଯାଇଥିଲା । ସେ ତାଙ୍କ ପତ୍ନୀ, ୬ ବର୍ଷର ଝିଅ ଏବଂ ୨ ବର୍ଷର ପୁଅ ସହିତ ଏକ ଭଡାଘରେ ଏଠାରେ ରହୁଥିଲେ । ଏଠାରେ ପୂରା ପରିବାରକୁ ଗୁଳିକରି ହତ୍ୟା କରାଯାଇଛି । ତେବେ ହତ୍ୟାକାଣ୍ଡର ତଦନ୍ତ ଜାରି ରଖିଛି ପୋଲିସ ।