ମାଲକାନଗିରି, ୩୧।୩ (ଆପ୍ର ): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ରେ ଗତ ୩ ଦିନ ହେଲା ମାଓବାଦୀ ଓ ଯବାନଙ୍କ ମଧ୍ୟରେ ବିଭିନ୍ନ ସ୍ଥାନରେ ଗୁଳି ବିନିମୟ ଚାଲିଛି। ଏଥିରେ ବହୁ ମାଓବାଦୀ ନିହତ ହୋଇଛନ୍ତି। ସୋମବାର ଯବାନଙ୍କ ଗୁଳିରେ ପୁଣି ଜଣେ ମହିଳା ମାଓବାଦୀଙ୍କ ମୃତ୍ୟୁ ହୋଇଛି। ମୃତ ମାଓବାଦୀ ଜଣଙ୍କ ହେଲେ ରେଣୁକା ଓରଫ ଚେତ ।
ସୂଚନା ଅନୁଯାୟୀ ଛତିଶଗଡର ଦନ୍ତେୱାଡ଼ା ଓ ବିଜାପୁର ସୀମାନ୍ତବର୍ତ୍ତୀ ଗ୍ରାମ ନେଲଗୋଡ଼ା, ଇକେଲି, ବେଲନାର ମଧ୍ୟ ଜଂଗଲରେ ମାଓ ଦମନ ଚାଲିଛି। ଜିଲ୍ଲା ପୁଲିସ, ଡିଆରଜି, ବସ୍ତର ଫାଇଟର୍ସର ମିଳିତ ଦଳ ତଲାସି କରୁଛନ୍ତି। ଏହି ସମୟରେ ଯବାନ ଓ ମାଓବାଦୀଙ୍କ ମଧ୍ୟରେ ମୁହାଁମୁହିଁ ହେବା ସହ ଗୁଳିବିନିମୟ ଘଟିଥିଲା। ଏହି ଗୁଳିବିନିମୟରେ ଜଣେ ମହିଳା ମାଓବାଦୀଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ମାଓବାଦୀ ମାନେ ସେଠାରୁ ଫେରାର ହୋଇଯାଇଛନ୍ତି। ମୃତ ମାଓବାଦୀ ଜଣଙ୍କ ହେଲେ ରେଣୁକା ଓରଫ ଚେତ। ସେ ମାଓ ସଂଗଠନର କେନ୍ଦ୍ରୀୟ ଆଞ୍ଚଳିକ ବ୍ୟୁର ଚିଫ୍ ଏବଂ ପ୍ରେସ୍ ଟିମ୍ ଇନଚାର୍ଜ ଥିଲେ । ସେ ବିଏ, ଏଲଏଲବି ଡିଗ୍ରୀ ଧାରୀ ଥିବା ଜଣା ପଡିଛି। ତେବେ ମୃତ ମାଓବାଦୀ ନାମରେ ତେଲେଙ୍ଗାନାରେ ସରକାରଙ୍କ ପକ୍ଷରୁ ୨୦ ଲକ୍ଷର ପୁରସ୍କାର ଘୋଷଣା ହୋଇଥିବା ବେଳେ ଛତିଶଗଡ଼ରେ ୨୫ ଲକ୍ଷ ଟଙ୍କାର ପୁରସ୍କାର ଘୋଷଣା ହୋଇଥିଲା। ତେବେ ଘଟଣାସ୍ଥଳରୁ ଗୋଟିଏ ଇନସାସ ରାଇଫଲ ସହ ବହୁ ମାତ୍ରାରେ ମାଓ ସାମଗ୍ରୀ ଜବତ କରିଛି ।
