ନୂଆଦିଲ୍ଲୀ: ଜମ୍ମୁ ଓ କଶ୍ମୀରର କିଷ୍ଟୱାର ଜିଲ୍ଲାରେ ସୁରକ୍ଷାବାହିନୀକୁ ଏକ ବଡ଼ ସଫଳତା ମିଳିଛି। ଏକ ଅପରେସନ ସମୟରେ ତିନି ଜଣ ଆତଙ୍କବାଦୀଙ୍କୁ ନିପାତ କରାଯାଇଥିବା ବେଳେ ସେମାଙ୍କ ନିକଟରୁ ଆମେରିକୀୟ ନିର୍ମିତ ଏମ୪ କାର୍ବାଇନ ରାଇଫଲ ସହ ଅନ୍ୟାନ୍ୟ ଅସ୍ତ୍ରଶସ୍ତ୍ର ଜବତ କରାଯାଇଛି। ଏହି ଘଟଣା ପାକିସ୍ତାନର ଆତଙ୍କବାଦୀଙ୍କୁ ଅସ୍ତ୍ର ଯୋଗାଣ ସହ ଜଡ଼ିତ ଥିବା ଲିଙ୍କକୁ ନେଇ ସନ୍ଦେହ ପ୍ରକାଶ କରିଛି।
ସୂଚନା ଅନୁସାରେ, ଏପ୍ରିଲ ୯ ତାରିଖରୁ ଆରମ୍ଭ ହୋଇଥିବା ଏକ ଯୌଥ ଅପରେସନରେ ଭାରତୀୟ ସେନାର ହ୍ୱାଇଟ ନାଇଟ କୋର ଏବଂ ଜମ୍ମୁ ଓ କଶ୍ମୀର ପୁଲିସ ଚତ୍ରୁ ଜଙ୍ଗଲ ଅଞ୍ଚଳରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ଏପ୍ରିଲ ୧୧ରେ ଜଣେ ଆତଙ୍କବାଦୀଙ୍କୁ ନିପାତ କରାଯାଇଥିବା ବେଳେ ଏପ୍ରିଲ ୧୨ରେ ଆଉ ଦୁଇଜଣଙ୍କୁ ହତ୍ୟା କରାଯାଇଥିଲା। ଜବତ ହୋଇଥିବା ଅସ୍ତ୍ର ମଧ୍ୟରେ ଏକ ଏମ୪ ରାଇଫଲ, ଦୁଇଟି ଏକେ-୪୭ ରାଇଫଲ, ଏକ ପିସ୍ତଲ, ୨୦ଟି ମ୍ୟାଗାଜିନ, ଏବଂ ପାକିସ୍ତାନରେ ନିର୍ମିତ ଔଷଧ ଓ ବିଭିନ୍ନ ଚିକିତ୍ସା ସାମଗ୍ରୀ ରହିଛି।
ସୁରକ୍ଷାବାହିନୀ ଅଧିକାରୀଙ୍କ କହିବା ଅନୁସାରେ, ନିହତ ଆତଙ୍କବାଦୀମାନେ ଜୈଶ-ଏ-ମହମ୍ମଦର ସଦସ୍ୟ ଥିଲେ, ଯେଉଁମାନଙ୍କ ମଧ୍ୟରେ ଜଣେ ଶୀର୍ଷ କମାଣ୍ଡର ସୈଫୁଲ୍ଲାହ ମଧ୍ୟ ରହିଥିଲେ। ଏହି ଅସ୍ତ୍ରଶସ୍ତ୍ରରେ ବ୍ୟବହୃତ ଷ୍ଟିଲ ବୁଲେଟପ୍ରୁଫ ଗାଡ଼ି ଭେଦ କରିବାର କ୍ଷମତା ରଖିଥାଏ। ଯାହା ସୁରକ୍ଷାବାହିନୀ ପାଇଁ ଏକ ଗୁରୁତର ଚିନ୍ତାର ବିଷୟ। ଏହା ପୂର୍ବରୁ ମଧ୍ୟ ଜମ୍ମୁ ଓ କଶ୍ମୀରରେ ଏମ୪ ରାଇଫଲର ବ୍ୟବହାର ଦେଖାଯାଇଥିଲା। ଯାହା ଆମେରିକୀୟ ସେନାର ଆଫଗାନିସ୍ତାନରୁ ପ୍ରତ୍ୟାହାର ପରେ ଅବଶିଷ୍ଟ ଅସ୍ତ୍ରଶସ୍ତ୍ର ପାକିସ୍ତାନ ମାଧ୍ୟମରେ ଆତଙ୍କବାଦୀଙ୍କ ହାତରେ ପହଞ୍ଚିଥିବା ସନ୍ଦେହ ସୃଷ୍ଟି କରିଛି।
ଏହି ଘଟଣା ପାକିସ୍ତାନର ଆତଙ୍କବାଦୀ ସଂଗଠନଗୁଡ଼ିକୁ ସମର୍ଥନ ଏବଂ ଅସ୍ତ୍ର ଯୋଗାଣ କରୁଥିବା ନେଟୱର୍କ ଉପରେ ଆଲୋକପାତ କରିଛି। ସୁରକ୍ଷାବାହିନୀ ଏବେ ଉକ୍ତ ଅଞ୍ଚଳରେ ଡ୍ରୋନ, ଫେସିଆଲ ରେକଗନିସନ ଏବଂ ଅନ୍ୟାନ୍ୟ ଉନ୍ନତ ଟେକ୍ନୋଲୋଜି ବ୍ୟବହାର କରି ନିରିକ୍ଷଣ ବଢ଼ାଇ ଦେଇଛନ୍ତି। ଅଧିକାରୀମାନେ ଜନସାଧାରଣଙ୍କୁ ସତର୍କ ରହିବାକୁ ଏବଂ କୌଣସି ସନ୍ଦେହଜନକ ଗତିବିଧି ବିଷୟରେ ସୂଚନା ଦେବାକୁ ଅନୁରୋଧ କରିଛନ୍ତି।
ଚେନାବ ଉପତ୍ୟକାରେ ଆତଙ୍କବାଦ ବିରୋଧୀ ଅଭିଯାନରେ ଏକ ବଡ଼ ସଫଳତା ବୋଲି ବିବେଚନା କରାଯାଉଛି।
