ଖପ୍ରାଖୋଲ, ୧୪/୦୫: ଖପ୍ରାଖୋଲ ଥାନା ଅନ୍ତର୍ଗତ ଘୁଚାପାଲି ଗ୍ରାମରେ ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଥିବା ସୂଚନା ମିଳିଛି । ମୃତ ମହିଳା ଜଣକ ହେଲେ କରିସ୍ମା ଦୀପ(୧୭) ବୋଲି ପୋଲିସ ସୂଚନା ଦେଇଛି । ଏନେଇ ମହିଳାଙ୍କ ପରିବାର ଲୋକେ ହତ୍ୟା ଅଭିଯୋଗ କରିଛନ୍ତି ।
ସୂଚନା ମୁତାବକ, ଖପ୍ରାଖୋଲ ଥାନା ପାଚେର ଗ୍ରାମର କରିସ୍ମା ଦୀପ ଘୁଚାପାଲି ଗ୍ରାମର ବେଣୁଧର କୁମ୍ଭାରଙ୍କୁ ପ୍ରେମ ବିବାହ କରିଥିଲେ । ବେଣୁଧର ନିଜ ସ୍ତ୍ରୀଙ୍କୁ ଛାଡି ରାଜ୍ୟ ବାହାରର କୌଣସି ଏକ କମ୍ପାନୀକୁ କାମ କରିବା ପାଇଁ ଯାଇଥିଲେ । ହେଲେ କରିସ୍ମା ନିଜ ଶ୍ୱଶୁର ଘରେ ବେକରେ ଦଉଡ଼ି ଲଗାଇ ଆତ୍ମହତ୍ୟା କରିଥିବା ଦେଖିବାକୁ ମିଳିଛି । ଘଟଣା ସମ୍ପର୍କରେ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ହେଲେ କରିସ୍ମାଙ୍କ ପରିବାର ଲୋକେ ଝିଅଙ୍କୁ ହତ୍ୟା କରାଯାଇଛି ବୋଲି ଖପ୍ରାଖୋଲ ଥାନାରେ ଅଭିଯୋଗ କରିଛନ୍ତି । ଏନେଇ ଖପ୍ରାଖୋଲ ଥାନା ଅଧିକାରୀ ନରେନ୍ଦ୍ର ଛତ୍ରଙ୍କୁ ପଚାରିବାରୁ ଏନେଇ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚାଲିଥିବା ପ୍ରକାଶ କରିଥିଲେ ।
