ନୂଆଦିଲ୍ଲୀ: ବିବିସି ଇଣ୍ଡିଆ ଏବଂ ଏହାର ନିର୍ଦ୍ଦେଶକଙ୍କ ଉପରେ ୩.୪୪ କୋଟିରୁ ଅଧିକ ଜରିମାନା ଲଗାଇଛି ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)। ବିଦେଶୀ ଫଣ୍ଡିଂ ନିୟମ ଉଲ୍ଲଂଘନ କରିଥିବା ଅଭିଯୋଗରେ ଏହି ଜରିମାନା ଲାଗୁ କରାଯାଇଛି। ବିବିସି ଇଣ୍ଡିଆ ଡିଜିଟାଲ ମିଡିଆ ସଂସ୍ଥା ପାଇଁ ଧାର୍ଯ୍ୟ ହୋଇଥିବା ୨୬% ବିଦେଶୀ ପୁଞ୍ଜି ବିନିଯୋଗ (FDI) ସୀମାକୁ ଅନୁପାଳନ ନକରି, ଏହାକୁ ୧୦୦% ବଜାୟ ରଖିଛି ବୋଲି ଇଡି ଅଭିଯୋଗ କରିଛି।

ଶୁକ୍ରବାର ଜାରି କରାଯାଇଥିବା ଏକ ଆଦେଶରେ ଇଡି କହିଛି ଯେ ବିସିସି ଡବ୍ଲୁଏସ ଇଣ୍ଡିଆ ଉପରେ ୩,୪୪,୪୮,୮୫୦ ଟଙ୍କା ଜରିମାନା ଲାଗୁ କରାଯାଇଛି। ଏହା ସହିତ ୨୦୨୧ ଅକ୍ଟୋବର ୧୫ ପରେ ଅନୁପାଳନ ନକରିବା କାରଣରୁ ଦିନକୁ ୫୦୦୦ ଟଙ୍କା ଜରିମାନା ଲାଗୁ କରାଯାଇଛି। ଏଥିସହ, କମ୍ପାନୀର ତିନି ନିର୍ଦ୍ଦେଶକ – ଜାଇଲ୍ସ  ଆଣ୍ଟୋନି ହଣ୍ଟ, ଇନ୍ଦୁ ଶେଖର ସିହ୍ନା ଏବଂ ପଲ୍ ମାଇକେଲ୍ ଗିବ୍ବନ୍ସଙ୍କୁ ବ୍ୟକ୍ତିଗତ ଭାବରେ ୧,୧୪,୮୨,୯୫୦ ଟଙ୍କା ଜରିମାନା ଲଗାଯାଇଛି।

୨୦୨୩ ଏପ୍ରିଲରେ ଫେମା(ବିଦେଶୀ ମୁଦ୍ରା ପରିଚାଳନା ଅଧିନିୟମ) ଅନୁଯାୟୀ ବିବିସି ଇଣ୍ଡିଆ ବିରୋଧରେ ଇଡି ତଦନ୍ତ ଆରମ୍ଭ କରିଥିଲା। ଏହାପୂର୍ବରୁ, ୨୦୨୩ ଫେବ୍ରୁଆରୀରେ ଆୟକର ବିଭାଗ ଦିଲ୍ଲୀ ସମେତ ଅନେକ ସହରରେ ବିବିସି ଇଣ୍ଡିଆ କାର୍ଯ୍ୟାଳୟରେ ଏକ ସର୍ଭେ କରିଥିଲା। ଲାଇଭ୍ ହିନ୍ଦୁସ୍ତାନର ରିପୋର୍ଟ ଅନୁସାରେ ଜଣେ ଅଧିକାରୀ କହିଛନ୍ତି ଯେ “ସେପ୍ଟେମ୍ବର ୨୦୧୯ରେ ଉଦ୍ୟୋଗ ଏବଂ ଆଭ୍ୟନ୍ତରୀଣ ବାଣିଜ୍ୟର ପ୍ରୋତ୍ସାହନ ବିଭାଗ (DPIIT) ଡିଜିଟାଲ ମିଡିଆରେ ଏଫଡିଆଇ ସୀମା ୨୬% ସ୍ଥିର କରି ବିଜ୍ଞପ୍ତି ଜାରି କରିଥିଲା। ଏହା ସତ୍ତ୍ୱେ BBC ଡବ୍ଲୁଏସ ଇଣ୍ଡିଆ ଏହାର ବିଦେଶୀ ଅଂଶଧନକୁ ହ୍ରାସ କରି ନାହିଁ ଏବଂ ଏହାକୁ ଶତପ୍ରତିଶତ ବଜାୟ ରଖିଛି। ଯାହା ଭାରତ ସରକାରଙ୍କ ନିୟମ ଉଲ୍ଲଂଘନ କରୁଛି।"