ପୁରୀ,୦୬/୦୬ : ବଡ଼ଦାଣ୍ଡରୁ ଖୋଲା ହେଲା ଏସି ସେଡ୍ । ୩ କୋଟିରୁ ଅଧିକ ଟଙ୍କାରେ ନିର୍ମିତ ଏସି ସେଡ୍କୁ ଖୋଲିବା ପ୍ରକ୍ରିୟା ବୁଧବାରଠାରୁ ଆରମ୍ଭ ହୋଇଛି । ମାତ୍ର ୫ ମାସ ପାଇଁ ଏହା ଭକ୍ତଙ୍କ କାମରେ ଲାଗିପାରିଛି ।
ଗତ ନୂଆବର୍ଷରେ ଏହି ଏସି ଟନେଲ୍ର ଶୁଭାରମ୍ଭ ହୋଇଥିଲା । ତେବେ ଆଗକୁ ରଥଯାତ୍ରା ଆସୁଥିବାରୁ ଏସି ଟନେଲ୍ ଖୋଲାଯାଇଛି । ଖରାରେ ସିଝୁଥିବା ଭକ୍ତଙ୍କୁ ଆଶ୍ୱସ୍ତି ଦେବାକୁ ଏହି ସେଡ୍ ନିର୍ମାଣ କରାଯାଇଥିଲା । ହେଲେ ଏହା ଆଶାତୀତ ଲାଭ ଦେଇନଥିଲା । ଅଧିକାଂଶ ସମୟରେ ସେଡ୍ ଫାଙ୍କା ପଡୁଥିଲା । ଅଧିକ ଭକ୍ତ ଗହଳି ହେଲେ ଧାଡ଼ି ଅଧିକ ଲମ୍ବୁଥିଲା । ସେତେବେଳେ ଏହି ଏସି ସେଡ୍ରେ ଭକ୍ତ ଅପେକ୍ଷା କରୁଥିଲେ । ଏଥିରେ ଥିବା ବ୍ୟାରିକେଡେ୍ରେ ଭକ୍ତଙ୍କ ପାଇଁ ବସିବା ବ୍ୟବସ୍ଥା ମଧ୍ୟ ଥିଲା । ଏହା ଭକ୍ତଙ୍କୁ ବର୍ଷାରୁ ମଧ୍ୟ ସୁରକ୍ଷା ଦେଉଥିଲା । ତେବେ ଏହାଯୋଗୁ ବଡ଼ଦାଣ୍ଡରେ ଅଧିକାଂଶ ସମୟରେ ଟ୍ରାଫିକ ଜାମ୍ ସମସ୍ୟା ଦେଖାଯାଉଥିଲା ।
ରଥକାଠ ଆସିବା ପରେ ଗୋଟିଏ ପାଶ୍ୱର୍ରେ ରଥକାଠ ଓ ଅନ୍ୟ ପଶ୍ୱର୍ରେ ଏସିସେଡ୍ ଥିବା କାରଣରୁ ଗାଡ଼ି ମଟର ଯିବାକୁ ବାଟ ସଂକୀର୍ଣ୍ଣ ହୋଇଯାଇଥିଲା । ଫଳରେ ପାଖାପାଖି ମାସେ ହେବ ଏହି ସ୍ଥାନରେ ଦୈନିକ ନାହିଁ ନଥିବା ଗାଡ଼ିମୋଟର ଭିଡ଼ ଦେଖିବାକୁ ମିଳୁଥିଲା । ରଥକୁ ଆହୁରି ୧ ମାସ ବାକି ଅଛି । ଇତିମଧ୍ୟରେ ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିବ ବୋଲି ମଧ୍ୟ ପୂର୍ବ ସୂଚନା ଅଛି । ଏଣୁ ରଥଯାତ୍ରା କିଛି ଦିନ ପୂର୍ବରୁ ଏହି ସେଡ୍ ଭାଙ୍ଗିଥିଲେ ଆଉ କିଛି ଦିନ ପାଇଁ ଲୋକେ ସେବା ପାଇଥାନ୍ତେ ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଛି । ରାଜ୍ୟରେ ସରକାର ଭାଙ୍ଗିଥିବା କାରଣରୁ ବିଜେଡି ସରକାର ଦ୍ୱାରା ପ୍ରସ୍ତୁତ ହୋଇଥିବା ଏହି ଏସି ସେଡ୍କୁ ତରବରିଆ ଭାବେ ଭାଙ୍ଗି ଦିଆଯାଉଛି ବୋଲି ମଧ୍ୟ ଅନେକ ଚର୍ଚ୍ଚା କରୁଛନ୍ତି । ତେବେ ରଥଯାତ୍ରା ପରେ ପୁଣି ଏହି ଟନେଲ ପ୍ରସ୍ତୁତ କରାଯିବ କି ନାହିଁ ସେନେଇ କୌଣସି ଅଧିକାରୀ ସ୍ପଷ୍ଟ ସୂଚନା ଦେଇନାହାନ୍ତି ।