କଟକ,୨୨/୦୪: ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସ ହତ୍ୟା ଘଟଣାର ପୁନଃତଦନ୍ତ ଚଳାଇଛି କ୍ରାଇମ୍ବ୍ରାଞ୍ଚ । ସେଥିପାଇଁ ଏହି ମାମଲାରେ ଗିରଫ ହୋଇଥିବା ଏକମାତ୍ର ଅଭିଯୁକ୍ତ ତଥା ପୁଲିସ ଏଏସ୍ଆଇ ଗୋପାଳ ଦାସର ମୋବାଇଲ୍ କଲ୍ ରେକର୍ଡ ଆଉ ଥରେ ଯାଞ୍ଚ୍ କରାଯାଉଛି। ହତ୍ୟାକାଣ୍ଡର ପ୍ରାୟ ୬ ମାସ ପୂର୍ବର କଲ୍ ରେକର୍ଡକୁ କ୍ରାଇମବ୍ରାଞ୍ଚ ଟିମ୍ ତନ୍ନତନ୍ନ କରି ଦେଖୁଛି । ଏହି ସମୟ ମଧ୍ୟରେ ଗୋପାଳ ଦାସର କିଛି ସନ୍ଦିଗ୍ଧ କଲ୍ ଥିବା ତଦନ୍ତକାରୀ ଟିମ୍ ଆଶଙ୍କା କରୁଛି । ତେବେ ନବ ଦାସଙ୍କ ପରିବାର ଲୋକେ ଏହି ହତ୍ୟାକାଣ୍ଡ ପଛରେ ଦାୟୀ ଥିବା ନିର୍ଦ୍ଦିଷ୍ଟ କୌଣସି ବ୍ୟକ୍ତିର ନାଁ ତଦନ୍ତକାରୀ ଟିମ୍କୁ ଜଣାଇନାହାନ୍ତି ବୋଲି କ୍ରାଇମବ୍ରାଞ୍ଚ ସୂତ୍ରରୁ ସୂଚନା ମିଳିଛି । ମାତ୍ର ଅଭିଯୁକ୍ତ ଗୋପାଳ ପଛରେ କାହାର ନା କାହାର ହାତ ଥିବା ପରିବାର ଲୋକେ ଦୃଢ଼ ଭାବେ ସନ୍ଦେହ କରୁଛନ୍ତି । ତେଣୁ ହତ୍ୟାକାଣ୍ଡ ପଛର ଖିଅ ଖୋଜିବାକୁ ତଦନ୍ତକାରୀ ଟିମ୍ ଗୋପାଳର କଲ୍ ରେକର୍ଡକୁ ଛାନ୍ଭିନ୍ କରୁଥିବା କୁହାଯାଉଛି ।
୨୦୨୩ ଜାନୁଆରୀ ୨୯ ତାରିଖରେ ତତ୍କାଳୀନ ମନ୍ତ୍ରୀ ନବ ଦାସଙ୍କୁ ପୁଲିସ ଏଏସ୍ଆଇ ଗୋପାଳ ଦାସ ଗୁଳି କରି ହତ୍ୟା କରିବା ଘଟଣା ରାଜ୍ୟରେ ଆଲୋଡନ ସୃଷ୍ଟି କରିଥିଲା । ଏହି ଚର୍ଚ୍ଚିତ ମାମଲାର ତଦନ୍ତ ଭାର କ୍ରାଇମ୍ବ୍ରାଞ୍ଚ୍ ନେଇଥିଲା । ସେହି ସମୟରେ ତଦନ୍ତକାରୀ ଟିମ୍ ଗୋପାଳର ମୋବାଇଲ୍ କଲ୍ ରେକର୍ଡ ମଧ୍ୟ ଯାଞ୍ଚ୍ କରିଥିଲା । ତେବେ ସେତେବେଳେ ପ୍ରାୟ ମାସେରୁ ୨ ମାସ ପୂର୍ବର କଲ୍ ରେକର୍ଡ ଯାଞ୍ଚ ହୋଇଥିଲା । ସେହି ସମୟର କଲ୍ ରେକର୍ଡରେ ସେଭଳି କିଛି ସନ୍ଦିଗ୍ଧ ବିଷୟ ତଦନ୍ତକାରୀ ଟିମ୍ ନଜରକୁ ଆସିନଥିଲା । ତେଣୁ ହତ୍ୟାକାଣ୍ଡ ପଛର ପ୍ରକୃତ କାରଣ ଜାଣିବା ପାଇଁ ଗୋପାଳର ନାର୍କୋ ଆନାଲିସିସ୍ ଟେଷ୍ଟ ମଧ୍ୟ କରାଯାଇଥିଲା । ରାଜ୍ୟରେ ସରକାର ବଦଳିବା ପରେ ବର୍ତ୍ତମାନ ହତ୍ୟାକାଣ୍ଡର ପୁନଃତଦନ୍ତ ଆରମ୍ଭ ହୋଇଛି । ବର୍ତ୍ତମାନ ପର୍ଯ୍ୟନ୍ତ ତଦନ୍ତରେ କୌଣସି ଠୋସ୍ ତଥ୍ୟ ତଦନ୍ତକାରୀ ଟିମ୍ ହାତକୁ ଆସିନାହିଁ ।
ଗୁରୁତ୍ୱପୂର୍ଣ୍ଣ କଥା ହେଉଛି, ମୃତ ନବ ଦାସଙ୍କ ପରିବାର ପକ୍ଷରୁ ନିର୍ଦ୍ଦିଷ୍ଟ ଭାବେ କାହାର ନାଁ ସାମ୍ନାକୁ ଅଣାଯିବ ବୋଲି ଅନୁମାନ କରାଯାଉଥିଲା । ଏପରିକି ତଦନ୍ତରେ କୌଣସି ଏକ ବଡ଼ ସୁରାକ ମିଳିବ ବୋଲି ଅନୁମାନ ଥିଲା । ହେଲେ ସେଭଳି କିଛି ତଦନ୍ତକାରୀ ଟିମ୍କୁ ତଥ୍ୟ ମିଳିଲାନି ବୋଲି କ୍ରାଇମବ୍ରାଞ୍ଚ ସୂତ୍ର କହୁଛି । ତଦନ୍ତକାରୀ ଟିମ୍ ହତ୍ୟାକାଣ୍ଡ ସ୍ଥଳରେ ଆଉଥରେ ଯାଞ୍ଚ କରିବା, ଅଭିଯୋଗକାରୀ ଓ ଅନ୍ୟ କିଛି ସାକ୍ଷୀଙ୍କ ସହିତ କଥା ହେବା ପରେ ମଧ୍ୟ ନୂଆ କଥା କିଛି ସାମ୍ନାକୁ ଆସିପାରିନାହିଁ । ତେଣୁ ଗୋପାଳ ସମ୍ପର୍କୀତ ଟିକିନିକି ତଥ୍ୟ ଏବେ ଯୋଗାଡ଼ ଚାଲିଛି । ବିଶେଷ କରି ହତ୍ୟାକାଣ୍ଡ ପୂର୍ବର ପ୍ରାୟ ୬ମାସର କଲ୍ ରେଡର୍କ ଯାଞ୍ଚ ହେଉଛି । କିଛି କଲ୍ ରେକର୍ଡ ପୂର୍ବରୁ କ୍ରାଇମବ୍ରାଞ୍ଚ ପାଖରେ ଥିଲା । ଆଉ କିଛି ରେକର୍ଡ ଅଣାଯାଉଛି । କଲ୍ର ପ୍ରତ୍ୟକଟି ନମ୍ବରକୁ ଅନୁଧ୍ୟାନ କରାଯାଉଛି । ସେହିପରି ଗୋପାଳର ସହକର୍ମୀ, ତାର ପରିବାର ଲୋକ ଓ ଅତି ଘନିଷ୍ଠ ସମ୍ପର୍କୀୟଙ୍କ ତଥ୍ୟ ସଂଗ୍ରହ ହେଉଛି । ଏଥିପାଇଁ କିଛି ସମୟ ଲାଗିବ ବୋଲି କ୍ରାଇମବ୍ରାଞ୍ଚର ଜଣେ ବରିଷ୍ଠ ଅଧିକାରୀ କହିଛନ୍ତି ।
ସୂଚନାଯୋଗ୍ୟ, ସରକାର ବଦଳିବା ପରେ ନବ ଦାସ ହତ୍ୟା ମାମଲାକୁ ନେଇ ଅଧିକ ଚର୍ଚ୍ଚା ଆରମ୍ଭ ହୋଇଛି । ଏହି ଘଟଣାର ସିବିଆଇ ତଦନ୍ତ ପାଇଁ ତାଙ୍କ ଝିଅ ତଥା ପୂର୍ବତନ ବିଧାୟିକା ଦୀପାଳି ଦାସ ଦାବି କରିଥିଲେ । ଏପରିକି ପରେ ନବ ଦାସଙ୍କ ପତ୍ନୀ, ଝିଅ ଓ ପୁଅ ମୁଖ୍ୟମନ୍ତ୍ରୀଙ୍କୁ ଭେଟି ଏ ବିଷୟରେ କଥା ହୋଇଥିଲେ । ମାମଲାର ଗୁରୁତ୍ୱ ଦୃଷ୍ଟିରୁ କ୍ରାଇମବ୍ରାଞ୍ଚ ପୁନଃତଦନ୍ତ ଚଳାଇଛି ଓ ନବଙ୍କ ଘରକୁ ଯାଇ ତଦନ୍ତକାରୀ ଟିମ୍ ପରିବାର ଲୋକଙ୍କ ସହ ଦୀର୍ଘ ସମୟ ଆଲୋଚନା କରିଛି ।
