ମାଲକାନଗିରି/ମାଥିଲି,୩/୧୦ (ଆପ୍ର ): ପୋଖରୀରେ ଗାଧୋଉଥିବା ସମୟରେ କାଦୁଅରେ ଗୋଡ ଖସି ପାଣିରେ ବୁଡି ଜଣେ ଜଣେ ଯୁବତୀଙ୍କ ମୃତ୍ୟୁ ଘଟିଛି। ଏପରି ଅଭାବନୀୟ ଘଟଣା ଘଟିଛି ମାଲକାନଗିରି ଜିଲ୍ଲାରେ ମାଥିଲି ବ୍ଲକ ଦଳପତିଗୁଡା ପଞ୍ଚାୟତ ଓଡ଼ିଆ ଗୁଡା ଗ୍ରାମରେ।
ସେହି ଗ୍ରାମର ପ୍ରମିଳା ଓଡ଼ି(୩୨) ଆଜି ସକାଳେ ନିଜ ଘର ପଛ ପଟରେ ଥିବା ଏକ ପୋଖରୀରେ ଗାଧୋଉଥିବା ସମୟରେ ନିଜର ଗୋଡ଼ କାଦୁଅରେ ଖସିଯିବାରୁ ପୋଖରୀରେ ପଡି ଯାଇଥିଲେ । ସ୍ଥାନୀୟ ଲୋକେ ଜାଣିବା ପରେ ସଙ୍ଗେ ସଙ୍ଗେ ଅଗ୍ନିଶମ ବିଭାଗକୁ ଜଣାଇଥିଲେ। ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ପୋଖରୀରୁ ପ୍ରମିଳାଙ୍କୁ ଉଦ୍ଧାର କରି ମାଥିଲି ଉପଖଣ୍ଡ ଚିକିତ୍ସାଳୟକୁ ନେଇଥିଲେ । ଚିକିତ୍ସାଳୟରେ ପହଁଚିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରିବାର ଲୋକେ ମାଥିଲି ଥାନାରେ ଏକ ଲିଖିତ ଅଭିଯୋଗ ପରେ ଥାନା ଅଧିକାରୀ ଦେବଦତ୍ତ ମଲ୍ଲିକ ସଙ୍ଗେ ସଙ୍ଗେ ପୋଲିସ ଟିମ ଚିକିତ୍ସାଳୟକୁ ପଠାଇଥିଲେ । ମାଥିଲି ପୋଲିସ ପହଞ୍ଚି ମୃତଦେହ ଜବତ କରିବା ସହିତ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ହସ୍ପିଟାଲକୁ ପଠାଇ ତଦନ୍ତ ଆରମ୍ଭ କରିଛନ୍ତି ।
