ମାଲକାନଗିରି,୩/୧୦ :  ଜମି ଜଳ ଜଙ୍ଗଲ ବଞ୍ଚିବାର ଅଧିକାର ଦାବି ନେଇ ଦୀର୍ଘ ୧୭ଦିନ ହେବ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି ଆଦିବାସୀ ସମାଜ ମହାସଂଘ ମିଳିତ କ୍ରିୟାନୁଷ୍ଠାନ କମିଟିର ଶତାଧିକ ଆଦିବାସୀ । ଜିଲ୍ଲା ଆଦିବାସୀ ସମାଜ ମହାସଂଘ, ସରପଞ୍ଚ ସଂଘ ଓ ଆଦିବାସୀ ନେତାଙ୍କ ଜିଲ୍ଲାପାଳଙ୍କ ଅଫିସ ସମ୍ମୁଖରେ ଗଣ ଧାରଣା ଆଜି ୧୭ଦିନରେ ପହଁଚିଛି ।

ବିଭିନ୍ନ ଦାବି ନେଇ ମାଲକାନଗିରି ଜିଲ୍ଲା ଆଦିବାସୀ ସମାଜ ମହାସଂଘର ସଭାପତି ବନ୍ଧୁ ମୁଦୁଲିଙ୍କ ନେତୃତ୍ୱରେ ବୁଦୁରା କର୍ତ୍ତମୀ, ଦେବେନ୍ଦ୍ର ଖିଲ, ଲଛମନ ମାଡକାମି, ଲଳିତ ନାରାୟଣ ମାଡକାମି, ଈଶ୍ୱର ମାଡକାମି ପ୍ରମୁଖ ଆଦିବାସୀ ନେତା ଓ ଆଦିବାସୀ ଗ୍ରାମବାସୀମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରେ ସରପଞ୍ଚ ସଂଘ ଓ ଆଦିବାସୀ ନେତାମାନେ ଗତ ୧୬ତାରିଖ ଠାରୁ ଗଣ ଧାରଣା ଦେଇଛନ୍ତି । ସେମାନଙ୍କ ଦାବି ଗୁଡିକ ମଧ୍ୟରେ ମୁଖ୍ୟତଃ ଓଡ଼ିଶା ସରକାରଙ୍କ ବସୁନ୍ଧରା ଯୋଜନାକୁ ସ୍ଥଗିତ ରଖାଯାଇ, ପେଶା ଆଇନ-୧୯୯୬କୁ ଲାଗୁ କରି ବସୁନ୍ଧରା ଯୋଜନାକୁ କାର୍ଯ୍ୟକାରୀ କରାଯାଉ। 

ମାଲକାନଗିରି ଜିଲ୍ଲାରେ ଥିବା ସିମାନ୍ତ ବାସୀ ପ୍ରଭାବିତ ନ ହେବା ପାଇଁ ପୋଲାଭରମ ପ୍ରକଳ୍ପର ସୀମିତତା ଯଥା ଶିଘ୍ର ନିର୍ଦ୍ଧାରଣ କରାଯାଉ। ଚିତ୍ରକୋଣ୍ଡା ଜଳ ଭଣ୍ଡାର ନିର୍ମାଣ ଦ୍ବାରା ବିସ୍ତାପିତ ହୋଇଥିବା ଆଦିବାସୀଙ୍କୁ ଚିହ୍ନଟ କରି ଯଥା ଶିଘ୍ର ଥଇଥାନର ବ୍ୟବସ୍ଥା କରଯାଉ। ଜଙ୍ଗଲ ଅଧିକାର ଆଇନ-୨୦୦୬ ଅନୁଯାୟୀ ମାଲକାନଗରି ଜିଲ୍ଲାର ସମସ୍ତ ଯୋଗ୍ୟ ହିତାଧିକାରୀଙ୍କୁ ବ୍ୟକ୍ତିଗତ ପଟ୍ଟା ଓ ପ୍ରତ୍ୟକ ଗ୍ରାମର ଗୋଷ୍ଠୀଗତ ପଟ୍ଟା ପ୍ରଦାନ କରାଯାଉ, ରାଜ୍ୟ ଭିତିକ ନିଯୁକ୍ତି ବନ୍ଦ କରି ଜିଲ୍ଲା ଭିତିକ ନିଯୁକ୍ତି ଦିଆଯାଉ,ଦାବୀରେ ଅନିର୍ଦିଷ୍ଟ କାଳ ପର୍ଯ୍ୟନ୍ତ ବିଶାଳ ଗଣ ଧାରଣା ଚାଲୁ ରଖାଜିବ ବୋଲି ଆଦିବାସୀ ମହାସଂଘ ସମାଜ ପକ୍ଷରୁ ସୂଚନା ଦିଆଯାଇଛି। ସହ ସହ ଆଦିବାସୀ ଲୋକେ ଏହି ଧାରଣାରେ ଯୋଗଦେଇ ନାରା ବାଜି କରୁଥିବା ଦେଖିବାକୁ ମିଳିଛି।