ବ୍ରହ୍ମପୁର, ୧୯/୩ : ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ହାତୀଓଟ ଗ୍ରାମର ଦୀପକ ସାହୁ ହତ୍ୟା ଘଟଣା। ୧୦ଘଣ୍ଟା ମଧ୍ୟରେ ଅଭିଯୁକ୍ତଙ୍କୁ ବାନ୍ଧିଲା ପୋଲିସ। ହତ୍ୟାକାରୀ ମା’ ଏବଂ ବଡ଼ ପୁଅ ଗିରଫ। ବିଭିନ୍ନ ଦିଗକୁ ଅନୁଧ୍ୟାନ କରି ସାଇଣ୍ଟିଫିକ୍ ଟିମ୍ର ରିପୋର୍ଟ ଆଧାରରେ ହତ୍ୟା ଘଟଣାର ପର୍ଦ୍ଦାଫସ୍ କଲା ପୋଲିସ। ସାନ ପୁଅକୁ ହତ୍ୟା କରି ଦୁର୍ଘଟଣା ରୂପ ଦେଇଥିଲେ ମା’ ଏବଂ ବଡ଼ପୁଅ। ଅଭିଯୁକ୍ତମାନେ ହେଲେ ହାତୀଓଟ ଗ୍ରାମର ସୁରଜ ସାହୁ ଓ ତାଙ୍କ ମା’ବୈଜୟନ୍ତୀ ସାହୁ। ପୋଲିସ ସେମାନଙ୍କୁ ଗିରଫ କରି ଏବେ କୋର୍ଟ ଚାଲାଣ କରିଛି।
ସୂଚନା ଅନୁସାରେ, ହାତୀଓଟ ଗ୍ରାମର ବୈଜୟନ୍ତୀ ସାହୁ ଦୁଇ ପୁଅ ସୁରଜ ଓ ଦୀପକଙ୍କ ସହ ରହୁଥିଲେ। ବିଭିନ୍ନ ସମୟରେ ସାନ ପୁଅ ଦୀପକ ଘରେ ଗଣ୍ଡଗୋଳ କରୁଥିଲା। ଏପରିକି ଅଧିକାଂଶ ସମୟ ବାହାରେ ରହୁଥିଲା। ଗତ ୧୬ ତାରିଖ ରାତିରେ ଦୀପକ ଘରକୁ ଆସି ପୁଣିଥରେ ମା’ ଓ ବଡ଼ଭାଇ ସହିତ ଗଣ୍ଡଗୋଳ କରି ପାଟିତୁଣ୍ଡ କରିଥିଲା। ଏଥିରେ ଉତ୍କ୍ଷିପ୍ତ ହୋଇ ମା’ ଓ ବଡ଼ପୁଅ ସୁରଜ ମିଶି ଦୀପକଙ୍କ ତିଣ୍ଟିଚିପି ହତ୍ୟା କରିଥିଲେ। ଘଟଣା ପରେ ସେମାନେ ଦୀପକଙ୍କୁ ପୋଲସରା ମେଡିକାଲ ନେଇଥିଲେ। ଦୀପକ କୌଣସି ଏକ ଦୁର୍ଘଟଣାରେ ଶିକାର ହୋଇ ଘରକୁ ଆସି ଅଚେତ ହୋଇ ପଡ଼ିଥିଲା ବୋଲି କହିଥିଲେ। ଚିକିତ୍ସା ପରେ ଡାକ୍ତର ଦୀପକଙ୍କୁ ମୃତ ଘୋଷଣା କରିଥିଲେ। କବିସୂର୍ଯ୍ୟନଗର ଥାନା ପୁଲିସ ଏହି ଘଟଣାରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଶବ ବ୍ୟବଚ୍ଛେଦ ରିପୋର୍ଟ ଓ ସାଇଣ୍ଟିଫିକ୍ ଟିମ୍ର ପ୍ରମାଣ ଆଧାରରେ ତାହା ହତ୍ୟା ବୋଲି ଜଣାପଡ଼ିଥିଲା। ଗଞ୍ଜାମ ଏସ୍ପି ଶୁଭେନ୍ଦୁ କୁମାର ପାତ୍ରଙ୍କ ନିର୍ଦ୍ଦେଶ କ୍ରମେ ପୁରୁଷୋତ୍ତମପୁର ଏସ୍ଡିପିଓ ଡ. ଦୀପକ କୁମାର ମିଶ୍ର ଓ କବିସୂର୍ଯ୍ୟନଗର ଥାନା ଅଧିକାରୀ ନିରଞ୍ଜନ ଦାସ ଘଟଣାର ତଦନ୍ତ ଆରମ୍ଭ କରିଥିଲେ। ଅଧିକ ଜେରା ପରେ ଉଭୟ ମା-ପୁଅ ମିଶି ସାନ ଭାଇକୁ ହତ୍ୟା କରିଥିବା ପୁଲିସ ଆଗରେ ସ୍ବୀକାର କରିଥିଲେ।
ଏହି ଖବରଟିକୁ ପଢନ୍ତୁ-ଜନତା ମଇଦାନରେ ଜମିବ ତୋଷାଳି ମେଳା, ୨୮ କୋଟି ବାଣିଜ୍ୟ ଲକ୍ଷ୍ୟ
