ନୟାଗଡ଼,୧୪/୫ : ମଙ୍ଗଳବାର ରାତି ପ୍ରାୟ ୧୧ଟାରେ ନୟାଗଡ଼ ଜିଲ୍ଲା ଅତିରିକ୍ତ ଖଣି ଅଧିକରୀ ୩ ଜଣ କର୍ମଚାରୀଙ୍କୁ ନେଇ ଚାନ୍ଦପୁର ଥାନା ଅନ୍ତର୍ଗତ ଚମ୍ପାଗଡ଼ ଛକରେ ଚୋରା ଚାଲାଣ ହେଉଥିବା ଏକ ମାଙ୍କଡ଼ା ପଥର ଗାଡିକୁ ଜବତ କରି ଚାନ୍ଦପୁର ପୋଲିସକୁ ଖବର ଦେଇଥିଲେ । ହେଲେ ଘଟଣାସ୍ଥଳରେ ପହଞ୍ଚିବାରେ ବିଳମ୍ବ କରିବାରୁ ସ୍ଥାନୀୟ କେତେକ ଖଣି ମାଲିକ ଏବଂ ସେମାନଙ୍କ ଭଡ଼ାଟିଆ ଗୁଣ୍ଡା ଖଣି କର୍ମଚାରୀଙ୍କୁ ନାଲି ଆଖି ଦେଖାଇ ଜବତ ଗାଡିକୁ ଛଡ଼ାଇ ନେଇଗଲେ । ଯାହାକୁ ନେଇ ଏବେ ଖଣି କର୍ମଚାରୀ ଓ ଖଣି ମାଫିଆଙ୍କ ମଧ୍ୟରେ ଉତ୍ତେଜନା ଦେଖାଦେଇଛି । ପ୍ରକାଶ ଯେ, ଚୋରା ମାଙ୍କଡ଼ା ପଥର ଖଣି ଉପରେ ସରକାର ରୋକ୍ ଲଗାଇଛନ୍ତି । ଫଳରେ ପଥର ମାଫିଆମାନେ ପୂର୍ବ ଭଳି ଖୁଲମ ଖୋଲା ପଥର କାଟି ବାହାରକୁ ପଠାଇପାରୁ ନାହାନ୍ତି । ରାତିରେ ପଥର କାଟି ରାତାରାତି ବାହାରକୁ ମାଙ୍କଡ଼ା ଚୋରା ଚାଲଣା କରୁଛନ୍ତି ।
ମଙ୍ଗଳବାର ରାତିରେ ପଥର କଟା ହେଉଥିବା ଖବରପାଇ ଖଣି କର୍ମଚାରୀମାନେ ଚାନ୍ଦପୁର ଅଂଚଳରେ ଚଢଉ କରିଥିଲେ । ଚଢଉବେଳେ ଚମ୍ପାଗଡ଼ ଛକରେ ଏକ ମାଙ୍କଡ଼ା ପଥର ଗାଡିକୁ ଜବତ କରିଥିଲେ । ଗାଡି ଜବତ ପରେ କର୍ମଚାରୀମାନେ ଚାନ୍ଦପୁର ଥାନାକୁ ଫୋନ୍ କରି ତୁରନ୍ତ ଘଟଣାସ୍ଥଳକୁ ଆସିବାକୁ କହିଥିଲେ ହେଲେ ପୋଲିସ୍ ଏହି ସ୍ଥାନକୁ ଜାଣି ଶୁଣି ବିଳମ୍ବରେ ପହଞ୍ଚିଥିଲେ ସେତେବେଳକୁ ପଥର ବୋଝେଇ ଗାଡିକୁ ସେମାନେ ନେଇ ପଳାଇଗଲେ । ପୋଲିସ ପହଞ୍ଚି ମଧ୍ଯ କୌଣସି ପଦକ୍ଷେପ ଗ୍ରହଣ କରି ନ ଥିଲା । ପୋଲିସ୍ ସମ୍ମୁଖରେ ଖଣି କର୍ମଚାରୀଙ୍କୁ ଥାନାରେ ଅଭିଯୋଗ ନ କରିବାକୁ ଧମକ ଦେଇ ଚାନ୍ଦପୁର ଥାନାକୁ ଆସିଲେ ଜୀବନରେ ମାରିଦେବାକୁ ଧମକ ଦେଇଛନ୍ତି । ତେବେ ଚାନ୍ଦପୁର ଅଞ୍ଚଳରେ ଗତ ଜାନୁଆରୀଠାରୁ ୫୦ରୁ ଅଧିକ ଖଣି ଚାଲୁଥିବାବେଳେ ପୋଲିସ୍ ମାସିକ ଜଣକ ପିଛା ୧୫ହଜାର ଟଙ୍କା ହାତଗୁଞ୍ଜା ନେଉଥିବା ଅଭିଯୋଗ ହେଉଛି । ଏ ନେଇ ଥାନା ଅଧିକାରୀଙ୍କୁ ପଚରାଯିବାରେ ଖଣି କର୍ମଚାରୀମାନେ ଥାନାକୁ ନ ଜଣାଇ କାହିଁକି ଚଢଉ କରିବାକୁ ଯାଉଥିଲେ ବୋଲି ପ୍ରଶ୍ନ କରିଛନ୍ତି । ଏପଟେ ଖଣି ବିଭାଗ କର୍ମଚାରୀମାନେ ଚଢଉ କରିବାକୁ ଗଲାବେଳେ କେତେକ ପୋଲିସ୍ ଖଣି ମାଫିଆଙ୍କୁ ଖବର ପହଞ୍ଚାଇ ଦେଉଥିବା କୁହାଯାଇଛି । ସରକାର ଏକ ସ୍ବତନ୍ତ୍ର ଟିମ୍ ଗଠନ କରି ଚୋରା ଖଣି ଉପେର ଚଢଉ କରିବାକୁ ଦାବି ହେଉଛି ।
