ନୂଆଦିଲ୍ଲୀ,୧୮/୦୨: ଶନିବାର ରାତିରେ ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା ହୋଇଥିଲା। ଏଥିରେ ୧୮ ଜଣ ପ୍ରାଣ ହରାଇଛନ୍ତି। ରେଳ ସୁରକ୍ଷା ବଳ (ଆର୍ପିଏଫ୍) ନିରୀକ୍ଷକଙ୍କ ରିପୋର୍ଟ ଅନୁଯାୟୀ, ପ୍ରୟାଗରାଜ ଯାଉଥିବା କୁମ୍ଭ ସ୍ପେଶାଲ ଟ୍ରେନର ପ୍ଲାଟଫର୍ମ ପରିବର୍ତ୍ତନ ଘୋଷଣା ଯୋଗୁଁ ଏହି ଦୁର୍ଘଟଣା ଘଟିଛି। ଆର୍ପିଏଫ୍ ଏହାର ଇନ୍ସପେକ୍ଟରଙ୍କ ରିପୋର୍ଟକୁ ଚୂଡ଼ାନ୍ତ ରିପୋର୍ଟରେ ସାମିଲ କରିବ। ଏହି ଚୂଡ଼ାନ୍ତ ରିପୋର୍ଟ ରେଳ ମନ୍ତ୍ରଣାଳୟ ଦ୍ୱାରା ଗଠିତ ଦୁଇ ସଦସ୍ୟ ବିଶିଷ୍ଟ ଉଚ୍ଚସ୍ତରୀୟ କମିଟିକୁ ପ୍ରଦାନ କରାଯିବ।
ଇଣ୍ଡିଆନ୍ ଏକ୍ସପ୍ରେସର ଖବର ଅନୁଯାୟୀ, ଆରପିଏଫ୍ ଇନ୍ସପେକ୍ଟର ଫେବୃଆରୀ ୧୬ ତାରିଖରେ ଦିଲ୍ଲୀ ଜୋନର ବରିଷ୍ଠ ଅଧିକାରୀଙ୍କୁ ତାଙ୍କର ରିପୋର୍ଟ ଦାଖଲ କରିଥିଲେ। ସେ ଲେଖିଛନ୍ତି, 'ପ୍ରାୟ ରାତି ୮.୪୫ ସମୟରେ ଘୋଷଣା କରାଯାଇଥିଲା ଯେ ପ୍ରୟାଗରାଜ ଯାଉଥିବା କୁମ୍ଭ ସ୍ପେଶାଲ୍ ୧୨ ନମ୍ବର ପ୍ଲାଟଫର୍ମରୁ ଛାଡ଼ିବ।' କିନ୍ତୁ କିଛି ସମୟ ପରେ, ଆଉ ଏକ ଘୋଷଣା କରାଯାଇଥିଲା ଯେ କୁମ୍ଭ ସ୍ପେଶାଲ୍ ପ୍ଲାଟଫର୍ମ ନମ୍ବର ୧୬ ରୁ ଛାଡ଼ିବ। ଏହି କାରଣରୁ ଯାତ୍ରୀମାନଙ୍କ ମଧ୍ୟରେ ଦଳାଚକଟା ହୋଇଥିଲା।
କେମିତି ଘଟିଲା ଘଟଣା:
ସେହି ସମୟରେ ପ୍ଲାଟଫର୍ମ ନମ୍ବର ୧୪ ରେ ମଗଧ ଏକ୍ସପ୍ରେସ୍ ଠିଆ ହୋଇଥିଲା। ଉତ୍ତର ସମ୍ପର୍କ କ୍ରାନ୍ତି ଏକ୍ସପ୍ରେସ୍ ୧୫ ନମ୍ବର ପ୍ଲାଟଫର୍ମରେ ଠିଆ ହୋଇଥିଲା। ପ୍ଲାଟଫର୍ମ ନମ୍ବର ୧୪ ରେ ପ୍ରୟାଗରାଜ ଏକ୍ସପ୍ରେସରେ ଯାତ୍ରୀଙ୍କ ଭିଡ଼ ଲାଗି ରହିଥିଲା। ଏହି କାରଣରୁ ଯାତ୍ରୀଙ୍କ ଚଳାଚଳ ବନ୍ଦ ହୋଇଗଲା। ରିପୋର୍ଟରେ ଆହୁରି କୁହାଯାଇଛି, " ରେଳବାଇ ମାଇକ୍ରେ ଘୋଷଣା ଶୁଣିବା ପରେ, ଯାତ୍ରୀମାନେ ପ୍ଲାଟଫର୍ମ ନମ୍ବର ୧୨-୧୩ ଏବଂ ୧୪-୧୫ ରୁ ଫୁଟ ଓଭର ବ୍ରିଜ୍ରେ ନମ୍ବର ୨ ଏବଂ ୩ ଦେଇ ଚଢ଼ିବା ଆରମ୍ଭ କରିଥିଲେ।" ମଗଧ ଏକ୍ସପ୍ରେସ୍, ଉତ୍ତର ସମ୍ପର୍କ କ୍ରାନ୍ତି ଏବଂ ପ୍ରୟାଗରାଜ ଏକ୍ସପ୍ରେସର ଯାତ୍ରୀମାନେ ସିଡ଼ି ଦେଇ ତଳକୁ ଓହ୍ଲାଉଥିଲେ। ଧକ୍କା ଯୋଗୁଁ କିଛି ଯାତ୍ରୀ ଖସିଯାଇ ସିଡ଼ିରେ ପଡ଼ି ଆହତ ହୋଇଥିଲେ। ପରେ ଅନ୍ୟ ଯାତ୍ରୀମାନେ ଜଣକ ପରେ ଜଣେ ସିଡ଼ିରୁ ଖସିପଡ଼ିଲେ।
ଅନେକ ବିଭାଗରୁ ମଗାଯାଇଛି ରିପୋର୍ଟ:
ଇଣ୍ଡିଆନ୍ ଏକ୍ସପ୍ରେସ୍ ଉତ୍ତର ରେଳବାଇର ମୁଖ୍ୟ ଜନସମ୍ପର୍କ ଅଧିକାରୀ (ସିପିଆରଓ) ହିମାଂଶୁ ଶେଖର ଉପାଧ୍ୟାୟ କହିଛନ୍ତି ଯେ, ଆରପିଏଫ୍ ସମେତ ଅନେକ ବିଭାଗରୁ ରିପୋର୍ଟ ମଗାଯାଇଛି। ସେ କହିଛନ୍ତି, 'ସମସ୍ତଙ୍କଠାରୁ ରିପୋର୍ଟ ପାଇବା ପରେ, ମନ୍ତ୍ରଣାଳୟ ଦ୍ୱାରା ଗଠିତ ଉଚ୍ଚସ୍ତରୀୟ କମିଟି ସେମାନଙ୍କୁ ପଚରାଉଚରା କରିବ ଏବଂ ତା'ପରେ ଏକ ଚୂଡ଼ାନ୍ତ ନିଷ୍କର୍ଷରେ ବାହାରିବ।' ଆରପିଏଫ ଅଧିକାରୀଙ୍କ ରିପୋର୍ଟ ଅନୁଯାୟୀ, ୧୨ ନମ୍ବର ପ୍ଲାଟଫର୍ମରୁ ଟ୍ରେନ୍ ନମ୍ବର ୧୨୫୬୦ ଶିବ ଗଙ୍ଗା ଏକ୍ସପ୍ରେସ୍ ଛାଡିବା ପରେ ଷ୍ଟେସନରେ ହଠାତ୍ ଯାତ୍ରୀଙ୍କ ଭିଡ଼ ଜମି ଯାଇଥିଲା। ଏହି କାରଣରୁ, ଫୁଟ୍ ଓଭର ବ୍ରିଜ୍ ନମ୍ବର ୨ ଏବଂ ୩ ରେ ଜାମ୍ ହୋଇଥିଲା। ରିପୋର୍ଟରେ କୁହାଯାଇଛି ଯେ, "୧୨-୧୩, ୧୪-୧୫ ଏବଂ ୧୬ ନମ୍ବର ପ୍ଲାଟଫର୍ମରେ ମଧ୍ୟ ଯାତ୍ରୀଙ୍କ ଭିଡ଼ ଅଣାୟତ ପରିସ୍ଥିତି ସୃଷ୍ଟି ହୋଇଥିଲା।"
