ମୁମ୍ବାଇ,୨୯/୫: ଦଙ୍ଗଲ ଅଭିନେତ୍ରୀ ଜାୟରା ୱସୀମଙ୍କ ପରିବାରରୁ ଏକ ଦୁଃଖଦ ଖବର ସାମ୍ନାକୁ ଆସିଛି। ଜାୟରାଙ୍କ ପିତା ଜାହିଦ ଓ୍ବାସିମଙ୍କ ନିଧନ ହୋଇଛି । ଏନେଇ ଜାୟରା ତାଙ୍କ ସୋସିଆଲ ମିଡିଆରେ ପୋଷ୍ଟ କରି ସୂଚନା ଦେଇଛନ୍ତି। ପୋଷ୍ଟ ସେୟାର କରି ଅଭିନେତ୍ରୀ କ୍ୟାପସନରେ ଲେଖିଛନ୍ତି ଯେ,'ମୋ ବାପା ଜାହିଦ ଓ୍ବାସିମ ଆଉ ନାହାନ୍ତି। ଆଲ୍ଲାଙ୍କୁ ପ୍ରାର୍ଥନା କରନ୍ତୁ, ମୋ ପିତାଙ୍କ ସବୁ ଭୁଲ୍କୁ କ୍ଷମା କରିଦେବେ। ତାଙ୍କ ଆତ୍ମାଙ୍କୁ ଶାନ୍ତି ମିଳୁ । ଆପଣମାନେ ନିଜ ହୃଦୟରେ ତାଙ୍କୁ ଜାଗା ଦିଅନ୍ତୁ ।'
ସୂଚନା ମିଳିଛି ଯେ, ମଙ୍ଗଳବାର ରାତି ପ୍ରାୟ ୧୦ଟା ସମୟରେ ଶ୍ରୀନଗରର ହାଓ୍ବାଲର ଡିଡି ବାଗ ମସଜିଦ ମହମ୍ମଦିଆରେ ଜାୟରାଙ୍କ ପିତାଙ୍କର ମୃତ୍ୟୁ ହୋଇଥିଲା। ବର୍ତ୍ତମାନ ଜାୟରାଙ୍କ ଏହି ପୋଷ୍ଟ ବେଶ ଭାଇରାଲ ହେବାର ଲାଗିଛି । ଏଥିସହ ପୋଷ୍ଟରେ ଯୁଜର୍ସମାନେ ଜାୟରାଙ୍କ ପିତାଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି। ତେବେ ଅଭିନେତ୍ରୀ ଜାୟରାଙ୍କ ଓ୍ବାର୍କଫ୍ରଣ୍ଟ କଥା କହିଲେ, ୨୩ ବର୍ଷୀୟ ଜାୟରା ଅମୀର ଖାନଙ୍କ ବ୍ଲକ ବ୍ଲଷ୍ଟର ଫିଲ୍ମ ଦଙ୍ଗଲ ସହିତ ଡେବ୍ୟୁ କରିଥିଲେ। ୨୦୧୬ରେ ମୁକ୍ତିଲାଭ କରିଥିବା ଏହି ଫିଲ୍ମରେ ସେ ଛୋଟ ଗୀତା ଫୋଗାଟଙ୍କ ଭୂମିକାରେ ଅଭିନୟ କରିଥିଲେ ।