ପଟ୍ଟାମୁଣ୍ଡାଇ,୨୧/୧୨: ରାତିର ଅନ୍ଧାରରେ ଚାଷ ଜମିରେ ବୁଲୁଥିଲା ବିଶାଳକାୟ ଅଜଗର । ଅଜଗରଟିକୁ ଉଦ୍ଧାର କଲା ରାଜନଗର ବନବିଭାଗର ଏକ ଟିମ୍ । ଅଜଗରର ମୁଣ୍ଡରେ ସାମାନ୍ୟ ଆଘାତ ଥିବା ବେଳେ ତାର ଲମ୍ୱ ୧୮.୫ ଫୁଟ ରହିଛି । ଚିକିତ୍ସା ପରେ ଅଜଗରକୁ ଭିତରକନିକା ଜାତୀୟ ଉଦ୍ୟାନରେ ମୁକ୍ତ ଛଡାଯିବ । କେନ୍ଦ୍ରାପଡ଼ା ଜିଲ୍ଲା ରାଜନଗର ରଗଡାପାଟିଆ ଫରେଷ୍ଟ ବ୍ଲକ ସଂଲଗ୍ନ ରାଜେନ୍ଦ୍ର ନାରାୟଣ ପୁର ଗାଁ ବାଇସିଘେରି ନିକଟସ୍ଥ ଚାଷ ଜମିରୁ ଅଜଗରକୁ ଉଦ୍ଧାର କରାଯାଇଛି ।
ସୂଚନା ମୁତାବକ, ଶୁକ୍ରବାର ରାତିରେ ଏକ ବିଶାଳ ୧୮.୫ ଫୁଟ ଲମ୍ବର ଅଜଗର ଏକ ଚାଷ ଜମିରେ ବୁଲୁଥିବା ବେଳେ କିଛି ଲୋକ ଦେଖି ରାଜନଗର ବନବିଭାଗକୁ ଖବର ଦେଇଥିଲେ । ବନବିଭାଗ ଅଧିକାରୀ ସୁଦର୍ଶନ ଗୋପିନାଥ ଯାଦବ ଏକ ଟିମ୍ ଘଟଣାସ୍ଥଳକୁ ପଠାଇ ଅଜଗର ଟିକୁ ଉଦ୍ଧାର କରିଛନ୍ତି । ଅଜଗରଟିର ମୁଣ୍ଡରେ ସାମାନ୍ୟ ଆହତ ହୋଇଥିବାରୁ ସେହି ଅଜଗରକୁ ଭିତରକନିକା ଜାତୀୟ ଉଦ୍ୟାନରେ ଏକ ଲୁହା ପଞ୍ଜୁରୀରେ ରଖାଯାଇ ଚିକିତ୍ସା କରାଯିବ । ପରେ ଅଜଗର ସୁସ୍ଥ ହେଲେ ଭିତରକନିକା ଜାତୀୟ ଉଦ୍ୟାନରେ ମୁକ୍ତ ଛଡାଯିବ ବୋଲି ବନ ଅଧିକାରୀ ସୁଦର୍ଶନ ଗୋପିନାଥ ଯାଦବ କହିଛନ୍ତି ।
