ବେଙ୍ଗାଲୁରୁ,୦୮/୦୨: ବେଙ୍ଗାଲୁରୁର ମଡିୱାଲା ପୁଲିସ ମହାରାଷ୍ଟ୍ରର ସୋଲାପୁରରୁ ଜଣେ କୁଖ୍ୟାତ ଚୋରକୁ ଗିରଫ କରିଛି । ତା ନାଁ ପଞ୍ଚାକ୍ଷରୀ ସ୍ୱାମୀ (୩୭ ବର୍ଷ) ଏବଂ ସେ ବିଭିନ୍ନ ରାଜ୍ୟରୁ ୧୮୦ରୁ ଅଧିକ ଚୋରି କରିଥିବା ଜଣାପଡିଛି । ତାର ଏକାଧିକ ଗାର୍ଲଫ୍ରେଣ୍ଡ ଥିବା ବେଳେ ଚୋରି ଟଙ୍କାକୁ ସେମାନଙ୍କ ପିଛାରେ ଖର୍ଚ୍ଚ କରୁଥିଲା । ଏପରିକି ଆଭିଜାତ୍ୟ ଜୀବନ ଶୈଳୀ ମଧ୍ୟ ଜୀଉଁଥିବା ପୁଲିସ ତଦନ୍ତରୁ ଜାଣିବାକୁ ପାଇଛି ।
ସ୍ୱାମୀ ୨୦୦୩ରେ ନାବାଳକ ଥିବା ବେଳେ ଚୋରି ଆରମ୍ଭ କରିଥିଲା । ୨୦୦୯ ବେଳକୁ ସେ ଜଣେ ଅଭ୍ୟାସଗତ ଚୋର ହୋଇସାରିଥିଲା। ଏହି ସମୟରେ ସେ କୋଟି କୋଟି ଟଙ୍କା ଚୋରି କରିଥିଲା ବେଳେ ବିଭିନ୍ନ ଗାର୍ଲଫ୍ରେଣ୍ଡକୁ ଭିନ୍ନ ଭିନ୍ନ ସମୟରେ ଦାମୀ ଉପହାର ମଧ୍ୟ ଦେଉଥିଲା । କୋଲକାତାରେ ଜଣେ ଗାର୍ଲଫ୍ରେଣ୍ଡଙ୍କୁ ସେ ୨୦୧୬ ମସିହାରେ ୩ କୋଟିର ଘର ଜନ୍ମଦିନ ଉପହାର ଦେଇଥିଲା । ସେହିଭଳି ଅନ୍ୟ ଜଣେ ଗାର୍ଲଫ୍ରେଣ୍ଡଙ୍କୁ ତାଙ୍କ ଜନ୍ମଦିନରେ ୨୨ ଲକ୍ଷର ଆକ୍ୱାରିୟମ ଉପହାର ଦେଇଥିବା ଜଣାପଡିଛି । ୨୦୧୪ରୁ ୨୦୧୫ ମଧ୍ୟରେ ସେ ବିପୁଳ ଟଙ୍କା କେତେକ ଅଭିନେତ୍ରୀଙ୍କ ପିଛାରେ ଖର୍ଚ୍ଚ କରିଥିଲା । ୨୦୧୬ରେ ସେ ଚୋରି କରି ପ୍ରଥମେ ଗୁଜରାଟ ପୁଲିସ ହାତରେ ଧରାପଡିଥିଲା । ସାବରମତୀ ଜେଲ୍ରେ ୬ ବର୍ଷ ବିତାଇଥିଲା । ଜେଲରୁ ମୁକୁଳିବା ପରେ ସେ ମହାରାଷ୍ଟ୍ର ଚାଲିଆସିଲା । ସେଠାରେ ବିଭିନ୍ନ ସ୍ଥାନରେ ଚୋରି କରି ଧରାପଡି କିଛିଦିନ ଜେଲ୍ରେ ମଧ୍ୟ ରହିଲା ।
୨୦୨୪ରେ ବେଙ୍ଗାଲୁରୁ ଆସିଥିଲା । ଗତ ଜାନୁଆରୀ ୯ ତାରିଖରେ ସେ ମଡିୱାଲା ଅଞ୍ଚଳରେ ଏକ ଚୋରି କରିଥିଲା । ସେହି ଘଟଣାରେ ମଡିୱାଲା ପୁଲିସ ତାକୁ ଗିରଫ କରିବାରେ ସକ୍ଷମ ହୋଇଛି । ଚୋରି କରି ବିପୁଳ ଟଙ୍କା ଅର୍ଜନ କରିଥିଲେ ମଧ୍ୟ ସ୍ୱାମୀ ସୋଲାପୁରରେ ୪୦୦ ବର୍ଗଫୁଟର ଏକ ଘରେ ରହୁଥିଲା । ଉକ୍ତ ଘର ତାର ମା’ଙ୍କ ନାମରେ ଥିଲା । ତେବେ ବ୍ୟାଙ୍କରୁ ନେଇଥିବା ଋଣ ପରିଶୋଧ ନ କରିବାରୁ ଉକ୍ତ ଘରକୁ ଜବତ କରାଯାଇଛି ।
ଯେଉଁ ଘରେ କେହି ଲୋକ ନଥିବେ କିମ୍ବା କେହି ଛୁଟିରେ ଯାଇଥିବେ ଏବଂ ଉକ୍ତ ଘରେ ତାଲା ପଡିଥିବ ସେହି ଘରକୁ ସ୍ୱାମୀ ଟାର୍ଗେଟ କରେ। ତାଲା କାଟି ଭିତରେ ପ୍ରବେଶ କରିବା ପରେ ଟଙ୍କା ଓ ସୁନାରୂପା ଗହଣା ଧରି ଛୁ ମାରେ । ଚୋରି କରିବା ପରେ ସହରରେ ଲାଗିଥିବା ସିସିଟିଭି ଫୁଟେଜରୁ ବର୍ତ୍ତିବା ଲାଗି ସେ ପୋଷାକ ବଦଳାଇଥାଏ । ଚୋରି ସୁନାକୁ ସେ ତରଳାଇବା ଲାଗି ଏକ ଫାୟାରଗନ ବ୍ୟବହାର କରେ । ପୁଲିସ ତା ଘରୁ ଉକ୍ତ ଫାୟାରଗନ, କିଛି ଅଳଙ୍କାର ଓ ସୁନା ତରଳାଇବା ଲାଗି ଉଦ୍ଦିଷ୍ଟ କିଛି ଅନ୍ୟ ଉପକରଣ ଜବତ କରିଛି । ସବୁଠାରୁ ବଡକଥା ହେଉଛି ସ୍ୱାମୀ ଜଣେ କରାଟେ ବ୍ଲାକବେଲ୍ଟ ଧାରୀ ।
