ଭଦ୍ରକ, ୧୪/୦୫ : ବର୍ଷା ଦିନ ପୂର୍ବରୁ ସମ୍ଭାବ୍ୟ ବାତ୍ୟା ଓ ବନ୍ୟା ମୁକାବିଲା ନେଇ ଭଦ୍ରକ ଜିଲ୍ଲା ପରିଷଦ ସମ୍ମିଳନୀ କକ୍ଷରେ ଜିଲ୍ଲାସ୍ତରୀୟ ପ୍ରାକୃତିକ ବିପର୍ଯ୍ୟୟ ପରିଚାଳନା ବୈଠକ। ଜିଲ୍ଲାପାଳ ଦିଲ୍ଲୀପ ରାଉତରାୟଙ୍କ ଅଧ୍ୟକ୍ଷତାରେ ବୈଠକ ବସିଥିଲା। ଏହି ବୈଠକରେ ଭଦ୍ରକ ସାଂସଦ ଅଭିମନ୍ୟୁ ସେଠୀ, ଭଣ୍ଡାରିପୋଖରୀ ବିଧାୟକ ସଂଜୀବ ମଲ୍ଲିକଙ୍କ ସମେତ ଧାମନଗର ବିଧାୟକ ତଥା ମନ୍ତ୍ରୀଙ୍କ ପ୍ରତିନିଧି ଅଶୋକ ଦାସ, ଚାନ୍ଦବାଲି ବିଧାୟକଙ୍କ ପ୍ରତିନିଧି, ଅତିରିକ୍ତ ଜିଲ୍ଲାପାଳ ଶାନ୍ତନୁ ମହାନ୍ତି, ଉପଜିଲ୍ଲାପାଳ ସୌରଭ ଚକ୍ରବର୍ତ୍ତୀ ଯୋଗ ଦେଇଥିଲେ।
ବର୍ଷା ଦିନ ଆରମ୍ଭ ପୂର୍ବରୁ ସମ୍ଭାବ୍ୟ ବାତ୍ୟା ଓ ବନ୍ୟାର ମୁକାବିଲା କିପରି କରାଯାଇ ପାରିବ ସେ ବିଷୟରେ ବିସ୍ତୃତ ଭାବରେ ଆଲୋଚନା ହୋଇଛି। ବିଶେଷକରି ଦୁର୍ବଳ ନଦୀ ବନ୍ଧ ଗୁଡିକର ମରାମତି, ଏସ୍କକେଫ ଗୁଡିକର ଉଚତା ବୃଦ୍ଧି, ତଳିଆ ଅଞ୍ଚଳରୁ ଜଳ ନିଷ୍କାସନର ବ୍ୟବସ୍ଥା, ବନ୍ୟା ଓ ବାତ୍ୟା ପୂର୍ବରୁ ଶୁଖିଲା ଖାଦ୍ୟ ବିଭିନ୍ନ ପଏଣ୍ଟରେ ରଖିବା, ସହରାଞ୍ଚଳରେ ଥିବା ଡ୍ରେନ ଗୁଡିକ ପରିଷ୍କାର କରିବା, ବାତ୍ୟା ଆଶ୍ରୟ ସ୍ଥଳ ଗୁଡିକୁ ପ୍ରସ୍ତୁତି କରି ରଖିବା ଏବଂ ବିପର୍ଯ୍ୟୟ ସମୟରେ ବିଭିନ୍ନ ବିଭାଗ ମଧ୍ୟରେ କିପରି ଉତ୍ତମ ସମନ୍ଵୟ ରକ୍ଷା କରାଯାଇ ପାରିବ ସେ ବିଷୟରେ ବିଶେଷ ଭାବେ ଆଲୋଚନା କରାଯାଇ କାର୍ଯ୍ୟପନ୍ଥା ଗ୍ରହଣ କରାଯାଇଛି।
ସବୁ ବାତ୍ୟା ଆଶ୍ରୟ ସ୍ଥଳ ନିକଟରେ ପାନୀୟ ଜଳର ସୁବିଧା, ବିଦ୍ୟୁତ ସଂଯୋଗୀ କରଣର ସୁବିଧା ପାଇଁ ନଳକୂପ ଖନନ କରିବାକୁ ନିର୍ଦ୍ଦେଶ ଦିଆଯାଇଛି। ସେହିପରି ଭାବେ ଜିଲ୍ଲାର ଭଣ୍ଡାରିପୋଖରୀ, ଧାମନଗର, ତିହିଡି଼ ଓ ଚାନ୍ଦବାଲି ବ୍ଲକର ନଦୀ କୂଳବର୍ତ୍ତୀ ଅଞ୍ଚଳର ଲୋକଙ୍କ ଧନ ଜୀବନର ସୁରକ୍ଷା ପ୍ରତି ଅଧିକ ଗୁରୁତ୍ଵାରୋପ କରାଯାଇଛି। ବିପର୍ଯ୍ୟୟ ମୁକାବିଲାରେ ମୋହନ ସରକାରଙ୍କ ଜିରୋ କାଜୁଆଲିଟିକୁ ଫୋକସ କରାଯାଇଛି। ଏଥର ବାତ୍ୟା ଓ ବନ୍ୟାରେ ଘରେ ଘରେ ଗୋ-ଖାଦ୍ୟ ଦେବା ନେଇ ନିଷ୍ପତି କରାଯାଇଛି। ଏହି ବୈଠକରେ ବିଭିନ୍ନ ବିଭାଗର ଅଧିକାରୀମାନେ ଯୋଗ ଦେଇ ପ୍ରାକୃତିକ ବିପର୍ଯ୍ୟୟର ମୁକାବିଲା ପାଇଁ କିଭଳି ପ୍ରସ୍ତୁତ ରହିଛନ୍ତି ସେ ବିଷୟରେ ସେମାନେ ନିଜର ଯୋଜନା ବିଷୟରେ ଜଣାଇଥିଲେ।
