ଭୁବନେଶ୍ୱର, ୧୦/୦୨: ରାଜଧାନୀ ଉପକଣ୍ଠ ରୋକଟ ଗ୍ରାମରେ ଷଣ୍ଢ ଆତଙ୍କ । ପାଗଳ ଷଣ୍ଢ ଆକ୍ରମଣରେ ଚାଲିଗଲା ମହିଳାଙ୍କ ଜୀବନ । ମହିଳାଙ୍କ ଶବ ରଖି ରାସ୍ତାରୋକ କଲେ ଗ୍ରାମବାସୀ । ବିଏମ୍ସି ଉକ୍ତ ପାଗଳ ଷଣ୍ଢ ଆୟତ୍ତ ନକରିବା ଯାଏଁ ରାସ୍ତାରୋକ ଜାରି ରଖିବେ ଗ୍ରାମବାସୀ । ରାଜଧାନୀ ଭୁବନେଶ୍ୱରର ଉପକଣ୍ଠ ରୋକଟ ଗ୍ରାମରେ ଏଭଳି ଘଟଣା ଘଟିଥିବାର ଖବର ଆଶିଛି ।
ସୂଚନା ମୁତାବକ, ପାଗଳ ଷଣ୍ଢ ପାଇଁ ରୋକଟ ଗ୍ରାମବାସୀ ଆତଙ୍କିତ । ଷଣ୍ଢ ଆକ୍ରମଣରେ ଜଣେ ମହିଳାଙ୍କ ଜୀବନ ଚାଲିଯାଇଥିବା ବେଳେ ଏହି ଘଟଣାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଗ୍ରାମବାସୀ । ଏକ ଘଣ୍ଟାରୁ ଅଧିକ ସମୟ ହେବ ଇଞ୍ଜିଣା ରୋକଟ ଏବଂ ମଞ୍ଚେଶ୍ୱରକୁ ସଂଯୋଗ କରୁଥିବା ରାସ୍ତାରେ ନିଆଁ ଲଗାଇବା ସହ ମହିଳାଙ୍କ ମୃତଦେହ ରଖି ରାସ୍ତା ଅବରୋଧ କରିଛନ୍ତି ଗ୍ରାମବାସୀ । ଏନେଇ ଖବର ପଇବା ପରେ ଘଟଣା ସ୍ଥଳରେ ମଞ୍ଚେଶ୍ୱର ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିବାକୁ ଚେଷ୍ଟା କରିଛି ।
ଏହି ଘଟଣା ପରେ ଉକ୍ତ ପାଗଳ ଷଣ୍ଢକୁ ଆୟତ୍ତ କରିବା ପାଇଁ ଗ୍ରାମବାସୀ ଦାବି କରିଛନ୍ତି । ବିଏମ୍ସି ଷଣ୍ଢଟିକୁ ଟ୍ରାଙ୍କୁଲାଇଜ୍ ନ କରିବା ଯାଏଁ ରାସ୍ତାରୋକ ଜାରି ରହିବ ବୋଲି ଗ୍ରାମବାସୀ କହିଛନ୍ତି ।
