ନୂଆଦିଲ୍ଲୀ : ଏନଡିଏ ସଂସଦୀୟ ଦଳର ନେତା ଚୟନ ପରେ ପ୍ରଧାନମନ୍ତ୍ରୀ ମୋଦି ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀ ଓ ମୁରଲୀ ମନୋହର ଯୋଶୀଙ୍କୁ ସାକ୍ଷାତ କରିଥିଲେ। ନରେନ୍ଦ୍ର ମୋଦି ରବିବାର ଲଗାତାର ୩ୟ ଥର ଦେଶର ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି।ଲୋକସଭା ନିର୍ବାଚନରେ ବିଜେପିକୁ ଗତ ଏକ ଦଶକ ମଧ୍ୟରେ ପ୍ରଥମ ଥର ବହୁମତ ମିଳିନାହିଁ ଏବଂ ଜେଡିୟୁ-ଟିଡିପି ଭଳି ସହଯୋଗୀ ଦଳର ସାହାଯ୍ୟରେ ଏନଡିଏ ଲଗାତାର ୩ୟ ଥର ସରକାର ଗଠନ ହେବାକୁ ଯାଉଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ,ସର୍ବ ପ୍ରଥମେ ଆଡଭାନୀଙ୍କ ଘରେ ପହଞ୍ଚି ତାଙ୍କୁ ସାକ୍ଷାତ କରିଥିଲେ। ଏହା ପରେ  ବିଜେପିର ଆଉ ଜଣେ ବରିଷ୍ଠ ନେତା ମୁରଲୀ ମନୋହର ଯୋଶୀଙ୍କ ଘରେ ପହଞ୍ଚ ମୋଦି ତାଙ୍କର ଆଶିର୍ବାଦ ନେଇଥିଲେ। ସେପଟେ ଏନଡିଏ ରାଷ୍ଟ୍ରପତି ଦୌପଦୀ ମୁର୍ମୁଙ୍କୁ ସାକ୍ଷାତ କରି ୩ୟ ଥର ସରକାର ଗଠନ ହେବାର ଦାବି ଉପସ୍ଥାପିତ କରିଥିଲେ। ଏନଡିଏ ନେତାମାନେ ରାଷ୍ଟ୍ରପତିଙ୍କୁ ସମର୍ଥନର ଚିଠି ପ୍ରଦାନ କରିଛନ୍ତି। ୯ଜୁନ୍‌ ସନ୍ଧ୍ୟା ୬ଟାରେ ଶପଥ ଗ୍ରହଣ ସମାରୋହ ଆୟୋଜନ କରାଯିବ।

ସଂସଦଭବନର ପୁରୁଣା ବିଲ୍ଡିଂରେ ଥିବା ସମ୍ୱିଧାନ ଗୃହରେ ଶୁକ୍ରବାର ଏନଡିଏର ବୈଠକ ଆରମ୍ଭ ହୋଇଛି। ଏହି ବୈଠକରେ ବିଜେପିର ସବୁ ସହଯୋଗୀ ଦଳର ନେତା ସାମିଲ ହୋଇଛନ୍ତି। ଏନଡିଏ ସଂସଦୀୟ ଦଳର ବୈଠକ ଆରମ୍ଭ ହେବା ପରେ ବିଜେପିର ବରିଷ୍ଠ ନେତା ରାଜନାଥ ସିଂହ ନରେନ୍ଦ୍ର ମୋଦିଙ୍କୁ ସଂସଦୀୟ ଦଳର ନେତା ଚୟନ କରିବାର ପ୍ରସ୍ତାବ ରଖିଥିଲେ ଏବଂ ଏହାକୁ ସବୁ ଦଳ ଅନୁମୋଦନ କରି ଥିଲେ। ସାଉଣ୍ଡ ଓପିନିୟନ ଦ୍ୱାରା ନରେନ୍ଦ୍ର ମୋଦିଙ୍କୁ ଏନଡିଏ ସଂସଦୀୟ ଦଳର ନେତା ଭାବେ ଚୟନ କରାଯାଇ ଥିଲା।