କାମାକ୍ଷାନଗର,୨୫/୦୯: ବାରମ୍ୱାର ବିଦ୍ୟୁତ କାଟକୁ ନେଇ ଟାଟା ପାୱାର ବିରୋଧରେ ବିଦ୍ୟୁତ ସବଷ୍ଟେସନ ଘେରାଉ କଲେ ୬ ଗାଁର ଶତାଧିକ ବିଦ୍ୟୁତ ଉପଭୋକ୍ତା । ମଙ୍ଗଳବାର ରାତିରେ ଢେଙ୍କାନାଳ ଜିଲ୍ଲା ପରଜଙ୍ଗ ବିଦ୍ୟୁତ ସବଷ୍ଟେସନରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ରୋଡ଼ ପଞ୍ଚାୟତର କୁନ୍ଦନଦେଇପୁର, ରୋଡ଼, ନୂଆରୋଡ଼,ଗଇଲୋ ଏବଂ ପାଟରପଦା ପଞ୍ଚାୟତର ସାନକମର ଓ ବଡ଼କମର ଗାଁର ଲୋକମାନେ ଗତ ଶନିବାରଠାରୁ ଅନ୍ଧାର ଭିତରେ ରହୁଥିବା ଅଭିଯୋଗ କରିଛନ୍ତି । ବାରମ୍ବାର ବିଦ୍ୟୁତ କାଟକୁ ନେଇ ଟାଟା ପାୱାର କର୍ମଚାରୀଙ୍କୁ ଯେତେ କହିଲେ ମଧ୍ୟ, କୌଣସି ପଦକ୍ଷେପ ନିଆଯାଉନାହିଁ । ଫଳରେ ଏହାର ପ୍ରତିବାଦ କରିଛନ୍ତି ଅଞ୍ଚଳବାସୀ । ଏପରିକି ବିଦ୍ୟୁତ ବିଭାଗର କନିଷ୍ଠ ଯନ୍ତ୍ରୀଙ୍କୁ ଅନ୍ୟତ୍ର ବଦଳି ପାଇଁ ମଧ୍ୟ ସେମାନେ ଦାବି କରିଛନ୍ତି । 

ଏଭଳି ଭାବରେ ବାରମ୍ୱାର ବିଦ୍ୟୁତ କାଟ ଯୋଗୁଁ ରାତିରେ ପିଲାଙ୍କ ପାଠା ପଢିବାରେ ସମସ୍ୟା ଉତ୍ପନ୍ନ ହେବା ସହ ଗାଁରେ ପାନୀୟ ଜଳ ଯୋଗାଣରେ ମଧ୍ୟ ଅସୁବିଧା ଉପୁଜୁଥିବା ଅଞ୍ଚଳବାସୀ ପ୍ରକାଶ କରିଛନ୍ତି । ଏପରିକି କୌଣସି ସମସ୍ୟା ହେଲେ, ବିଦ୍ୟୁତ ବିଭାଗର କର୍ମଚାରୀ ସହଯୋଗ କରୁନଥିବା ମଧ୍ୟ ସେମାନେ କହିଛନ୍ତି । ତେବେ ଏହି ସମସ୍ୟାର ସମାଧାନ କରି ତୁରନ୍ତ ନିରବଛିନ୍ନ ବିଦ୍ୟୁତ ସେବା ଯୋଗାଇ ଦେବାକୁ ଅଞ୍ଚଳବାସୀ ଦାବି କରିଛନ୍ତି । ନଚେତ ଅନିର୍ଦ୍ଧିଷ୍ଟ କାଳ ପାଇଁ ଆନ୍ଦୋଳନ ଜାରି ରହିବ ବୋଲି ଲୋକମାନେ ଚେତାବନୀ ଦେଇଛନ୍ତି । ଏନେଇ ବିଭାଗୀୟ ଅଧିକାରୀଙ୍କର କୌଣସି ପ୍ରତିକ୍ରିୟା ମିଳିପାରିନାହିଁ।