ମାଲକାନଗିରି, ୩/୧୦(ଆପ୍ର) :ମାଲକାନଗିରି ଜିଲ୍ଲା ବିଜୁ ଜନତା ଦଳ ତରଫରୁ ଜିଲ୍ଲା ସ୍ତରୀୟ  ଜନ ସମ୍ପର୍କ ପଦଯାତ୍ରା ଅନୁଷ୍ଠିତ ହୋଇଯାଇଛି । ମାଲକାନଗିରି ଜିଲ୍ଲା ବିଜୁ ଜନତା ଦଳ ସଭାପତି ତଥା ପୂର୍ବତନ ବିଧାୟକ ମାନସ ମାଡକାମୀଙ୍କ ନେତୃତ୍ୱରେ ମାଲକାନଗିରି ବସଷ୍ଟାଣ୍ଡ ଠାରୁ ଶୋଭା ଯାତ୍ରା ବାହାରି  ମାଲକାନଗିରି ଷ୍ଟାଡିୟମ୍  ନିକଟସ୍ଥ ସଂସ୍କୃତି ଭବନ ପର୍ଯ୍ୟନ୍ତ ଯାଇ ସେଠାରେ ଏକ ସଭା ର ଆୟୋଜନ କରାଯାଇଥିଲା ।  ଉକ୍ତ ଜନ ସମ୍ପର୍କ ପଦଯାତ୍ରା କାର୍ଯ୍ୟକ୍ରମ ମୁଖ୍ୟ ଅତିଥି ଭାବରେ   ରାଜ୍ୟ ବିଜୁ ଜନତା ଦଳର ପୂର୍ବତ୍ତନ ମନ୍ତ୍ରୀ ତଥା ରାଜ୍ୟ ବିଜୁ ଜନତା ଦଳ ର କୋର୍ କମ୍ମିଟି ତଥା ସମନ୍ଵୟ କମିଟି ର ଅଧ୍ୟକ୍ଷ ଦେବୀ ପ୍ରସାଦ ମିଶ୍ର  ଯୋଗ ଦେଇଥିଲେ। ଡାବୁଗାଁ ବିଧାୟକ ମନୋହର ରନ୍ଧାରୀ ,  ଭୃଗୁ ବକ୍ସି ପାତ୍ର ଏବଂ ପୂର୍ବତନ ସାଂସଦ  ପ୍ରଦୀପ ମାଝୀ , ପୂର୍ବତନ ସାଂସଦ  ରମେଶ ଚନ୍ଦ୍ର ମାଝୀ ଓ ପ୍ରିୟ ବ୍ରତ ମାଝୀ ଯୋଗ ଦେଇଥିଲେ ।

ବିଜୁ ଜନତା ଦଳ ସରକାର ସମୟରେ ଗ୍ରାମାଞ୍ଚଳ ଓ ପୌରାଞ୍ଚଳର ବିକାଶ ସହିତ ଜନସାଧାରଣଙ୍କ କଲ୍ୟାଣ ପାଇଁ ନିଆଯାଇଥିବା ବିଭିନ୍ନ ସଫଳ ଲୋକାଭିମୁଖୀ କାର୍ଯ୍ୟକ୍ରମ ସମ୍ପର୍କରେ ଲୋକମାନଙ୍କୁ ଅବଗତ  କରାଇଥିଲେ। ବିଜୁ ଜନତା ଦଳର ୨୪ ବର୍ଷର ସରକାରରେ ଓଡ଼ିଶା ବିକାଶର ନୂଆ ଶିଖର ଛୁଇଁଛି। ସବୁ କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି ଆସିଛି। ସେବା ଓ ସ୍ୱାଭିମାନ ଆମର ମନ୍ତ୍ର, ଆଉ ବିକାଶ ହେଉଛି ଆମର ପରିଚୟ। ଆମେ ସବୁବେଳେ ସୁଖ ଦୁଃଖରେ ଲୋକଙ୍କ ସାଥିରେ ରହି ଆସିଛୁ। ଏଥିପାଇଁ ବିଜୁ ଜନତା ଦଳ ଏବେ ଏକ ସାମାଜିକ ଆନ୍ଦୋଳନ ସାଜିଛି  ବୋଲି କହିଥିଲେ।

ଜନସାଧାରଣଙ୍କୁ ଦେଇଥିବା ପ୍ରତିଶ୍ରୁତି ପାଳନରେ ବର୍ତ୍ତମାନ ର ସରକାରଙ୍କ ବିମୁଖତା, ଦରଦାମ ନିୟନ୍ତ୍ରଣରେ ବିଫଳତା ଓ ମିଛ ପ୍ରତିଶ୍ରୁତି ଦେଇ ବିଜେପି ଶାସନକୁ ଆସିଛି ବୋଲି କହିଥିଲେ। କୁଆଡ଼େ ଗଲା ୩୦୦ ୟୁନିଟ୍ ମାଗଣା ବିଜୁଳି, ୩୦୦୦ ଟଙ୍କା ଭତ୍ତା ଓ ମା'ମାନଙ୍କୁ ୫୦,୦୦୦ ଟଙ୍କା? ବିଜେପିର ମିଛ ଏବେ ଧରା ପଡ଼ିଯାଇଛି। ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ କୋଟି କୋଟି ଲୋକ ଉପକାର ପାଉଥିଲେ। ଏବେ ସରକାର ସେ ଯୋଜନାର ନାମ ବଦଳାଇ ଦେଲେ। ଆପଣ ନାଁ ବଦଳାଇ ପାରନ୍ତି, ରଙ୍ଗ ବଦଳାଇ ପାରନ୍ତି। ହେଲେ ଇତିହାସକୁ ବଦଳାଇ ପାରିବେ ନାହିଁ ବୋଲି ନେତାମାନେ କହିଥିଲେ।