ମୁମ୍ବାଇ,୨୬/୦୭: : ବକ୍ସ ଅଫିସରେ ରାଜ୍ କରୁଛି ଫିଲ୍ମ 'ସୈୟାରା' । ଆହାନ ପାଣ୍ଡେ -ଅନିତ ପଡ୍ଡାଙ୍କ ଏହା ଡେବ୍ୟୁ ଫିଲ୍ମ ହୋଇଥିବା ବେଳେ ଫ୍ୟାନ୍ସ ଉଭୟଙ୍କ କେମେଷ୍ଟ୍ରିକୁ ବେଶ ପସନ୍ଦ କରିଛନ୍ତି । ଫିଲ୍ମ ଲୋକଙ୍କ ମନ ଜିତିବା ସହ ବେଶ ପ୍ରଶଂସା ସାଉଁଟୁଛି । ପ୍ରଥମ ଦିନରୁ ଥିଏଟର ସାମ୍ନାରେ ହାଉସ୍ଫୁଲ୍ ବୋର୍ଡ ଟଙ୍ଗାଇ ଦେଇଥିବା ଏହି ମ୍ୟୁଜିକାଲ୍ ଲଭ୍ଷ୍ଟାରୀ ନୂଆ ରେକର୍ଡ କରିଛି । ଗତ ଶୁକ୍ରବାର ମୁକ୍ତିଲାଭ କରିଥିବା ‘ସୈୟାରା’ ଓପ୍ନିଂ ଡେ’ ରେକର୍ଡ କରିଥିଲା । ନବାଗତ କଳାକାରଙ୍କ ଫିଲ୍ମର ଓପ୍ନିଂ ଡେ’ କଲେକ୍ସନ୍ ୨୦ କୋଟି ହେବ ବୋଲି ଦର୍ଶକ ଆଶା କରିନଥିଲେ । ଫିଲ୍ମଟି ଲଗାତାର ୬ ଦିନ ୨୦ କୋଟିରୁ ଅଧିକ କଲେକ୍ସନ୍ କଲା ।
ସେହିପରି ଗୁରୁବାର ବି ଜୋର୍ଦାର ବ୍ୟବସାୟ ସହିତ ଫିଲ୍ମର ପ୍ରଥମ ସପ୍ତାହ ସଫଳତାର ସହ ଶେଷ ହୋଇଛି । ୮୪ କୋଟି ଟଙ୍କାର ୱିକେଣ୍ଡ୍ କଲେକ୍ସନ୍ ପରେ ସୋମବାର ବି ବକ୍ସ ଅଫିସ୍ରେ ଦମ୍ଦାର କଲେକ୍ସନ୍ କଲା ‘ସୈୟାରା’ । ସୋମବାର-ମଙ୍ଗଳବାର ଫିଲ୍ମର ବକ୍ସ ଅଫିସ୍ କଲେକ୍ସନ୍ ଓପ୍ନିଂ ଡେ’ କଲେକ୍ସନ୍ଠୁ ଅଧିକ ଥିଲା । ବୁଧବାର ପର୍ଯ୍ୟନ୍ତ ଲଗାତାର ୨୦ କୋଟିରୁ ଅଧିକ ବ୍ୟବସାୟ କଲା । ଗୁରୁବାର ଫିଲ୍ମ ୧୯.୫୦ କୋଟି କଲେକ୍ସନ୍ କଲା । ଗୋଟିଏ ସପ୍ତାହରେ ଫିଲ୍ମର ମୋଟ୍ କଲେକ୍ସନ୍ ୧୭୫.୨୫ କୋଟି ଛୁଇଁଛି । ଚଳିତ ବର୍ଷ ଗୋଟିଏ ସପ୍ତାହରେ ସର୍ବାଧିକ ଆୟର ରେକର୍ଡ ଭିକି କୌଶଲଙ୍କ ଫିଲ୍ମ ‘ଛାବା’ ନାଁରେ ରହିଛି, ଯାହାର ପ୍ରଥମ ସପ୍ତାହ କଲେକ୍ସନ୍ ୨୨୫ କୋଟିରୁ ଅଧିକ ଥିଲା । ତା’ପରେ ୧୧୩ କୋଟି ସହିତ ୨ୟରେ ଥିଲା ‘ହାଉସ୍ଫୁଲ୍-୫’ । ଏବେ ୨ୟ ସ୍ଥାନ ହାସଲ କରିଛି ‘ସୈୟାରା’ ।
