ନୂଆଦିଲ୍ଲୀ ୨୮/୦୭: ତେଲଗୁ ସୁପରଷ୍ଟାର ବିଜୟ ଦେବେରକୋଣ୍ଡାଙ୍କ ବହୁ ପ୍ରତିକ୍ଷୀତ ସ୍ପାଏ ଥ୍ରିଲର ‘କିଙ୍ଗଡମ୍’ର ଟ୍ରେଲର ସାମ୍ନାକୁ ଆସିଛି । ତିରୁପତିରେ ଏକ ଭବ୍ୟ କାର୍ଯ୍ୟକ୍ରମରେ ତାହା ଲଞ୍ଚ୍ ହୋଇଛି । ବିଜୟ ନିଜ ସୋସିଆଲ୍ ମିଡିଆ ହ୍ୟାଣ୍ଡଲରେ ମଧ୍ୟ ତାକୁ ପୋଷ୍ଟ କରିଛନ୍ତି । ସେଥିରେ ତାଙ୍କୁ ଦମ୍ଦାର ଆକ୍ସନରେ ଦେଖିବାକୁ ମିଳୁଛି । ‘କିଙ୍ଗଡମ୍’ରେ ସେ ଜଣେ ଗୁଇନ୍ଦା ଭୂମିକା ନିର୍ବାହ କରୁଛନ୍ତି । ତାଙ୍କୁ ଏକ ବିପଜ୍ଜନକ ମିଶନରେ ବିଦେଶର ଏକ ଜେଲ୍କୁ ପଠାଯାଇଛି । ସେଠାରେ ସେ ଯନ୍ତ୍ରଣା ସହି କିପରି ସେଠାକାର ଲୋକଙ୍କୁ ବଞ୍ଚାଉଛନ୍ତି ଏବଂ ସେମାନଙ୍କ ଲାଗି ରାଜା ସମାନ ହୋଇଯାଉଛନ୍ତି ତାହା ଫିଲ୍ମର ବିଷୟବସ୍ତୁ ।
‘ଜର୍ସି’ର ନିର୍ଦ୍ଦେଶନା ଦେଇଥିବା ଗୌତମ ତିନ୍ନାନୁରୀ ‘କିଙ୍ଗଡମ୍’ର ନିର୍ଦ୍ଦେଶନାରେ ଅଛନ୍ତି । ଏସ୍ ନାଗା ବାମ୍ସି ଏହାର ପ୍ରଯୋଜନା କରିଛନ୍ତି । ବିଜୟଙ୍କ ସହିତ ଏଥିରେ ଭାଗ୍ୟଶ୍ରୀ ବୋରସେଙ୍କ ଯୋଡି଼କୁ ଦେଖିବାକୁ ମିଳିବ । ସତ୍ୟଦେବ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଆସିବେ । ଫିଲ୍ମଟି ଗତ ମାର୍ଚ୍ଚରେ ରିଲିଜ୍ ହେବାର ଥିଲା । କିନ୍ତୁ ପ୍ରଡକ୍ସନ୍ରେ ବିଳମ୍ବ ଯୋଗୁ ତାହା ଆଗାମୀ ୩୧ରେ ରିଲିଜ୍ ହେବ । ହିନ୍ଦୀ ବ୍ୟତୀତ ଅନ୍ୟ ୪ଟି ପ୍ରମୁଖ ଦକ୍ଷିଣ ଭାରତୀୟ ଭାଷାରେ ତାହା ‘ସାମ୍ରାଜ୍ୟ’ ନାମରେ ମୁକ୍ତିଲାଭ କରିବ ।
