ୱାଶିଂଟନ, ୨୭/୦୬: ଆମେରିକାରେ ଏବେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଲାଗିରହିଛି । ବାହାରକୁ ବାହାରିବା ମୁସ୍କିଲ ହୋଇପଡ଼ୁଛି । ଏଭଳି ସ୍ଥିତିରେ ୱାଶିଂଟନ ଡିସିରେ ଥିବା ଦେଶର ପୂର୍ବତନ ରାଷ୍ଟ୍ରପତି ଆବ୍ରାହମ ଲିଙ୍କନଙ୍କ ୬  ଫୁଟ ଉଚ୍ଚତାର ମହମ ପ୍ରତିମୂର୍ତ୍ତି ତରଳି ଯାଇଛି । ଭୀଷଣ ଗରମ ସହ୍ୟ କରି ନ ପାରି ପ୍ରତିମୂର୍ତ୍ତି ନରମ ପଡ଼ିଯାଇ ଶେଷରେ ତରଳି ଯାଇଛି ।  ଏହାର ଆକୃତି ସମ୍ପୂର୍ଣ୍ଣ ବଦଳି  ଯାଇଛି । 

ୱାଶିଂଟନ ଡିସିର ଏକ ପ୍ରାଥମିକ ବିଦ୍ୟାଳୟ  ପରିସରରେ ଆବ୍ରାହମ  ଲିଙ୍କନଙ୍କ ମହମ ପ୍ରତିମୂର୍ତ୍ତି  ପ୍ରତିଷ୍ଠା ହୋଇଥିଲା ।  ପ୍ରଚଣ୍ଡ ଗରମରେ ପ୍ରଥମେ ମୂର୍ତ୍ତିଟିର ମସ୍ତକ ତରଳି ଖସିପଡ଼ିଥିଲା । ଏହାପରେ ଡାହାଣ ଗୋଡ଼ ବି ତରଳି ଯାଇଛି । ୱାଶିଂଟନ ଡିସିରେ ଗତ ଶନିବାର ତାପମାତ୍ରା  ୪୦ ଡିଗ୍ରୀ ସେଲ୍‌ସିୟସ ପର୍ଯ୍ୟନ୍ତ ଯାଇଥିଲା । ତଥାପି  ଖରାର ପ୍ରଭାବ ଅଧିକ ରହିବା କାରଣରୁ ମହମ ପ୍ରତିମୂର୍ତ୍ତି  ଏହାକୁ ସହ୍ୟ କରିପାରି ନ ଥିଲା । ଏହାକୁ ଆମେରିକୀୟ  କଳାକାର ସ୍ୟାଣ୍ଡି ୱିଲିୟମ ଚତୁର୍ଥ ବନାଇଥିଲେ । ଚଳିତବର୍ଷ ଫେବ୍ରୁଆରୀରେ ଉତ୍ତରପଶ୍ଚିମ ୱାଶିଂଟନର  ସ୍କୁଲ ପରିସରରେ ସ୍ଥାପନ କରାଯାଇଥିଲା ।