କୋଲକାତା,୨୫/୦୪: ପ୍ରେମିକାକୁ ବଞ୍ଚାଇବାକୁ ଯାଇ ଚାଲିଗଲା ପ୍ରେମିକର ଜୀବନ । ଶେଷ ନିଶ୍ୱାସ ଯାଏ ଦୁର୍ବୃତ୍ତଙ୍କ ସହିତ ଲଢିଲେ । ଶେଷରେ ଆଖି ବୁଜି ଦେଲେ । କୋଲକାତାରେ ଲିଭ-ଇନ୍ ପାର୍ଟନରଙ୍କୁ ହତ୍ୟା କରାଯାଇଛି । ମୃତକଙ୍କ ନାମ ସଙ୍କେତ ଚାଟାର୍ଜୀ । ଏହି ଘଟଣା କୋଲକାତା ନ୍ୟୁ ଟାଉନ୍ସ ଗୌରଙ୍ଗାନଗରେ ଚାଞ୍ଚଲ୍ୟ ଖେଳାଇ ଦେଇଛି ।
କୋଲକାତାରେ ପୁଣି ଜଣେ ପ୍ରେମିକାକୁ କିଛି ଦୁର୍ବୃତ୍ତ ହଇରାଣ କରିଥିବା ଘଟଣା ସାମ୍ନାକୁ ଆସିଛି । ପ୍ରତିବାଦ କରିବାରୁ ଦୁର୍ବୃତ୍ତଙ୍କ ହାତରେ ଲିଭ-ଇନ୍ ପାର୍ଟନରଙ୍କ ଜୀବନ ଯାଇଛି । ମୃତକଙ୍କ ନାମ ସଙ୍କେତ ଚାଟାର୍ଜୀ । ସେ ଜଣେ ଆଇଟି କର୍ମୀ । ସେ କିଛି ବର୍ଷ ହେବ ତାଙ୍କ ପ୍ରେମିକାଙ୍କ ସହିତ ନ୍ୟୁ ଟାଉନ୍ସ ଗୌରଙ୍ଗାନଗରେ ରହୁଥିଲେ । କିଛି ଦିନ ପରେ ଦୁହିଁଙ୍କର ବାହାଘର ହୋଇଥାନ୍ତା । ବୁଧବାର ରାତିରେ ସଙ୍କେତ ଓ ତାଙ୍କ ପ୍ରେମିକାଙ୍କ ମଧ୍ୟରେ କିଛି କାରଣ ପାଇଁ ଯୁକ୍ତିତର୍କ ହୋଇଥିଲା । ଏହାକୁ ନେଇ ଘରୁ ବାହାରି ଆସିଥିଲେ ଯୁବତୀଜଣଙ୍କ । ସେହି ସମୟରେ କିଛି ଦୁର୍ବୃତ୍ତ ତାଙ୍କୁ ରାସ୍ତାରେ ଦୁର୍ବବ୍ୟହାର କରିଥିଲେ । ସଙ୍କେତ ଏହାର ପ୍ରତିବାଦ କରିଥିଲେ ।
ହାତାହାତି ପରିସ୍ଥିତି ଉପୁଜିଥିଲା । ସେଠି ପଡିଥିବା ବାଉଁଶରେ ସଙ୍କେତଙ୍କୁ ପିଟିଥିଲେ ଦୁର୍ବୃତ୍ତ । ସଙ୍କେତଙ୍କୁ ବଞ୍ଚାଇବାକୁ ଚିତ୍କାର କରିଥିଲେ ତାଙ୍କ ପ୍ରେମିକା । ସାହାଯ୍ୟ ପାଇଁ ପଡୋଶୀଙ୍କ ଘର କବାଟ ବାଡେଇଥିଲେ । ମାତ୍ର କେହି ତାଙ୍କୁ ସାହାଯ୍ୟ କରି ନଥିଲେ । ଅଧିକ ରକ୍ତସ୍ରାବ ହେବାକୁ ସଙ୍କେତଙ୍କର ମୃତ୍ୟୁ ହୋଇଥିଲା । ଦୁର୍ବୃତ୍ତ ଘଟଣାସ୍ଥଳରୁ ଫେରାର ହୋଇଥିଲେ । ଯୁବତୀଙ୍କ ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ସମ୍ବୁଲ ମଣ୍ଡଳ, ସାଗର ଦାସ ଓ ରାଜୁ ଘୋଷ ୩ ଯୁବକଙ୍କୁ ସଙ୍କେତଙ୍କ ହତ୍ୟା ଘଟଣାରେ ପୋଲିସ ଗିରଫ କରିଛି । ସିସିଟିଭି ଫୁଟେଜ ଆଧାରରେ ତଦନ୍ତ ଜାରି ରଖିଛି ।
