ଲାହୋର: ଇଂଲଣ୍ଡକୁ ୮ ରନ୍ରେ ପରାସ୍ତ କରି ଚାମ୍ପିଅନ୍ସ ଟ୍ରଫିର ସେମିଫାଇନାଲ୍ ଦୌଡ଼ରୁ ବାହାର କରିଦେଇଛି ଆଫଗାନିସ୍ତାନ । ସେପଟେ ସେମିଫାଇନାଲ୍ରେ ପ୍ରବେଶ ଲାଗି ଆଫଗାନିସ୍ତାନର ଆଶା ଉଜ୍ଜୀବିତ ହୋଇଛି । ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ୩୨୫ ରନ୍ କରିଥିଲା। ଆଫଗାନିସ୍ତାନ ପାଇଁ ଇବ୍ରାହିମ ଜଦ୍ରାନ ୧୭୭ ରନର ଏକ ଐତିହାସିକ ଇନିଂସ ଖେଳିଥିଲେ। ଜବାବରେ ଜୋ ରୁଟ୍ ଇଂଲଣ୍ଡ ପାଇଁ ଏକ ଶତକ ହାସଲ କରିଥିଲେ ହେଁ ନିଜ ଦଳକୁ ବିଜୟୀ କରାଇପାରି ନାହାନ୍ତି ।
ଲାହୋରର ଗଦ୍ଦାଫି ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ଆଫଗାନିସ୍ତାନ ଦଳ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଇବ୍ରାହିମ୍ ଜଦ୍ରାନ୍ ୧୭୭ ରନ୍ର ଅବିଶ୍ବସସନୀୟ ଇନିଂସ ଖେଳିଥିଲେ । ଚାମ୍ପିଅନ୍ସ ଟ୍ରଫି ଇତିହାସରେ ଏହା ସର୍ବାଧିକ ବ୍ୟକ୍ତିଗତ ସ୍କୋର । ସେପଟେ ୩୨୬ ରନ୍ର ପିଛା କରୁଥିବା ଇଂଲଣ୍ଡ ୪୯.୫ ଓଭରରେ ୩୧୭ ରନ୍ରେ ଅଟକି ଯାଇଛି । ଆଫଗାନିସ୍ତାନର ଘାତକ ବୋଲିଂ ଆଗରେ ଶେଷ ୩ ଓଭରରେ ଇଂଲଣ୍ଡର ବ୍ୟାଟର ଆତ୍ମସମର୍ପଣ କରିଥିଲେ ।
୪୭ ତମ ଓଭରରେ ଇଂଲଣ୍ଡ ୭ ୱିକେଟ୍ ହରାଇ ୩୦୧ ରନ କରିଥିଲା । ଦଳକୁ ଜିତିବା ପାଇଁ ୧୮ ବଲ୍ରେ ୨୫ ରନ୍ ଦରକାର ଥିଲା । ୪୬ତମ ଓଭରରେ ୧୨୦ ରନ କରି ଜୋ ରୁଟ୍ ଆଉଟ ହୋଇଥିଲେ । ଏପରି ସ୍ଥିତିରେ ଇଂଲଣ୍ଡ ଆଶା କରିଥିଲା ଯେ, ଅଲରାଉଣ୍ଡର ଜେମି ଓଭରଟନ୍ ଦଳକୁ ବିଜୟୀ କରାଇବେ । କିନ୍ତୁ ଶେଷ ୩ ଓଭରରେ, ଆଜମତୁଲ୍ଲା ଉମରଜାଇ ଏବଂ ଫଜଲ ହକ୍ ଫାରୁକିଙ୍କ ଘାତକ ବୋଲିଂ ଯୋଗୁଁ ଇଂଲଣ୍ଡର ନିମ୍ନ କ୍ରମ ଧସି ଯାଇଥିଲା। ୪୮ତମ ଓଭରରେ ଉମରଜାଇ ଓଭରଟନଙ୍କ ୱିକେଟ ନେଇଥିଲେ । ପରବର୍ତ୍ତୀ ଓଭରରେ ଫାରୁକି ଜୋଫ୍ରା ଆର୍ଚରଙ୍କୁ ଆଉଟ୍ କରିଥିଲେ। ୫୦ ଓଭର ପୂରଣ ହେବା ପୂର୍ବରୁ ଆଦିଲ ରସିଦ ମଧ୍ୟ ଆଉଟ୍ ହୋଇଥିଲେ । ଏହିପରି ଆଫଗାନିସ୍ତାନ ଦଳ ଶେଷ ୩ ଓଭରରେ ମ୍ୟାଚ୍କୁ ଓଲଟାଇ ଦେଇଥିଲା ଏବଂ ୮ ରନ୍ରେ ମ୍ୟାଚ୍କୁ ଜିତି ନେଇଛି । ଆଫିଗାନିସ୍ତାନର ଆଜମତୁଲ୍ଲା ଉମରଜାଇ ୫ ଓ୍ବିକେଟ ନେଇଛନ୍ତି ।
