ମାଲକାନଗିରି,୧୯/୧୨ :  ବଙ୍ଗୋପସାଗରରେ ଲଘୁଚାପ ପ୍ରଭାବରେ ଆଜି ଦିନ ତମାମ ମାଲକାନଗିରି ଜିଲ୍ଲାରେ ପାଗ କୋହଲା ରହିଛି। ସନ୍ଧ୍ୟାରୁ ଝିପିଝିପି ବର୍ଷା ଆରମ୍ଭ ହୋଇଯାଇଛି। ଏବେ ବି ଜିଲ୍ଲା ରେ ଅନେକ ଖାଲୁଆ ଜମିରେ କଟା ହୋଇପଡି ରହିଥିବା ଧାନ ବର୍ଷା ପାଣିରେ ଭିଜିବାର ସମ୍ବାବନା ରହିଛି, ଖଳା ଓ ମଣ୍ଡି ରେ ପଡ଼ିଥିବା ଧାନ ଓଦା  ହେବାର ଆଶଙ୍କା ଥିବାରୁ ଭିଜା ଧାନ କିପରି ମଣ୍ଡି ରେ ବିକ୍ରୀ କରିବେ ସେ ନେଇ ଚାଷୀ ମାନେ ଚିନ୍ତାରେ ପଡିଯାଇଛନ୍ତି।କାରଣ  ବର୍ଷାରେ ଧାନ ଭିଜିବା ଦ୍ୱାରା ଧାନର ଆଦ୍ରତା ବଢ଼ିଯିବ।  ଏଫଏକ୍ୟୁ ଧାନ  ନ ହେବାରୁ ମଣ୍ଡିରେ ବିକ୍ରୀ କରିବା କଷ୍ଟକର ହୋଇ ପଡିବା ଭୟ ଘାରିଛି ଚାଷୀ ମାନଙ୍କୁ।

ସରକାର ଧାନ କିଣାରେ ସ୍ଵଚ୍ଛତା ରକ୍ଷା କରିବାକୁ ଅନେକ ନିୟମ କରିଛନ୍ତି ।  କିନ୍ତୁ ଚାଷୀଙ୍କ ପାଇଁ ଏହି ନିୟମ ବର୍ତ୍ତମାନ ସମସ୍ୟା ସୃଷ୍ଟି କରିଛି। କେତେ ଦିନ ଧରି ଧାନକୁ ଖଳାରେ ଶୁଖାଇବୁ, ବର୍ଷା ଦାଉ ସାଜିଛି,ଧାନ ଚୋରି ସହ ଗାଈଗୋରୁ ପଶିବାର ସମ୍ଭାବନା ରହିଛି।  । ସରକାର କରିଥିବା ନିୟମକୁ ଦେଖିଲେ ଗୋଟିଏ ଦିନରେ ମାତ୍ର ୨ରୁ ୩ଜଣ ଚାଷୀ ଧାନ ବିକ୍ରି କରିପାରିବେ ।  ମାଲକାନଗିରି ଜିଲ୍ଲା ରେ ଅଧିକାଂଶ ସମୟ ରେ ଲିଙ୍କ୍ ଫେଲ୍ ସମ୍ଭାବନା ରହୁଥିବାରୁ ମଣ୍ଡି କୁ ଗଲେ ସୁଦ୍ଧା ଧାନ ବିକ୍ରି ହୋଇପାରି ନାହିଁ। ମେଘୁଆ ପାଗ ଦେଖି ଚାଷୀ ପ୍ରମାଦ ଗଣିବା ଆରମ୍ଭ କରିଦେଇଛନ୍ତି। ଏମିତି ସ୍ଥିତିରେ ପୁରୁଣା ନିୟମ ଅନୁସାରେ ଧାନ ଉଠାଇବା ପାଇଁ ଚାଷୀ ଦାବି କରିଛନ୍ତି I  

ବର୍ଷା ସମ୍ଭାବନାକୁ ଆଖି ଆଗରେ ରଖି ମଣ୍ଡି ଗୁଡିକରେ ନିୟନ୍ତ୍ରିତ ବଜାର କମିଟି ପକ୍ଷରୁ ଚାଷୀଙ୍କ ଧାନ ଘୋଡାଇ ରଖିବା ପାଇଁ ତାର୍ପଲିନ ଓ ପାଲ ବ୍ୟବସ୍ଥା କରାଯାଇଛି।ଜିଲ୍ଲା ରେ ୧୬ତାରିଖ ଠାରୁ ମଣ୍ଡି ଆରମ୍ଭ ହୋଇଛି। ଜିଲ୍ଲା ରେ ୨୭ ମିଲର ଯୋଗାଣ ବିଭାଗ ସହ ଚୁକ୍ତି କରି ମଣ୍ଡିରୁ ଧାନ ଉଠାଇବା ଆରମ୍ଭ କରିଦେଇଛନ୍ତି, ଇତି ମଧ୍ୟରେ ୭୭୧୨କୁଇଣ୍ଟାଲ ଧାନ ମଣ୍ଡି ରେ ଚାଷୀ ଙ୍କ ଠାରୁ କ୍ରୟ କରାଯାଇଛି। ୧୭୦୦କୁଇଣ୍ଟାଲ ଧାନ ମଣ୍ଡିରୁ ମିଲର ମାନେ ଉଠାଇସାରି ଥିବା ସୂଚନା ଦେଇଛନ୍ତି ଜିଲ୍ଲା ଯୋଗାଣ ଅଧିକାରୀ ଶ୍ରୀ ଏମ.ଏମ.ପଟନାୟକ।