ମାଲକାନଗିରି,୩୦।୯ : ଆନ୍ଧ୍ରପ୍ରଦେଶ ସୀମାନ୍ତରେ ଜୀବନ୍ତ କଇଁଛ ଚୋରା ଚାଲାଣ ହେଉଥିବା ବେଳେ  ବନ ବିଭାଗ ଚଢାଇ କରି ଗାଡି ସହ ଏକ ଟନ କଇଁଛ ଜବତ କରିଛି। ଏଥିସହ  ଦୁଇଜଣଙ୍କୁ ବନବିଭାଗ ଅଧିକାରୀ ଗିରଫ କରିଛନ୍ତି। ଗିରଫ ବ୍ୟକ୍ତିମାନେ ହେଲେ କାଲିମେଳା ଅଞ୍ଚଳର ଏମପିଭି-୯୬ର ପ୍ରସନଞ୍ଜିତ ଘରାମୀ ଓ ସନ୍ଦୀପ ବାପାରୀ।

ଏକ ପିକଅପ  ଭ୍ୟାନ(ନଂ ଏପି ୩୯ ଏନଏସ୧୫୬୬) ରେ ଆନ୍ଧ୍ରପ୍ରଦେଶର ନରସିଂପାଟଣାରୁ କାଲିମେଳାକୁ କଇଁଛ ଚୋରା ଚାଲାଣ ହେଉଥିଲା। ଖବର ପାଇଁ  ଚିତ୍ରକୋଣ୍ଡା ବନାଞ୍ଚଳ ଅଧିକାରୀ ବଳରାମ ନାୟକଙ୍କ ନେତୃତ୍ୱ ରେ ବନପାଳ ନିରଞ୍ଜନ ସରକାର, ହରି ହନ୍ତାଳ, ସରୋଜ କୁମାର ଘଡ଼େଇ, ବନରକ୍ଷୀ ରାଜୁ ମାଡକାମି, ସଂସାଙ୍କ କୁମାର ଦାଶ, ରାମ ଚନ୍ଦ୍ର ମାଝୀ ପ୍ରମୁଖ ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ରାଜୁଲକୋଣ୍ଡାଠାରେ ଜଗିଥିଲେ ।  ପିକଅପ ଭ୍ୟାନ ଆସିବା ପରେ ବନବିଭାଗ କର୍ମଚାରୀମାନେ ଅଟକାଇ ଗାଡି ସହିତ କଇଁଛ ଜବତ କରିଥିଲେ। ୪୮୯ ଟି କଇଁଛ ଏହି ଗାଡ଼ିରେ ଚାଲାଣ କରାଯାଉଥିଲା। ଜବତ ପରେ କଇଁଛ ଓଜନ କରିବାରୁ ୯୩୫ କେଜି ହୋଇଥଲା। ଏତେ ଗୁଡିଏ କଇଁଛ କାହିଁକି ଚୋରା ଚାଲାଣ କରାଯାଉଥିଲା ଏବଂ ଏହି ରାକେଟରେ ଅନ୍ୟ କାହାର ସମ୍ପୃକ୍ତ ଅଛି କି ନାହିଁ ସେ ସମ୍ପର୍କରେ  ଚିତ୍ରକୋଣ୍ଡା ବନ ବିଭାଗ ପକ୍ଷରୁ ତଦନ୍ତ ଜାରି ରହିଛି ବୋଲି ରେଞ୍ଜର ଶ୍ରୀ ନାୟକ କହିଛନ୍ତି।