ମାଲକାନଗିରି, ୩୦/୯(ଆପ୍ର ) : ଜିଲ୍ଲାଭିତ୍ତିକ ନିଯୁକ୍ତି ଦାବି କରି ୪ ତାରିଖରେ ଜିଲ୍ଲା ବନ୍ଦ ଡାକରା ଦେଇଛନ୍ତି ସ୍ଥାନୀୟ ଶିକ୍ଷିତ ଯୁବଗୋଷ୍ଠୀ । ଏହାକୁ ସମର୍ଥନ ଜଣାଇଛନ୍ତି ଅନୁସୂଚିତଜାତି /ଜନଜାତି ସଂଘ ମିଳିତ କ୍ରିୟାନୁଷ୍ଠାନ କମିଟି। ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ଏକ ସ୍ମାରକ ପତ୍ର ଦେଇଛନ୍ତି ମିଳିତ କ୍ରିୟାନୁଷ୍ଠାନ କମିଟି।

ମାଲକାନଗିରି ସଦର ସ୍ଥିତ ବୁଟିଗୁଡା ପ୍ରାଇମେରୀ ସ୍କୁଲରେ ଚୟନ କରାଯାଇଥିବା କନିଷ୍ଠ ଶିକ୍ଷକ ଶିକ୍ଷୟିତ୍ରୀ ପାଇଁ ଚୁକ୍ତିନାମା ସ୍ବାକ୍ଷର କରାଯାଉଥିଲା। ଏଥିପାଇଁ  ରାଜ୍ୟର ବିଭିନ୍ନ ଜିଲ୍ଲାରୁ ଯୁବକ ଯୁବତୀ ଆସିଥିଲେ। ଏ ଖବର ପାଇ ଜିଲ୍ଲାର ଅନେକ ଲୋକ ପ୍ରତିନିଧି, ବୁଦ୍ଧିଜୀବୀ ଓ ଶତାଧିକ ଲୋକ ସେ ସ୍ଥାନକୁ ଯାଇ ବାହାର ଜିଲ୍ଲାରୁ ଆସିଥିବା ପିଲାଙ୍କୁ ନିଯୁକ୍ତି ଦେବାକୁ ବିରୋଧ କରିଥିଲେ। ଆଜି ସନ୍ଧ୍ୟାରେ ମାଲକାନଗିରି ଜିଲ୍ଲା ଏସସି/ଏସଟି ସଂଘ ମିଳିତ କ୍ରିୟାନୁଷ୍ଠାନ କମିଟିର କର୍ମକର୍ତ୍ତାମାନେ ଜିଲ୍ଳାପାଳ ଆଶିଷ ଈଶ୍ୱର ପାଟିଲଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଥିଲେ। 

ଉପାନ୍ତ ଆଦିବାସୀ ଅଧ୍ୟୁଷିତ ଅଂଚଳ ମାଲକାନଗିରି ଜିଲ୍ଲାର ଅଧିକାଂଶ ପିଲାମାନେ ଅଗ୍ରଣୀ ଜିଲ୍ଲାର ପିଲାମାନଙ୍କୁ ଶିକ୍ଷା କ୍ଷେତ୍ରରେ ଟକ୍କର ଦେବା ସମ୍ଭବପର ନୁହଁ। ତୃତୀୟ ଓ ଚତୁର୍ଥ ଶ୍ରେଣୀ ଚାକିରି ନିଯୁକ୍ତିରେ ରାଜ୍ୟଭିତ୍ତିକ ନକରି ଜିଲ୍ଳା ଭିତ୍ତିକ କରିବା ମୁଖ୍ୟ ଦାବିଥିଲା। ଦାବି ପୂରଣ ନହେଲେ ଚାରି ଅକ୍ଟୋବର ଅବିଭକ୍ତ କୋରାପୁଟ ଜିଲ୍ଲା ବନ୍ଦ ଡାକରାକୁ ମିଳିତ କ୍ରିୟାନୁଷ୍ଠାନ କମିଟି ସମର୍ଥନ କରିବ ବୋଲି ନିଷ୍ପତ୍ତି ନେଇଛି। ଦାବିପତ୍ର ପ୍ରଦାନ ସମୟରେ କ୍ରିୟାନୁଷ୍ଠାନ କମିଟିର ମୁଖ୍ୟ ଉପଦେଷ୍ଟା ପ୍ରଭାକର ହନ୍ତାଳ, ସଭାପତି ଜାରାଶବର ମାଡି, କାର୍ଯ୍ୟକାରୀ ସଭାପତି ସୋନୁ ଅନୁଗୁ, ସଂଯୋଜକ ଡମ୍ବରୁ ବାଘ, ସାଧାରଣ ସମ୍ପାଦକ ହରି ଗୋଲୋରୀ, ଉପ ସଭାପତି ଘେନୁ ମୁଦୁଲି ଓ ସନିଆ କବାସୀ, ଲଳିତ ନାରାୟଣ ମାଡକାମି ପ୍ରମୁଖ ଉପସ୍ଥିତ ଥିଲେ।