ଭୁବନେଶ୍ୱର, ୨୪/୦୭ : କେନ୍ଦ୍ରୀୟ ଟିକସରେ ଭାଗ ବାବଦରେ ଓଡ଼ିଶା ୫୬ ହଜାର ୪୭୪ କୋଟି ଟଙ୍କା ପାଇବ । କେନ୍ଦ୍ରୀୟ ଅନୁଦାନରେ ମୋଟ ୩୪ ହଜାର କୋଟି ଟଙ୍କା ମିଳିପାରେ । ଚଳିତ ଆର୍ଥିକ ବର୍ଷ ତୁଳନାରେ କେନ୍ଦ୍ରୀୟ ଟିକସ ଭାଗ ଓ କେନ୍ଦ୍ରୀୟ ଅନୁଦାନ ବାବଦରେ ପାଖାପାଖି ୧୧ ହଜାର କୋଟି ଟଙ୍କା ଅଧିକ ମିଳିବ ଓଡ଼ିଶାକୁ ୨୦୨୪- ୨୫ ଆର୍ଥିକ ବର୍ଷ ପାଇଁ । ଏଭଳି ସୂଚନା ମିଳିଛି କେନ୍ଦ୍ର ବଜେଟ୍ ପ୍ରସ୍ତାବରୁ ।
ଏହାଛଡ଼ା ପୂର୍ବୋଦୟ ଯୋଜନାରେ ରାଜ୍ୟର ଭିତ୍ତିଭୂମି, ମାନବ ସମ୍ବଳ ବିକାଶକୁ ପ୍ରାଥମିକତା ଦେବା ସହ ଅର୍ଥନୈତିକ ସୁଯୋଗ ସୃଷ୍ଟି ଉପରେ ସ୍ୱତନ୍ତ୍ର ଗୁରୁତ୍ୱ ଦିଆଯିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି । ଓଡ଼ିଶା ସମେତ ପୂର୍ବ ଭାରତର ରାଜ୍ୟଗୁଡ଼ିକ ଯେମିତି ବିକଶିତ ଭାରତର ଇଂଜିନ ସାଜିବ ସେଥିପାଇଁ ସ୍ୱତନ୍ତ୍ର ଯୋଜନା ତିଆରି କରିବ କେନ୍ଦ୍ର । ଏହାଛଡ଼ା ପର୍ଯ୍ୟଟନ କ୍ଷେତ୍ରର ବିକାଶ ପାଇଁ କେନ୍ଦ୍ର ସରକାର ଆର୍ଥିକ ସହାୟତା ଯୋଗାଇ ଦେବେ ବୋଲି କେନ୍ଦ୍ରୀୟ ବଜେଟ ପ୍ରସ୍ତାବରେ କୁହାଯାଇଛି । ଅର୍ଥମନ୍ତ୍ରୀ କହିଥିଲେ, ଓଡ଼ିଶାର ମନ୍ଦିର, କଳା ଓ ସ୍ଥାପତ୍ୟ, ଅଭୟାରଣ୍ୟ ଓ ସ୍ୱଚ୍ଛ ବେଳାଭୂମିର ବିକାଶ ପାଇଁ ସହାୟତା ଯୋଗାଇ ଦିଆଯିବ । ଟିକସ ଭାଗ ବାବଦରେ ରାଜ୍ୟଗୁଡ଼ିକୁ କେନ୍ଦ୍ର ସରକାର ମୋଟ ୧୨ ଲକ୍ଷ ୪୭ ହଜାର ୨୧୧ କୋଟି ଟଙ୍କା ଦେବେ ।
ପଞ୍ଚଦଶ ଅର୍ଥ କମିସନଙ୍କ ସୁପାରିଶ ଅନୁସାରେ ଓଡ଼ିଶା ଭାଗ ହେଉଛି ୪.୫୨୮ ପ୍ରତିଶତ । ଏହି ହାରରେ ଓଡ଼ିଶା ୫୬ ହଜାର ୪୭୪ କୋଟି ଟଙ୍କା ପାଇବ ୨୦୨୪-୨୫ରେ । ୨୦୨୩-୨୪ରେ ବଜେଟ ଅଟକଳରେ ଟିକସ ଭାଗ ଥିଲା ୪୬ ହଜାର ୨୫୧ କୋଟି ଟଙ୍କା । ଏ ବର୍ଷ ୧୦ ହଜାର ୨୨୩ କୋଟି ଟଙ୍କା ଅଧିକ ମିଳିବ ଏ ବାବଦରେ । କିନ୍ତୁ ବଜେଟ୍ ପ୍ରସ୍ତାବଠୁ ଅଧିକ ପାଇଛି ଓଡ଼ିଶା । କେନ୍ଦ୍ର ଟିକସ ଆୟ ଆକଳନଠୁ ଅଧିକ ହେବାରୁ ରାଜ୍ୟ ୫୦ ହଜାର ୧୧ କୋଟି ଟଙ୍କା ପାଇଥିଲା ବୋଲି ସଂଶୋଧିତ ବଜେଟ୍ ପ୍ରସ୍ତାବରୁ ସ୍ପଷ୍ଟ ହେଉଛି । ଏଣୁ କେନ୍ଦ୍ରୀୟ ଟିକସ ଭାଗ ବାବଦରେ ଗତ ବର୍ଷ ତୁଳନାରେ ୬ ହଜାର ୨୦୦ କୋଟି ଅଧିକ ମିଳିବ ରାଜ୍ୟକୁ ।
କେନ୍ଦ୍ରୀୟ ପ୍ରବର୍ତ୍ତିତ ଯୋଜନା ଓ କେନ୍ଦ୍ରୀୟ ଯୋଜନାରେ ଅନୁଦାନ (ଗ୍ରାଣ୍ଟ୍ ଇନ୍ ଏଡ୍) ବାବଦରେ କେନ୍ଦ୍ର ସରକାର ଆଗାମୀ ଆର୍ଥିକ ବର୍ଷ ମୋଟ ୩୪ ହଜାର କୋଟି ଟଙ୍କା ଦେବାର ଆଶା ରହିଛି । ଚଳିତ ଆର୍ଥିକ ବର୍ଷ (୨୦୨୩-୨୪) ଏ ବାବଦରେ ମୋଟ ୩୨ ହଜାର ୭୮୮ କୋଟି ଟଙ୍କା ପାଇବେ ବୋଲି ବଜେଟ୍ ଅଟକଳ ହୋଇଥିଲା, କିନ୍ତୁ ମିଳିଲା ୨୮ ହଜାର ୯୮୮ କୋଟି ଟଙ୍କା । ଏଣୁ ଏ ବାବଦରେ ପାଖାପାଖି ୫ ହଜାର କୋଟି ଅଧିକ ପାଇବ ଓଡ଼ିଶା ।