ନୂଆଦିଲ୍ଲୀ,୨୯।୩: ପୁଣି ଥରିଲା ମିଆଁମାର। ଭୟଙ୍କର ଭୂକମ୍ପର ଦିନକ ପରେ ଶନିବାର ଅନୁଭୂତ ହୋଇଛି ଝଟକା। ରିକ୍ଟର ସ୍କେଲରରେ ଏହାର ତୀବ୍ରତା ଥିଲା ୫.୧। ୟୁନାଇଟେଡ୍ ଷ୍ଟେଟସ୍ ଜିଓଲୋଜିକାଲ ସର୍ଭେର ରିପୋର୍ଟ ଅନୁସାରେ, ଦେଶରେ ଆସିଥିବା ବିନାଶକାରୀ ଭୂକମ୍ପର ଦିନକ ପରେ ଏହା ଅନୁଭୂତ ହୋଇଛି। ମିଆଁମାରର ରାଜଧାନୀ ନେପିତାରେ ମଧ୍ୟାହ୍ନ ୨ଟା ୫୦ ମିନିଟ୍ରେ ଏହି ଭୂକମ୍ପ ଆସିଥିଲା। ଯାହାର କେନ୍ଦ୍ରସ୍ଥଳ ୧୦ କିଲୋମିଟର ଗଭୀର ଥିଲା। ମିଆଁମାରରେ ଦୁଇ ଦିନ ମଧ୍ୟରେ ୩ ଥର ଭୂକମ୍ପ ଆସି ସାରିଛି। ତେବେ ତାଜା ଝଟକାରେ ବର୍ତ୍ତମାନ ସୁଦ୍ଧା କୌଣସି କ୍ଷୟକ୍ଷତି ତଥ୍ୟ ମିଳିନି।
ନେପିତାରେ ଭୂକମ୍ପ ସେତେବେଳେ ଆସିଥିଲା, ଯେତେବେଳେ ଅଧିକାରୀମାନେ କ୍ଷତିଗ୍ରସ୍ତ ସଡକର ମରାମତିରେ ଲାଗିଥିଲେ। ସହରର ଅଧିକାଂଶ ସ୍ଥାନଳରେ ବିଜୁଳି, ଫୋନ୍ ଓ ଇଣ୍ଟରନେଟ୍ ସେବା ବନ୍ଦ ରହିଛି। ମିଆଁମାରରେ ଜାତୀୟ ଜରୁରୀ ସ୍ଥିତି ଘୋଷଣା କରାଯାଇଥିବା ବେଳେ ଥାଇଲ୍ୟାଣ୍ଡର ବ୍ୟାଙ୍କକ୍କୁ ଇମର୍ଜେନ୍ସି ଜୋନ୍ ଘୋଷଣା କରାଯାଇଛି । ଉଭୟ ରାଷ୍ଟ୍ରରେ ବିଶାଳ ଉଦ୍ଧାର ଅଭିଯାନ ଆରମ୍ଭ ହୋଇଛି ।
ଉଲ୍ଲେଖନୀୟ ଯେ,ମ୍ୟାମାର ଓ ଥାଇଲାଣ୍ଡରେ ଶକ୍ତିଶାଳୀ ଭୂକମ୍ପରେ ଏପର୍ଯ୍ୟନ୍ତ ୧ ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ୨୩୦୦ରୁ ଅଧିକ ଆହତ ହୋଇଛନ୍ତି। ଶୁକ୍ରବାର ମିଆଁମାରରେ ୭.୭ ଓ ୬.୪ ତୀବ୍ରତାରେ ଆସିଥିବା ଦୁଇଟି ଭୂକମ୍ପ ପ୍ରବଳ କ୍ଷୟକ୍ଷତି କରିଛି। ଏହା ସହ ପଡୋଶୀ ଦେଶ ଥାଇଲାଣ୍ଡରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଥିଲା। ଭୂକମ୍ପ କାରଣରୁ ସୁଉଚ୍ଚ ଅଟାଳିକା ତାସ ଘର ଭଳି ଭୁଶୁଡି ପଡିଥିଲା।
