ଭୁବନେଶ୍ୱର, ୬।୧୨: କ୍ରୁଟ ପକ୍ଷରୁ ମୋ ବସ୍‌ ଏକ୍ସପ୍ରେସ ସର୍ଭିସ ଆରମ୍ଭ ହୋଇଛି । ବିଜୁ ପଟ୍ଟନାୟକ ଅର୍ନ୍ତଜାତୀୟ ବିମାନ ବନ୍ଦରରୁ ପୁରୀ ଜଗନ୍ନାଥ ଧାମ ଏବଂ ସିଲଭର ସିଟି କଟକକୁ ଏହି ମୋ ବସ୍‌ ଗଡ଼ିବ । ଫଳରେ ପର୍ଯ୍ୟଟନ କ୍ଷେତ୍ରରେ ନୂଆ ସମ୍ଭାବନା ସୃଷ୍ଟି ହେବ । ଏୟାରପୋର୍ଟରୁ ଗମନାଗମନରେ ଅସୁବିଧା ଉପୁଜୁଥିଲା । ରାଜ୍ୟ ବାହାରୁ ଆସୁଥିବା ଯାତ୍ରୀ ଅସୁବିଧାର ସମ୍ମୁଖୀନ ହେଉଥିଲେ । ଏପରି କି ଅଟୋ ଏବଂ ଘରୋଇ ଗାଡ଼ି ଚଢ଼ା ଦର ନେଉଥିଲେ । ଯାତ୍ରୀଙ୍କ ସେବାକୁ ଦୃଷ୍ଟିରେ ରଖି ଏହି ଏକ୍ସପ୍ରେସ ସର୍ଭିସକୁ ଆରମ୍ଭ କରାଯାଇଛି । ଏହା ଏୟାରପୋର୍ଟରୁ ବାହାରି ସିଧା ଗନ୍ତବ୍ୟସ୍ଥଳରେ ପହଞ୍ଚିବ । 

 ଏହି ବସ୍‌ ଏୟାରପୋର୍ଟରୁ ସକାଳ ୮ଟା, ୧୨.୧୫, ସନ୍ଧ୍ୟା ୬ଟାରେ ପୁରୀ ଅଭିମୁଖେ ବାହାରିବ । ସେଠୁ ସକାଳ ୯.୪୦, ଅପରାହ୍ନ ୨.୨୦ ଏବଂ ସନ୍ଧ୍ୟା ୭.୪୦ରେ ବାହାରି ଏୟାରପୋର୍ଟରେ ପହଞ୍ଚିବ । ସେହିପରି ଏୟାରପୋର୍ଟରୁ କଟକ ଅଭିମୁଖେ ସକାଳ ୯ଟା, ୨ଟା ଏବଂ ସନ୍ଧ୍ୟା ୬.୩୦ରେ ବାହାରିବ ।  କ୍ରୁଟ ୪୪ ତମ ବୋର୍ଡ ବୈଠକ ନିଷ୍ପତ୍ତି ଅନୁସାରେ କେନ୍ଦୁଝରରେ ମୋ ବସ୍‌ ସେବା ଆରମ୍ଭ ହେବ । ଖଣିବହୁଳ ଏହି ଅଞ୍ଚଳରେ ଲୋକେ ମୋ ବସ୍‌ ସେବା ପାଇବେ । ସେହିପରି ଆଉ ନୂଆ ୨୦୦ ଇ-ବସ୍‌ ଆସିବ । ଭୁବନେଶ୍ୱର କଟକ ଓ ରାଉରକେଲା ପାଇଁ ୧୦୦, ବ୍ରହ୍ମପୁର ପାଇଁ ୫୦ ବସ୍‌ ରଖାଯିବ । ଏଥିପାଇଁ ବିଭିନ୍ନ ସ୍ଥାନରେ ଚାର୍ଜିଂ ଷ୍ଟେସନ ନିର୍ମାଣ କରିବାକୁ ଯୋଜନା ହୋଇଛି ।