ନୂଆଦିଲ୍ଲୀ, ୧୦/୧୦ : ନବରାତ୍ରି ପାଇଁ ସାରା ଦେଶ ଉତ୍ସବମୁଖର ଥିବାବେଳେ ଶ୍ରୀରାମଙ୍କ ବିଜୟ ଉତ୍ସବ ମଧ୍ୟ ପାଳନ କରାଯାଉଛି। ଇତିମଧ୍ୟରେ ଏକ ମଜାଦାର ଖବର ଚର୍ଚ୍ଚାକୁ ଆସିଛି। ବୁନ୍ଦେଲଖଣ୍ଡର ସାଗର ଜିଲ୍ଲାରେ ଜଣେ ବ୍ୟକ୍ତି ରାମ ନୁହେଁ, ରାବଣଙ୍କୁ ପୂଜା କରୁଛନ୍ତି । ୪୭ ବର୍ଷୀୟ ସୁବୋଧ ଶୁକ୍ଲା ‘ଜୟ ଲଙ୍କେଶ’ ଓ ‘ଜୟ ରାବଣ ଜୟ ବ୍ରାହ୍ମଣ’ ନାରା ଦେଉଛନ୍ତି । ଦଶହରା ଦିନ ରାବଣ ଦହନ ବିରୋଧରେ ସଚେତନତା ସୃଷ୍ଟି ଲାଗି ସେ ପ୍ରୟାସ କରୁଛନ୍ତି ।
ସାଗର ସ୍ଥିତ ରବିଶଙ୍କର ୱାର୍ଡ ବାସିନ୍ଦା ସୁବୋଧ ପ୍ରଥମେ ହୋମଗାର୍ଡ ଭାବେ ଇନ୍ଦେରରେ ମୁତୟନ ଥିଲେ । ପରେ ଜୈନ ଆଦିମ ଜାତି କଲ୍ୟାଣ ବିଭାଗ, ଖଣ୍ଡୱାକୁ ତାଙ୍କର ବଦଳି ହେଲା । ସେଠାରେ ସେ ଆଦିବାସୀ ସମୁଦାୟରେ କାମ କଲେ । ସେଠାକାର ଆଦିବାସୀ ରାବଣ, କୁମ୍ଭକର୍ଣ୍ଣ ଓ ମେଘନାଦଙ୍କୁ ପୂଜା କରନ୍ତି । ଏହା ଦେଖି ସୁବୋଧଙ୍କର ରାବଣ ପ୍ରତି ରୁଚି ବଢ଼ିଲା । ଇତିମଧ୍ୟରେ ସେ ରାବଣ ସଂହିତା ଓ ରାବଣ ସ୍ତୁତି ଅଧ୍ୟୟନ କଲେ ଏବଂ ରାବଣଙ୍କ ଭକ୍ତ ପାଲଟିଗଲେ ।
ସୁବୋଧ କହନ୍ତି, ଖଣ୍ଡୱାର ଆଦିବାସୀଙ୍କ ବିଶ୍ୱାସ ଥିଲା ଯେ ରାବଣ ଦକ୍ଷିଣର ଦ୍ରାବିଡ଼ ବ୍ରାହ୍ମଣ ଥିଲେ । ସେମାନଙ୍କ ପାଇଁ ସେ ଭଗବାନ ଥିଲେ । ଆଦିବାସୀଙ୍କର ଏହି ବିଶ୍ୱାସ ତାଙ୍କୁ ରାବଣର ଭକ୍ତ ହେବାକୁ ପ୍ରେରିତ କଲା । ସେ ନିଜ ଅନୁଭବରୁ ରାବଣଙ୍କୁ ନିଜ ଆରାଧ୍ୟ ମାନନ୍ତି । ରାବଣ ଦହନକୁ ନେଇ ସୁବୋଧ କହନ୍ତି, ଏହା ବ୍ରାହ୍ମଣ ସମାଜର ଶୋଷଣର ପ୍ରତୀକ । ସେ ରାଷ୍ଟ୍ରୀୟ ରାବଣ ସେନା ନାମକ ସଂଗଠନ କରିଛନ୍ତି, ଯାହା ଜରିଆରେ ସେ ବ୍ରାହ୍ମଣଙ୍କୁ ଏକଜୁଟ କରିବାକୁ ପ୍ରୟାସ କରୁଛନ୍ତି । ରାବଣଙ୍କ ପ୍ରତି ସୁବୋଧଙ୍କ ଭକ୍ତି କେବଳ ଆସ୍ଥାରେ ସୀମିତ ନାହିଁ । ସେ ଶିବଙ୍କର ମଧ୍ୟ ଭକ୍ତ । ନିୟମିତ ଶିବ ତାଣ୍ଡବ କରନ୍ତି । ସେ କହନ୍ତି, ରାବଣ ମହାକାଳଙ୍କର ପରମ ଭକ୍ତ ଥିଲେ । ତେଣୁ ତାଙ୍କୁ କେବଳ ରାକ୍ଷସ ରୂପେ ନୁହେଁ, ଜଣେ ଆଦର୍ଶ ବ୍ରାହ୍ମଣ ଓ ବିଦ୍ୱାନ ରୂପେ ବିବେଚନା କରାଯିବା ଉଚିତ୍।
