କଟକ,୧୯/୦୪: ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ଓ କଟକ ଉନ୍ନୟନ କର୍ତ୍ତୃପକ୍ଷ (ସିଡିଏ)ଙ୍କ ଅଧୀନରେ ଥିବା ସମସ୍ତ ଜମି ଲିଜ୍ ହୋଲ୍ଡ୍ ପରିବର୍ତ୍ତେ ଫ୍ରି-ହୋଲ୍ଡ୍ ହେବ । ଏନେଇ ରାଜ୍ୟ ସରକାର ପ୍ରାୟ ଦୁଇ ବର୍ଷ ତଳେ ବିଜ୍ଞପ୍ତି ଜାରି କରିଥିଲେ । ଇତିମଧ୍ୟରେ ବିଡିଏର ସମସ୍ତ ଜମି ଫ୍ରି-ହୋଲ୍ଡ୍ ହୋଇସାରିଲାଣି । ହେଲେ ସିଡିଏ ଜମିର ଭାଗ୍ୟ ବଦଳୁ ନାହିଁ । କଟକ ସଦର, ଆଠଗଡ଼ ଓ ବାରଙ୍ଗ ତହସିଲ୍ ଅଧୀନରେ ଥିବା ସିଡିଏର ପ୍ରାୟ ୮୫୩ ଏକର ଜମି ଲିଜ୍ ହୋଲ୍ଡ୍ରୁ ଫ୍ରି-ହୋଲ୍ଡ୍ ହୋଇପାରୁନାହିଁ । ଫ୍ରି-ହୋଲ୍ଡ୍ ପାଇଁ ଆବଶ୍ୟକ ପଦକ୍ଷେପ ନେବାକୁ ସିଡିଏ ପକ୍ଷରୁ ତିନି ତହସିଲ୍କୁ ବାରମ୍ବାର ଚିଠି ଲେଖାଯାଉଥିଲେ ମଧ୍ୟ କୌଣସି ସୁଫଳ ମିଳୁନାହିଁ । ସରକାରଙ୍କ ନିର୍ଦ୍ଦେଶ ଖୋଦ୍ ସରକାରୀ ବିଭାଗ ନମାନିବା ଭଳି ବିଚିତ୍ର ସ୍ଥିତି କାରଣରୁ ହଜାର ହଜାର ସିଡିଏ ବାସିନ୍ଦା ଏବେ ନାହିଁ ନଥିବା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି ।
୨୦୨୩ ଅଗଷ୍ଟ ୧୪ ତାରିଖରେ ରାଜ୍ୟ ସରକାର ବିଡିଏ ଓ ସିଡିଏର ସମସ୍ତ ଲିଜ୍ ହୋଲ୍ଡ୍ ଜମିକୁ ଫ୍ରି ହୋଲଡ୍ରେ ପରିଣତ କରିବା ଲାଗି ବିଜ୍ଞପ୍ତି ପ୍ରକାଶ କରିଥିଲେ । ରାଜ୍ୟ ସରକାରଙ୍କ ଏହି ନିଷ୍ପତ୍ତି ପରେ ସିଡିଏ ପକ୍ଷରୁ ସେହିବର୍ଷ ନଭେମ୍ବର ୧୬ ତାରିଖରେ ତିନି ତହସିଲ୍କୁ ଚିଠି କରାଯାଇ ସିଡିଏର ସମସ୍ତ ଲିଜ୍ ଜମିକୁ ଫ୍ରି ହୋଲ୍ଡ୍ ବା ସ୍ଥିତିବାନ୍ କରିବା ଲାଗି ଅନୁରୋଧ କରାଯାଇଥିଲା । ଏଥିପାଇଁ ଆବଶ୍ୟକ ଡକ୍ୟୁମେଣ୍ଟ୍ ମଧ୍ୟ ତିନି ତହସିଲ୍କୁ ପ୍ରଦାନ କରାଯାଇଥିଲା । ସିଡିଏର କେଉଁ ସେକ୍ଟରରେ କେତେ ଜମି ଲିଜ୍ ହୋଲଡ୍ରୁ ଫ୍ରି’ ହୋଲଡ୍ କରାଯିବ ତାହାର ଏକ ବିସ୍ତୃତ ରିପୋର୍ଟ ମଧ୍ୟ ଦିଆଯାଇଥିଲା । ରିପୋର୍ଟ ଅନୁସାରେ, କଟକ ସଦର ତହସିଲ୍ ଅଧୀନରେ ସିଡିଏ ସେକ୍ଟର-୬ ଓ ୭ରେ ୧୧୬ ଏକର ୮ଶହ ଡିସିମିଲ୍ ଲିଜ୍ ଜମି ରହିଛି । ସେହିପରି ସେକ୍ଟର-୧ରେ ୬୦ ଏକର ଲିଜ୍ ଜମି ଫ୍ରି’ ହୋଲଡ୍ ପାଇଁ ରହିଛି । ମୋଟ୍ ଉପରେ ଏହି ତହସିଲ୍ରେ ୧୭୬ ଏକର ଜମି ଫ୍ରି ହୋଲ୍ଡ୍ ହେବ ।
ସେହିପରି ଆଠଗଡ଼ ତହସିଲ୍ ଅଧୀନରେ ଥିବା ସିଡିଏ ସେକ୍ଟର-୧୩ରେ ୮୪ ଏକର ୪୯ ଡିସିମିଲ୍ ଓ ସେକ୍ଟର-୧୫ରେ ୨୭ ଏକର ଜମି ରହିଛି । ଉଭୟ ସେକ୍ଟରରେ ୧୧୧ ଏକର ଲିଜ୍ ଜମି ଫ୍ରି’ ହୋଲ୍ଡ୍ କରାଯିବ । ଅନ୍ୟପକ୍ଷରେ ବାରଙ୍ଗ ତହସିଲ୍ ଅଧୀନରେ ସିଡିଏ ସେକ୍ଟର-୬ ଓ ୭ରେ ୧୫୨ ଏକର ୫୪୦ ଡିସିମିଲ୍ ଜମି ରହିଥିଲା ବେଳେ ସେକ୍ଟର-୮ରେ ୫୦ ଏକର, ସେକ୍ଟର-୯ରେ ୧୧୬ ଏକର ୯୯୦ ଡିସିମିଲ୍, ସେକ୍ଟର-୧୦ରେ ୬୦ଏକର ୨୭୦ ଡିସିମିଲ୍, ସେକ୍ଟର-୧୧ରେ ୩୫ ଏକର ୯୧୦ ଡିସିମିଲ୍ ଜମି, ନରଣପୁରରେ ଗୋଟିଏ ପ୍ଲଟ୍ ୧୮ଏକର ୬୫୦ ଡିସିମିଲ୍ର ଓ ଆଉ ଏକ ପ୍ଲଟ୍ ୧୦୧ ଏକର ୩୭୦ଡିସିମିଲ୍ ଜମି ରହିଛି । ମୋଟ୍ ଉପରେ ବାରଙ୍ଗ ତହସିଲ୍ ଅଧୀନରେ ସିଡିଏର ସର୍ବାଧିକ ୫୬୬ ଏକର ଜମି ଫ୍ରି-ହୋଲ୍ଡ୍ କରାଯିବ ।
ଜମି ଫ୍ରି-ହୋଲ୍ଡ୍କୁ ପରିବର୍ତ୍ତନ କରିବା ପାଇଁ ରାଜ୍ୟ ସରକାର ଫି’ ମଧ୍ୟ ଧାର୍ଯ୍ୟ କରିଥିଲେ । ଅର୍ଥାତ ପ୍ରତି ଆପ୍ଲିକେସନ୍ ଫି’ ପାଇଁ ୫ହଜାର ଟଙ୍କା, ପ୍ରତି ଘୋଷଣାନାମା ପାଇଁ ୫ଶହ ଟଙ୍କା ଏବଂ ପ୍ରତି ମାପ ଫି’ ପାଇଁ ୧ହଜାର ଟଙ୍କା ଦେବା ଲାଗି ସିଡିଏକୁ କହିଥିଲେ । ସିଡିଏ ମଧ୍ୟ ଏହି ହିସାବରେ ସମସ୍ତ ଦେୟ ପ୍ରତ୍ୟେକ ତହସିଲ୍କୁ ପ୍ରଦାନ କରିସାରିଛି ବୋଲି ସିଡିଏର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ଏହା ସତ୍ତେ୍ୱ ଦୁଇବର୍ଷ ହେଲାଣି ତିନି ତହସିଲ୍ କର୍ତ୍ତୃପକ୍ଷ ଏହି ଜମିକୁ ଫ୍ରି-ହୋଲ୍ଡ୍ କରିବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରୁନାହାନ୍ତି ।
ଏ ସଂପର୍କରେ ସିଡିଏର ଜଣେ ଅଧିକାରୀ କହିଛନ୍ତି ଯେ, ସିଡିଏର ଦାୟିତ୍ୱ ହେଲା ଲିଜ୍ ହୋଲ୍ଡ୍ରେ ଥିବା ସମସ୍ତ ଜମିର ରେକର୍ଡପତ୍ର ସଂପୃକ୍ତ ତହସିଲ୍କୁ ପ୍ରଦାନ କରିବା । ସିଡିଏ ମଧ୍ୟ ଏହି କାର୍ଯ୍ୟ କରିସାରିଛି । କିନ୍ତୁ ତହସିଲ୍ଗୁଡ଼ିକ ଏ ଦିଗରେ କୌଣସି ପଦକ୍ଷେପ ଗ୍ରହଣ ନକରିବା ଫଳରେ ଫ୍ରି’ ହୋଲ୍ଡ୍ ହେବା କାର୍ଯ୍ୟ ଆଗେଇ ପାରୁନାହିଁ । ଏ ସଂକ୍ରାନ୍ତରେ କଟକ ସଦର ତହସିଲ୍ଦାର ସୁଜୟ କୁମାର ପତି କହିଛନ୍ତି ଯେ, ସିଡିଏ ପକ୍ଷରୁ ଚିଠି ଲେଖାଯିବା ପରେ ସେମାନେ ଏକ ବିଜ୍ଞପ୍ତି ଜାରି କରି ସିଡିଏ ଜମି ମାଲିକାନାସ୍ୱତ୍ତ୍ୱରେ ଥିବା ବ୍ୟକ୍ତିମାନଙ୍କଠାରୁ ଜବାବ ଲୋଡ଼ିଛନ୍ତି ।
ଯଦି ଜମିକୁ ନେଇ କାହାର କିଛି ଅଭିଯୋଗ ଥାଏ ତାହେଲେ ସେମାନେ ତାହା ଦାଖଲ କରିବେ । ଅଭିଯୋଗ ଦାଖଲ ପରେ ସେମାନଙ୍କ ପକ୍ଷ ଶୁଣାଯିବ । ତାପରେ ଫ୍ରି’ ହୋଲ୍ଡ୍କୁ ନେଇ ଯାହା ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି । ସଦର ତହସିଲ୍ରେ ଏନେଇ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଅନ୍ୟ ଦୁଇ ତହସିଲ୍ ପକ୍ଷରୁ କିନ୍ତୁ ଏ ଦିଗରେ ବିଶେଷ ପଦକ୍ଷେପ ଗ୍ରହଣ କରାଯାଇନଥିବା ଜଣାପଡ଼ିଛି।
