ନୂଆପଡ଼ା,୧୪/୦୫: ନୂଆପଡ଼ା ଜିଲ୍ଲା କୋମନା ଥାନା ସୁନାବେଡା ଅଭୟାରଣ୍ୟ ଗାତିବେଡା ନିକଟ ଜଳମଡ଼ାଇ ସଂରକ୍ଷିତ ଜଙ୍ଗଲରୁ ମାଓ କ୍ୟାମ୍ପ ଠାବ । ସେଠାରୁ ଜବତ ହୋଇଛି ବିପୁଳ ମାଓ ସାମଗ୍ରୀ।
ଜଳମଡେଇ ସଂରକ୍ଷିତ ଜଙ୍ଗଲରେ ମାଓବାଦୀମାନେ କ୍ୟାମ୍ପ କରି ସୁରକ୍ଷା ବାହିନୀ ଉପରେ କୌଣସି ଏକ ବଡ଼ ଅଘଟଣ ପାଇଁ ଯୋଜନା କରୁଥିଲେ । ଏହି ଖବର ଗୁଇନ୍ଦା ସୂତ୍ରରୁ ନୂଆପଡ଼ା ଜିଲ୍ଲା ପୁଲିସ ଖବର ପାଇଥିଲା । ଆଜି ସକାଳେ ନୂଆପଡ଼ା ଏସପି ଜିଆର ରାଘବେନ୍ଦ୍ରଙ୍କ ନିର୍ଦ୍ଦେଶ କ୍ରମେ ନୂଆପଡ଼ା ଡ଼ିଭିଏଫ ଓ ଭାଓସିଲ ସିଆରପିଏଫ ଟିମ ଜଳମଡେଇ ସଂରକ୍ଷିତ ଜଙ୍ଗଲରେ ନକ୍ସଲ ବିରୋଧୀ କମ୍ବିଂ ଅପରେସନ ଆରମ୍ଭ କରିଥିଲେ । ଆଜି ପୂର୍ବାହ୍ନରେ ଯବାନଙ୍କ କମ୍ବିଂ ଅପରେସନ ଖବର ପାଇ ମାଓବାଦୀମାନେ ଛତ୍ରଭଙ୍ଗା ଦେଇଥିଲେ । ସେଠାରେ ଯବାନମାନେ ସର୍ଚ୍ଚ ଅପରେସନ କରି ଏକ ମାଓ କ୍ୟାମ୍ପ ଠାବ କରିଛନ୍ତି । ଏହି ମାଓ କ୍ୟାମ୍ପରୁ ଚାଉଳ, ଡାଲି, ଲୁଣ ଓ ଅନ୍ୟ ମାଓ ସାମଗ୍ରୀ ଜବତ ହୋଇଛି । ଏବେ ସମ୍ପୃକ୍ତ ଜଙ୍ଗଲରେ ଯବାନଙ୍କ କମ୍ବିଂ ଅପରେସନ ଜାରି ରହିଥିବା ନୂଆପଡ଼ା ଏସପି ଜିଆର ରାଘବେନ୍ଦ୍ର ସୂଚନା ଦେଇଛନ୍ତି ।
