ଭଞ୍ଜନଗର,୨୩/୩ : ୬ଟି ମଦ ଦୋକାନରୁ ଚୋରି ଘଟଣାରେ ପୋଲିସ ୫ ଜଣଙ୍କୁ ଗିରଫ କରିଛି। ସେମାନଙ୍କ ଠାରୁ ୧,୭୫୦୦୦ ଟଙ୍କା, ଗୋଟିଏ କାର୍, ୬ ଟି ମୋବାଇଲ୍ ଓ ଗୋଟିଏ ଲୁହା ଶାବଳ ପୋଲିସ ଜବତ କରିଛି। ଗିରଫ ଅଭିଯୁକ୍ତ ମାନେ ହେଲେ ହିଞ୍ଜିଳି ଥାନା ବୁରୁପଡା ଗ୍ରାମର ବବୁଲ୍ ଦଳାଇ(୨୧), ପୁରୁଷୋତ୍ତମପୁର ଥାନା ଅଞ୍ଚଳର ଭାପକୁମରଡା ର ରଞ୍ଜନ ରାଉଳ(୨୪), ବୁଗୁଡ଼ା ଥାନା ଅନ୍ତର୍ଗତ ଅରଖପୁର ଗାଁ ର ଅର୍ଜୁନ ନାୟକ(୨୦), ଅଜୟ ନାୟକ (୧୮) ଓ ଚିତ୍ରସେନ ଜେନା (୨୪) । ଜିଲ୍ଲାର ଭଞ୍ଜନଗର, ଗଞ୍ଜାମ, ବେଗୁନିଆ ପଡ଼ା, ରମ୍ଭା ଓ ଛତ୍ରପୁର ଥାନା ଅଧୀନ ଅଞ୍ଚଳର ମଦ ଦୋକାନରୁ ଅଭିଯୁକ୍ତ ଲୁଟ କରିଥିଲେ। ଏ ନେଇ। ଭଞ୍ଜନଗର ଥାନାରେ ଆୟୋଜିତ ଏକ ସାମ୍ୱାଦିକ ସମ୍ମୀଳନୀରେ ଆଇପିଏସ୍ ମନୀଷା ସଗୁନ୍ ଏ ସମ୍ପର୍କରେ ସୂଚନା ଦେଇଛନ୍ତି ।
ଚଳିତ ମାସ ୮ ତାରିଖ ରାତିରେ ଭଞ୍ଜନଗର ଥାନା ଅନ୍ତର୍ଗତ ସହରର ବାଉଁଶ ଲୁଣ୍ଡି ରୋଡ଼ଠାରେ ଥିବା ବିଦେଶୀ ମଦ ଦୋକାନରୁ ଏମାନେ ମଧ୍ୟ ରାତ୍ରରେ ସଟର ତାଡି କାଉଣ୍ଟର ରୁ ୨,୧୮,୫୦୦/- ଟଙ୍କା ଚୋରୀ କରି ନେଇଥିବା ଅଭିଯୋଗ ହୋଇଥିଲା। ପୁଲିସ ଏହି ଘଟଣାକୁ ଅତ୍ୟନ୍ତ ଗମ୍ଭୀରତାର ସହ ନେଇ ତଦନ୍ତକୁ ବ୍ୟାପକ କରିଥିଲା। ଭଞ୍ଜନଗର ଥାନା ଅଧିକାରୀ ଜୀବନାନନ୍ଦ ଜେନା ଙ୍କ ନେତୃତ୍ୱରେ ଜିଲ୍ଲା ର ବିଭିନ୍ନ ଥାନା ଷ୍ଟାଫ୍ ଙ୍କ ନେଇ ସ୍ବତନ୍ତ୍ର ଟିମ୍ ଗଠନ ହୋଇଥିଲା। ପୁଲିସ ଅଭିଯୁକ୍ତ ମାନଙ୍କୁ ଧରିବାରେ ସଫଳ ହୋଇଥିଲା ବୋଲି ଆଇପିଏସ୍ ମନୀଷା ସଗୁନ୍ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ସମସ୍ତ ୫ ଗିରଫ ଅଭିଯୁକ୍ତ ଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।
