ନୂଆପଡ଼ା.୧୫।୫(ଆପ୍ର): ନୂଆପଡ଼ା ଜିଲ୍ଲା ଲଖନା ଥାନା ସିଲଭା ଗାଁର କପିଲ ଶବର(୫୦)ଙ୍କୁ ହତ୍ୟା ଘଟଣାରେ ରାୟ ପ୍ରକାଶ ପାଇଛି। ଏହି ଘଟଣାରେ ନୂଆପଡ଼ା ଅତିରିକ୍ତ ଦୌରା ଜଜ୍ ସୁନିଲ କୁମାର ଦାସ ଗୋଟିଏ ପରିବାରର ୪ ଜଣଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିରେ ହୃଷୀ ଶବର(୬୩). ସ୍ତ୍ରୀ କ୍ଷତ୍ରୀ ଶବର(୬୦), ପୁଅ ଭୁବନେଶ୍ବର ଶବର(୪୦) ଓ ପୁତ୍ରବଧୂ ବିମଳା ଶବର(୩୭)ଙ୍କୁ ବିରୋଧରେ କାରାଦଣ୍ଡାଦେଶର ଶୁଣାଣି ହୋଇଛି।
ଗତ ୨୦୧୭ ଜାନୁୟାରୀ ୧୫ ତାରିଖରେ ଲଖନା ଥାନା ସିଲଭା ଗାଁର କପିଲ ନିକଟ ଦୋକାନକୁ ସଉଦା ଜିଣିବାକୁ ଯାଉଥିଲେ। ଏହି ସମୟରେ ସେହି ଗାଁରେ ରହୁଥିବା ହୃଷୀ ଶବର , ସ୍ତ୍ରୀ କ୍ଷତ୍ରୀ, ପୁଅ ଭୁବନେଶ୍ବର, ପୁତ୍ରବଧୂ ବିମଲା ମିଶି କପିଲଙ୍କୁ ଗୋଷ୍ଠିବଦ୍ଧ ଭାବେ ଠେଙ୍ଗାରେ ଆକ୍ରମଣ କରିଥିଲେ। ଅଚାନକ ଆକ୍ରମଣରେ ଆହତ ହୋଇ କପିଲ ତଳେ ପଡ଼ିଯିବାରୁ ସମସ୍ତେ ମିଶି ତାଙ୍କୁ ଠେଙ୍ଗାରେ ମରଣାନ୍ତକ ଆକ୍ରମଣ କରିଥିଲେ। ପରେ ଧାନକଟା ଦା' ରେ କପିଳଙ୍କୁ ସମସ୍ତେ ହାଣି ପକାଇଥିଲେ। ଫଳରେ ଘଟଣା ସ୍ଥଳରେ ହିଁ କପିଲଙ୍କ ମୃତ୍ୟୁ ହୋଇଥିଲା।
ଏହି ହତ୍ୟାକାଣ୍ଡ ପରେ ଲଖନା ଥାନାରେ କପିଲଙ୍କ ଭାଇ ପୂର୍ଣ ଶବର ଲିଖତ ଅଭିଯୋଗ କରିଥିଲେ। ଏନେଇ ଲଖନା ଥାନା କେଶ ନଂ ୮/୨୦୧୭ରେ ମାମଲା ରୁଜୁ କରି ହୃଷୀ ଶବର , ସ୍ତ୍ରୀ କ୍ଷତ୍ରୀ, ପୁଅ ଭୁବନେଶ୍ବର, ପୁତ୍ରବଧୂ ବିମଳା ସହ ଗାଁର ଅନ୍ୟ ଜଣେ ଅଭିଯୁକ୍ତ ଦାରାସିଂ ଶବର(୪୮)ଙ୍କୁ ମଧ୍ୟ କୋର୍ଟ ଚାଲାଣ କରିଥିଲେ। ଏହି ଘଟଣାରେ ପୁଲିସ ଠେଙ୍ଗା ଓ ଦା'କୁ ଜବତ କରି କୋର୍ଟକୁ ଜିମା ଦେଇଥିଲା।
ଗତ ୮ବର୍ଷ ଧରି ନୂଆପଡ଼ା ଅତିରିକ୍ତ ଦୌରା ଜଜଙ୍କ କୋର୍ଟରେ ମାମଲା ବିଚାରାଧନ ଥିଲା। ଏହି ମାମଲାରେ ୨୩ଜଣ ସାକ୍ଷୀଙ୍କ ବୟାନ ରେକର୍ଡ଼ ହୋଇଥିଲା। ସୋମବାର ନୂଆପଡ଼ା ଅତିରିକ୍ତ ଦୌରା ଜଜ୍ ଶ୍ରୀ ଦାସ ସମସ୍ତ ସାକ୍ଷ ଓ ପ୍ରମାଣକୁ ଭିତ୍ତି କରି ରାୟ ପ୍ରକାଶ କରିଥିଲେ। ଏହି ଘଟଣାରେ ହୃଷୀ ଶବର, ସ୍ତ୍ରୀ କ୍ଷତ୍ରୀ, ପୁଅ ଭୁବନେଶ୍ବର, ପୁତ୍ରବଧୂ ବିମଳା ପ୍ରମୁଖ ଗୋଟିଏ ପରିବାରର ୪ଜଣଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ ଜଣ ପିଛା ୧୦ ହଜାର ଲେଖାଏଁ ଜରିମାନା କରିଛନ୍ତି। ସେହିପରି ସାକ୍ଷ ପ୍ରମାଣ ଅଭାବରୁ ଅଭିଯୁକ୍ତ ଦାରାସିଂଙ୍କୁ କୋର୍ଟ ନିର୍ଦ୍ଦେଶରେ ଖଲାସ କରିଛି। ସରକାରଙ୍କ ପକ୍ଷରୁ ଅତିରିକ୍ତ ପିପି କାର୍ତ୍ତିକେଶ୍ବର ମହାରଣା ମାମଲାର ପରିଚାଳନା କରିଥିଲେ।
