ନୂଆଦିଲ୍ଲୀ: ଚୀନ୍‌ର ବିଶ୍ବପ୍ରସିଦ୍ଧ ଶାଓଲିନ୍‌ ମନ୍ଦିରର ମଠାଧୀଶ ଏବେ ଅଡ଼ୁଆରେ । ବିଭିନ୍ନ ଅପରାଧିକ ମାମଲାରେ ଛନ୍ଦି ହୋଇଛନ୍ତି ‘କଙ୍ଗ ଫୋ’ ଚଳଚ୍ଚିତ୍ର ମାଧ୍ୟମରେ ଚର୍ଚ୍ଚାକୁ ଆସିଥିବା ଶାଓଲିନ୍‌ ମନ୍ଦିରର ମୁଖ୍ୟ ଶି ୟୋଙ୍ଗସିନ୍ । ତାଙ୍କ ବିରୋଧରେ ଅପରାଧିକ ମାମଲାର ତଦନ୍ତ ଆରମ୍ଭ ହୋଇଛି । ଶି ୟୋଙ୍ଗସିନ୍ଙ୍କ ବିରୋଧରେ ଯୌନ ଶୋଷଣ ଏବଂ ଦୁର୍ନୀତି ଅଭିଯୋଗ ଆସିବା ପରେ ଚୀନ୍‌ରେ ହଇଚଇ ସୃଷ୍ଟି ହୋଇଛି ।  ଶି’ ମୁଖ୍ୟତଃ ‘ସିଇଓ ସନ୍ନ୍ୟାସୀ’ ଭାବେ ଜଣାଶୁଣା । 

ଚୀନର ପ୍ରସିଦ୍ଧ ଶାଓଲିନ୍ ମନ୍ଦିରର ମୁଖ୍ୟ ମଠାଧୀଶ ଶି ୟୋଙ୍ଗସିନ୍‌ଙ୍କୁ ବହିଷ୍କାର କରାଯାଇଥିବା ମଧ୍ୟ କୁହାଯାଉଛି । ତାଙ୍କ ଉପରେ ମନ୍ଦିରର ସମ୍ପତ୍ତି ଏବଂ ପାଣ୍ଠି ଆତ୍ମସାତ କରିବା, ଅନେକ ମହିଳାଙ୍କ ସହିତ ଅବୈଧ ସମ୍ପର୍କ ରଖିବା ଏବଂ ଅବୈଧ ସନ୍ତାନର ପିତା ହେବା ଅଭିଯୋଗ ରହିଛି । ଚାଇନା ଡେଲିର ରିପୋର୍ଟ ଅନୁଯାୟୀ, ଅନେକ ସରକାରୀ ସଂସ୍ଥା ମିଳିତ ଭାବରେ ଏହି ଅଭିଯୋଗଗୁଡ଼ିକର ତଦନ୍ତ କରୁଛନ୍ତି। ଏ ସୋମବାର ଚୀନର ବୌଦ୍ଧ ସଂଘ ତାଙ୍କର ନିର୍ଦ୍ଦେଶ ପ୍ରମାଣପତ୍ର ଛଡ଼ାଇ ନେଇଛି । ସଂଘ ଏହାର ବିବୃତ୍ତିରେ କହିଛି ଯେ, ଶି ୟୋଙ୍ଗସିନ୍‌ଙ୍କ କାର୍ଯ୍ୟ ବୌଦ୍ଧ ସମ୍ପ୍ରଦାୟର ପ୍ରତିଷ୍ଠା ଏବଂ ଭିକ୍ଷୁମାନଙ୍କ ପ୍ରତିଛବିକୁ ଗମ୍ଭୀର କ୍ଷତି ପହଞ୍ଚାଇଛି ।

ଶି ୟୋଙ୍ଗସିନ୍ ଏକ ବିଳାସପୂର୍ଣ୍ଣ ଜୀବନ ଜିଉଁଛନ୍ତି ।  ରିପୋର୍ଟ ଅନୁଯାୟୀ, ଶି  ଏକ ଭୋକ୍ସୱାଗନ୍ SUV ବ୍ୟବହାର କରୁଛନ୍ତି । ସୁନାର ପୋଷାକ ପିନ୍ଧୁଛନ୍ତି । ସରକାର ଏବଂ କମ୍ପାନୀଠାରୁ ଅନେକ ମହଙ୍ଗା ଉପହାର ଗ୍ରହଣ କରିଛନ୍ତି । ଏବେ ତାଙ୍କ ବିରୋଧରେ ଯୌନ ନିର୍ଯାତନା ଏବଂ ଦୁର୍ନୀତି ଅଭିଯୋଗ ଆସିବା ପରେ ବୌଦ୍ଧ ସଂଘ ତାଙ୍କର କାର୍ଯ୍ୟକୁ ନିନ୍ଦା କରିଛି । ତାଙ୍କର ଏହି କାର୍ଯ୍ୟ ବୌଦ୍ଧ ସମ୍ପ୍ରଦାୟର ପ୍ରତିଷ୍ଠା ଏବଂ ଭିକ୍ଷୁମାନଙ୍କ ପ୍ରତିଛବିକୁ ଗମ୍ଭୀର ଭାବରେ କ୍ଷତି ପହଞ୍ଚାଇଛି ବୋଲି କହିଛି ବୌଦ୍ଧ ସଂଘ ।

ପୂର୍ବରୁ ମଧ୍ୟ ଶି ସମାନ ଅଭିଯୋଗ ପାଇଁ ଚର୍ଚ୍ଚାରେ ରହିଥିଲେ । ୨୦୧୫ ମସିହାରେ ମହିଳାଙ୍କ ସହିତ ଯୌନ ସମ୍ପର୍କ ଏବଂ ମନ୍ଦିର ପାଣ୍ଠି ଆତ୍ମସାତ କରିବା ପାଇଁ ସେ ଚର୍ଚ୍ଚାକୁ ଆସିଥିଲେ । କିନ୍ତୁ ପରେ ତାଙ୍କୁ ଦୋଷ ମୁକ୍ତ କରାଯାଇଥିଲା । ସେହି ବର୍ଷ, ମନ୍ଦିରର ଏକ ସମ୍ପ୍ରସାରଣ ଯୋଜନା ପାଇଁ ସମାଲୋଚିତ ହୋଇଥିଲା। ଏଥିରେ ୩୦୦ ନିୟୁତ ଡଲାର ମୂଲ୍ୟର ଯୋଜନାରେ ଏକ ହୋଟେଲ, ଏକ ଗଲ୍ଫ କୋର୍ସ ଏବଂ ଏକ କଙ୍ଗ ଫୁ ସ୍କୁଲ ଅନ୍ତର୍ଭୁକ୍ତ ଥିଲା।

ଶି ଅନଲାଇନରେ ବେଶ ସକ୍ରିୟ ରହୁଥିଲେ ।  ତାଙ୍କର ଏକ Weibo ଆକାଉଣ୍ଟ ରହିଛି । ଏଥିରେ ତାଙ୍କର  ୮ ଲକ୍ଷ ୮୦ ହଜାରରୁ ଅଧିକ ଫଲୋୟର୍ସ ରହିଛନ୍ତି ।  ଏହି ଆକାଉଣ୍ଟରେ ନିୟମିତ ଭାବରେ ବୌଦ୍ଧ ଶିକ୍ଷା ସମ୍ବନ୍ଧୀୟ ପୋଷ୍ଟ କରାଯାଏ। କିନ୍ତୁ ସେ ଜୁଲାଇ ୨୪ ପରଠାରୁ  କୌଣସି ପୋଷ୍ଟ କରିନାହାନ୍ତି। ଶି’ଙ୍କ ଆଇନଗତ ସମସ୍ୟା ଏବେ ଚୀନ୍ ଇଣ୍ଟରନେଟରେ ଏକ ପ୍ରମୁଖ ଆଲୋଚନାର ପ୍ରସଙ୍ଗ ପାଲଟିଛି ।

ଚୀନ୍ ଏବଂ ହଲିଉଡ୍ ଚଳଚ୍ଚିତ୍ର ମାଧ୍ୟମରେ ଏକ ନୂତନ ଜୀବନ ପାଇଥିବା ପ୍ରାଚୀନ କଳା ଶାଓଲିନ୍ କଙ୍ଗ୍ ଫୁକୁ ଲୋକପ୍ରିୟ କରିବାର ଶ୍ରେୟ ଶିଙ୍କୁ ଦିଆଯାଏ । ସେ ଏକ ଭିକ୍ଷୁ ଗୋଷ୍ଠୀ ସୃଷ୍ଟି କରିଥିଲେ ଯେଉଁମାନେ ସାରା ବିଶ୍ୱରେ ସାଓଲିନ୍ କଙ୍ଗ୍ ଫୁ ଶୋ କରୁଥିଲେ। ଶାଓଲିନ୍ ମନ୍ଦିର ମଧ୍ୟ ସାମରିକ କଳା ଶିକ୍ଷା ଦେବା ପାଇଁ ବିଦେଶରେ ସ୍କୁଲ ଆରମ୍ଭ କରିଥିଲା ।

ଶାଓଲିନ୍ ମନ୍ଦିର ହେଉଛି ହେନାନ୍ ପ୍ରଦେଶର ପର୍ବତମାଳାରେ ଅବସ୍ଥିତ ଏକ ୧୫୦୦ ବର୍ଷ ପୁରୁଣା ବୌଦ୍ଧ ମଠ । ପ୍ରତିବର୍ଷ ବିଶ୍ୱର ହଜାର ହଜାର ଲୋକ ମୁଖ୍ୟତଃ ସାମରିକ କଳା ଅଭ୍ୟାସ, ବିଶେଷକରି ଶାଓଲିନ୍ କୁଙ୍ଗ ଫୁ ଦେଖିବା ପାଇଁ ଏହି ମନ୍ଦିରକୁ ଆସନ୍ତି । ୧୯୭୦ ଦଶକର ଶେଷ ଭାଗ ଏବଂ ୧୯୮୦ ଦଶକର କଙ୍ଗ ଫୁ ଚଳଚ୍ଚିତ୍ର ଦ୍ୱାରା ଶାଓଲିନ୍ ମନ୍ଦିର ଲୋକପ୍ରିୟ ହୋଇଥିଲା। ଏଥିରେ ୧୯୮୨ ମସିହାରେ ଜେଟ୍ ଲିଙ୍କ ଅଭିନୀତ ଚଳଚ୍ଚିତ୍ର ଶାଓଲିନ୍ ଅନ୍ତର୍ଭୁକ୍ତ। ଆମେରିକୀୟ ସଂଗୀତ ବ୍ୟାଣ୍ଡ ଉ-ଟାଙ୍ଗ କ୍ଲାନ୍ ଏବଂ ଅନ୍ୟମାନେ ସେମାନଙ୍କ ଗୀତରେ ଏହି ମନ୍ଦିରକୁ ଉଲ୍ଲେଖ କରିଛନ୍ତି।