ଭୁବନେଶ୍ୱର, ୦୪/୦୬: ‘ମାଳତିପାଟପୁରଠାରୁ ପୁରୀ ଯାଏଁ ଗାଡିର ଲାଇନ୍ ଲମ୍ବିଛି । ଏବେ ପୁରୀକୁ ଆସନ୍ତୁ ନାହିଁ । ଅପେକ୍ଷା କରନ୍ତୁ । ଟ୍ରାଫିକ୍ ଭିଡ଼ କମିଲେ, ପୁଣି ଅବଗତ କରାଯିବ ।’ ଚଳିତ ରଥଯାତ୍ରାରେ ବାହୁଡ଼ା ଓ ସୁନାବେଶ ବେଳେ ଭକ୍ତମାନଙ୍କ ମୋବାଇଲ୍କୁ ଏମିତି କିଛି ବଲ୍କ ମେସେଜ୍ ପଠାଯିବ । ଶ୍ରୀକ୍ଷେତ୍ର ମୁହାଁ ଭକ୍ତମାନେ ଟ୍ରାଫିକ୍ ଭିଡ଼ ବାବଦରେ ଅବଗତ ହୋଇପାରିବେ । ସେହି ଅନୁସାରେ ସେମାନେ ପୁରୀ ଅଭିମୁଖେ ଅଗ୍ରସର ହେବେ । ହଜାରେ କି ୧୦ ହଜାର ନୁହେଁ, ଏକାବେଳକେ ଲକ୍ଷଲକ୍ଷ ଭକ୍ତ ମୋବାଇଲ୍କୁ ବଲ୍କ ମେସେଜ ପଠାଯିବାକୁ ଯୋଜନା ରଖାଯାଇଛି ।
ଚଳିତ ରଥଯାତ୍ରାରେ ଦଳଚକଟା ଟ୍ରାଜେଡି ପାଇଁ ରାଜ୍ୟ ପୁଲିସ ଢ଼େର୍ ବଦନାମ ମୁଣ୍ଡାଇଥିଲା । ବାହୁଡ଼ା ଓ ସୁନାବେଶରେ ଟ୍ରାଫିକ୍ ସୁପରିଚାଳନା ପାଇଁ ପୁଲିସ ସବୁ ଜୋର୍ ଲଗାଇଛି । ବଲ୍କ ମେସେଜ୍ ଭଳି ଅଭିନବ ଉପାୟରେ ଟ୍ରାଫିକ୍ ଭିଡ଼ ପରିଚାଳନା ପାଇଁ ଯୋଜନା କରିଛି । ପୁଲିସ ପକ୍ଷରୁ ପୁରୀ ସମେତ ଖୋର୍ଦ୍ଧା, କଟକ, ନୟାଗଡ଼, ଗଞ୍ଜାମ, ଜଗତସିଂହପୁର, ଯାଜପୁର ଓ ଢ଼େଙ୍କାନାଳ ଭଳି ୮ଟି ନିକଟତମ ଜିଲ୍ଲାକୁ ବଛାଯାଇଛି । ଏସବୁ ଜିଲ୍ଲାବାସୀଙ୍କୁ ନିରନ୍ତର ବଲ୍କ ମେସେଜ ପଠାଯିବ ।
ଏଡିଜି(ଯୋଗାଯୋଗ) ଦୟାଲ ଗଙ୍ଗୱାରଙ୍କ କହିବା ମୁତାବକ, ଗତବର୍ଷ ଶ୍ରୀଗୁଣ୍ଡିଚା ବେଳେ ପ୍ରାୟ ୫-୬ ହଜାର କାର ପୁରୀକୁ ଆସିଥିଲା । ସୁନାବେଶରେ କାର ସଂଖ୍ୟା ୧୫ ହଜାର ଟପିଥିଲା । କିନ୍ତୁ ଚଳିତ ଗୁଣ୍ଡିଚା ଯାତ୍ରା ଦେଖିବାକୁ ୨୫ ହଜାର କାରରେ ଭକ୍ତମାନେ ପୁରୀ ଆସିଛନ୍ତି । ଯାହାକି, ଗତବର୍ଷଠୁ ୩ ଗୁଣା ଅଧିକ । ଚଳିତ ସୁନାବେଶରେ ୫୦ ହଜାରରୁ ଅଧିକ କାର ଆସିବା ସମ୍ଭାବନା ଅଛି । ଭକ୍ତଙ୍କ ସଂଖ୍ୟା ବି ବଢ଼ିପାରେ । ଏହାକୁ ଦୃଷ୍ଟିରେ ରଖି ବଲ୍କ ମେସେଜ୍ ବ୍ୟବସ୍ଥା କରାଯାଇଛି । ରାଜ୍ୟ ସ୍ୱତନ୍ତ୍ର ରିଲିଫ୍ କମିଶନର(ଏସ୍ଆର୍ସି) ଙ୍କ ସହ ଏନେଇ ଆଲୋଚନା ସରିଛି ।
ଶୁକ୍ରବାର ସନ୍ଧ୍ୟା ଦର୍ଶନ ପାଇଁ ପରୀକ୍ଷାମୂଳକ ଭାବେ ଉପରୋକ୍ତ ଜିଲ୍ଲାବାସୀଙ୍କୁ ବଲ୍କ ମେସେଜ୍ ପଠାଯିବ । ପ୍ରତି ଘଣ୍ଟାଏ କିମ୍ବା ୨ ଘଣ୍ଟା ବ୍ୟବଧାନରେ ମୋବାଇଲକୁ ମେସେଜ୍ ଆସିବ । ୧୬୦ରୁ ୨୦୦ ଶଦ୍ଦ ଭିତରେ ଟ୍ରାଫିକ୍ ଭିଡ଼ ସମ୍ପର୍କିତ ତଥ୍ୟ ଉଲ୍ଲେଖ ରହିବ । ବାହୁଡ଼ା ଓ ସୁନାବେଶ ବେଳେ ପୁରୀ ଓ ଆଖପାଖ ରାସ୍ତାରେ ଭକ୍ତଙ୍କ ଭିଡ଼ ଅସମ୍ଭାଳ ହେଲେ, ଭୁବନେଶ୍ୱରଠାରୁ ଗାଡି଼କୁ ଅଟକାଯିବାକୁ ଯୋଜନା କରାଯାଇଛି । ଏନେଇ କମିଶନରେଟ୍ ପୁଲିସ ସହ ଆଲୋଚନା କରାଯାଇଛି । ପୁରୀ ବାଇପାସ୍ ଆରମ୍ଭରୁ ଲିଙ୍ଗିପୁର ଟ୍ରାଫିକ୍ ଓ ସାମନ୍ତରାପୁରଠାରେ ପୁଲିସ ମୁତୟନ କରାଯିବ । କଟକ, ଖୋର୍ଦ୍ଧା ପଟୁ ଆସୁଥିବା ଭକ୍ତମାନଙ୍କୁ ପୁରୀ ଅଭିମୁଖେ ଗାଡି଼ ନ ନେବା ପାଇଁ ସତର୍କ କରାଯିବ ।
ଚଳିତ ରଥାଯାତ୍ରାରେ ପ୍ରଥମଥର ଆରମ୍ଭ ହୋଇଥିବା ହ୍ୱାଟସ୍ଆପ୍ ଚାର୍ଟ ବଟ୍ ବ୍ୟବସ୍ଥାକୁ ଆହୁରି ବ୍ୟାପକ କରାଯିବ । ଶ୍ରୀଗୁଣ୍ଡିଚା ପରଠୁ ପ୍ରାୟ ୨ଲକ୍ଷ ଲୋକ ଚାର୍ଟ ବଟ୍ରୁ ତଥ୍ୟ ପାଇଲେଣି । ପୁରୀ ବଡଦାଣ୍ଡରେ ଭିଡ଼ ପରିଚାଳନା ପାଇଁ ୧୨ଟି ଡ୍ରୋନ୍ ବ୍ୟବସ୍ଥା ହୋଇଛି । ଗତଥର ଭଳି ଚଳିତଥର ଭିଡ଼ ଓ ଦଳାଚକଟା ରୋକିବାରେ ଡ୍ରୋନ୍ ସହାୟକ ହେବ । ରଥଯାତ୍ରା ପାଇଁ ଉତ୍ତରା ଠାରୁ ମାଳତିପାଟପୁର ଓ ପୁରୀ ସହରରେ ମୋଟ ୨୭୫ଟି କୃତିମ ବୁଦ୍ଧିମତା (ଏଆଇ) କ୍ୟାମେରା ଖଞ୍ଜାଯାଇଛି । ଏସବୁ କ୍ୟାମେରାର ରିଅଲ ଟାଇମ୍ ଡାଟା ଅନୁସାରେ ବାହୁଡ଼ା, ସୁନାବେଶ ବେଳେ ଟ୍ରାଫିକ୍ ଓ ଭିଡ଼ ପରିଚାଳନା କରାଯିବ ।
