ମାଲକାନଗିରି,୨।୪ : ଛତିଶଗଡକୁ ମାଓ ମୁକ୍ତ କରିବା ଲାଗି ୩୧ ମାର୍ଚ୍ଚ ୨୦୨୬ ତାରିଖ ଧାର୍ଯ୍ୟ କରାଯାଇଛି। ସୁକୁମା ବିଜାପୁର ଓ ଦନ୍ତେୱାଡା ଜିଲ୍ଲାରେ ଆରମ୍ଭ ହୋଇଛି ଜୋରଦାର ମାଓ ବିରୋଧୀ ଅପରେସନ । ଭୟଭୀତ ହୋଇ ପଡିଛନ୍ତି ଲାଲ ବାହିନୀ । ଗୃହମନ୍ତ୍ରୀ ଅମିତ ଶାହଙ୍କ ବସ୍ତର ପାଣ୍ଡୁମ ଗସ୍ତ ପୂର୍ବରୁ ମାଓବାଦୀ ତେଲୁଗୁ ଭାଷାରେ ଏକ ପ୍ରେସ ବିଜ୍ଞପ୍ତି ଜାରି କରିଛନ୍ତି। ଶାନ୍ତି ଆଲୋଚନା ପାଇଁ ପ୍ରେସ ବିଜ୍ଞପ୍ତି ମାଧ୍ୟମରେ ପ୍ରସ୍ତାବ ରଖିଛନ୍ତି ମାଓ ନେତା।
କେନ୍ଦ୍ର ଏବଂ ରାଜ୍ୟ ସରକାରଙ୍କ ଦ୍ୱାରା ଆରମ୍ଭ ହୋଇଥିବା ଅପରେସନରେ ଏପର୍ଯ୍ୟନ୍ତ ୪୦୦ ରୁ ଅଧିକ ମାଓନେତା, କର୍ମୀ ନିହତ ହୋଇଥିବା ଦାବି କରାଯାଇଛି। ଶାନ୍ତି ଆଲୋଚନା ପାଇଁ ପ୍ରସ୍ତାବ 'କାଗର' ଅପରେସନ ବନ୍ଦ କରିବା, ସଶସ୍ତ୍ର ବାହିନୀର ନୂତନ ଶିବିର ସ୍ଥାପନ ବନ୍ଦ କରିବା ଏବଂ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବା ପାଇଁ ମାଓବାଦୀମାନେ ପ୍ରେସ ବିଜ୍ଞପ୍ତି ମାଧ୍ୟମରେ ଜଣାଇଛନ୍ତି। ଯଦି ସରକାର ଏହି ଦାବିଗୁଡ଼ିକୁ ଗ୍ରହଣ କରନ୍ତି ତେବେ ମାଓବାଦୀମାନେ ଯୁଦ୍ଧବିରତି ଘୋଷଣା କରିବେ ଏବଂ ଶାନ୍ତି ଆଲୋଚନା ପାଇଁ ପ୍ରସ୍ତାବ ଦେଇଛନ୍ତି। ଶାନ୍ତି ଆଲୋଚନାକୁ ସମର୍ଥନ କରି ପ୍ରଚାର ଅଭିଯାନ ଆରମ୍ଭ କରିବାକୁ ସାମ୍ବାଦିକ, ବୁଦ୍ଧିଜୀବୀ, ସାମାଜିକ ସଂଗଠନ, ଛାତ୍ର ଏବଂ ଆଦିବାସୀଙ୍କୁ ମାଓବାଦୀମାନେ ଆହ୍ୱାନ ଦେଇଛନ୍ତି।
