ମାଲକାନଗିରି, ୨।୧୦: ଜିଲ୍ଲା ପ୍ରତିଷ୍ଠାକୁ ୩୨ବର୍ଷ ପୂରିଲା । ଏବେ ବି ନାହିଁ ନାହିଁରେ ଚାଲିଛି ମାଲକାନଗିରି । ବହୁ ଗାଁକୁ ବିଜୁଳି, ସବୁଦିନିଆ ରାସ୍ତା, ପାନୀୟଜଳ ଅପହଞ୍ଚ ହୋଇରହିଛି । ଲୋକେ ପାହଡଜଙ୍ଗଲ ଘେରରେ ଅବହେଳିତ ହୋଇ ରହିଛନ୍ତି । ଜିଲ୍ଲାବାସୀଙ୍କ ପାଇଁ ରେଳ ସୁବିଧା ହୋଇପାରିନି । ଅବଶ୍ୟ କିଛିମାତ୍ରାରେ ଉନ୍ନତି ଘଟିଛି । ବିଚ୍ଛିନ୍ନାଞ୍ଚଳରେ ଗୁରୁପ୍ରିୟା ସେତୁ ହେବା ପରେ ସେହି ଅଞ୍ଚଳରେ ବିକାଶର ଧାରା ଆଗେଇଛି । ବିଏସଏଫ କ୍ୟାମ୍ପ ହେବା ପରେ ମାଓଗଡ଼ ଧ୍ୱଂସ ହେବା ସହ ରାସ୍ତାଘାଟ ନିର୍ମାଣ ହୋଇପାରିଛି । ତଥାପି ଅନେକ ପ୍ରସଙ୍ଗ ଏବେ ବି ପୂର୍ବବତ ରହିଛି । ଜିଲ୍ଲାବାସୀଙ୍କ ମୁଣ୍ଡପିଛା ଆୟ ବର୍ଷକୁ ୬୯ ହଜାର ରହିଥିବା ସର୍ଭେ ରିପୋର୍ଟ ତଥ୍ୟରୁ ଜଣାପଡ଼ିଛି । ସ୍ଥାନୀୟ ବୁଦ୍ଧିଜୀବୀଙ୍କ କହିବା ପ୍ରକାରେ, ଏଠାରେ ସ୍ୱାସ୍ଥ୍ୟ ସେବା ଏବେ ବି ଅପହଞ୍ଚ । ଆବଶ୍ୟକ ଡାକ୍ତର ଓ ସ୍ୱାସ୍ଥ୍ୟକର୍ମୀ ନଥିବାରୁ ଲୋକେ ଗୁଣିଆ ଦିଶାରି ଉପରେ ନିର୍ଭର କରୁଛନ୍ତି । ମାଓ ସମସ୍ୟା ଦୂର ହେବା ପରେ ଏହି ଜିଲ୍ଲା ଗଞ୍ଜେଇ ଚୋରା ଚାଲାଣ କରିଡର ପାଲଟିଛି । 

ଗତ ସରକାର ଜିଲ୍ଲାରେ ରେଳଲାଇନ୍‌ ହେବ ବୋଲି ଘୋଷଣା କରିବା ପରେ କେନ୍ଦ୍ର ବଜେଟରେ ବିଲ୍‌ ପାସ ହୋଇ ସର୍ଭେ ସରିଛି । ହେଲେ ତାହା ପୁଣିଥରେ ଦିବାସ୍ୱପ୍ନ ପାଲଟିଯାଇଛି । ଭୋଟ ପ୍ରଚାର ସମୟରେ ତରବରିଆ ଭାବେ ଏରୋଡ୍ରମ କରାଯାଇଥିଲା । ଏତେ ନିମ୍ନମାନର କରାଗଲା ଯେ, ବର୍ଷାରେ ଏହାର ପାଚେରୀ ଭୁଶୁଡି ପଡ଼ିଲା । ନିର୍ବାଚନ ସରିଗଲା ପରେ ବନ୍ଦହୋଇ ଏବେ ଗୋରୁଗାଈଙ୍କ ବାସସ୍ଥଳି ପାଲଟିଛି । ଜିଲ୍ଲାର ୩୦୦ରୁ ଅଧିକ ଗାଁକୁ ରାସ୍ତା ନାହିଁ କି ପୋଲ ନାହିଁ । ରୋଗୀଙ୍କ ପାଇଁ ଖଟିଆ ଭରସା ପାଲଟିଛି । ନଦୀଗୁଡ଼ିକରେ ଯାତାୟତ ପାଇଁ ଲୋକେ ବାଉଁଶରେ ପୋଲ ତିଆରି କରି ଯାଆସ କରୁଛନ୍ତି । ବାଲିମେଳା ଠାରେ ବୃହତ୍ତ ଜଳଭଣ୍ଡାର ଥିଲେ ମଧ୍ୟ ନିକଟବର୍ତ୍ତୀ ୬ଟି ପଞ୍ଚାୟତବାସୀଙ୍କ ପାଇଁ ପାନୀୟଜଳ ଓ ବିଦ୍ୟୁତ୍‌ ସେବା ଅପହଞ୍ଚ ହୋଇ ରହିଛି । ୧୯୬୪-୬୬ରେ ତିଆରି ହୋଇଥିବା ଚିତ୍ରକୋଣ୍ଡା ବାଲିମେଳା ଡ୍ୟାମ୍‌ର ବିସ୍ଥାପିତ ଲୋକ ଏବେ ବି ଜଳବନ୍ଦୀ ଜୀବନ ବିତାଉଛନ୍ତି । 

ଗାଜଲମାମୁଡ଼ି ପଞ୍ଚାୟତର ତୁମୁଳିମାମୁଡ଼ି, ରାଲେଗଡ଼ା ପଞ୍ଚାୟତର ଦାଗୁଡ଼ୁପାଲି, ଶୁଆପାଲି ଗାଁକୁ ରାସ୍ତା କି ବିଜୁଳି ନାହିଁ । ଚିତ୍ରକୋଣ୍ଡା ବ୍ଲକର ଅନେକ ଦୁର୍ଗମ ଗ୍ରାମବାସୀ ବିପଦପୂର୍ଣ୍ଣ ଭାବେ ଦେଶୀ ଡଙ୍ଗାରେ ଯିବାଆସିବା କରୁଛନ୍ତି । ମୋଟର ବୋଟ କିମ୍ବା ଲଞ୍ଚ ସେବା ମିଳିପାରୁନି । ଯେଉଁ କିଛିଟା ଚାଲିଛି ସୁରକ୍ଷା ବ୍ୟବସ୍ଥା ନଥିବାରୁ ଅନେକ ସମୟରେ ଜଳଯାତ୍ରା ବେଳେ ଦୁର୍ଘଟଣା ଘଟି ଲୋକଙ୍କ ଧନଜୀବନ ନଷ୍ଟ ହେଉଛି । ଜିଲ୍ଲାର ଅଧିକାଂଶ ଗାଁରେ ପାନୀୟଜ ସମସ୍ୟା ଉତ୍କଟ । ଚୁଆ, ଝରଣା ଓ ନାଳର ଅପରିଷ୍କାର ଜଳକୁ ଲୋକେ ସଂଗ୍ରହ କରି ନାନା ରୋଗରେ ପୀଡିତ ହେଉଛନ୍ତି । ୫ଶହରୁ ଅଧିକ ଗାଁରେ ବିଦ୍ୟୁତ ବ୍ୟବସ୍ଥା ନଥିବାରୁ ଲୋକେ ଅନ୍ଧାରରେ ରାତି ବିତାଉଛନ୍ତି । ଅନେକ ପିଲା ରାତିରେ ପାଠ ପଢିପାରୁ ନାହାନ୍ତି । ଡ୍ରପ୍‌ ଆଉଟ୍‌ ସଂଖ୍ୟା ଅନ୍ୟ ଜିଲ୍ଲା ଅପେକ୍ଷା ଏଠାରେ ବହୁତ ଅଧିକ । ଏସବୁ ପ୍ରସଙ୍ଗରେ ଜିଲ୍ଲା ପ୍ରଶାସନ ଦୃଷ୍ଟିଦେଇ ପଦକ୍ଷେପ ନେବାକୁ ବୁଦ୍ଧିଜୀବୀ ମହଲରେ ଦାବି ହୋଇଛି ।