ଭୁବନେଶ୍ୱର, ୧୦/୦୯: ଗଭୀର ଅବପାତ ପ୍ରଭାବରେ ରାଜ୍ୟରେ ପ୍ରବଳ ବର୍ଷା ହୋଇଛି । ଲଗାଣ ବର୍ଷାରେ ମାଲକାନଗିରିରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । କୋରାପୁଟ ଓ ରାୟଗଡ଼ାରେ ବି ସ୍ଥିତି ବେହାଲ ହୋଇଛି । ମଙ୍ଗଳବାର ବି ବର୍ଷା ଲାଗି ରହିବ । ତେବେ ପଶ୍ଚିମ ଓଡ଼ିଶାରେ ପ୍ରବଳ ବର୍ଷା ହେବ । ଛତିଶଗଡ଼ରେ ବି ନିର୍ଧୁମ ବର୍ଷିବ । ସେଠାରେ ବର୍ଷା ଯୋଗୁ ମହାନଦୀରେ ବନ୍ୟା ଆଶଙ୍କା ବଢ଼ିଛି । ଉତ୍ତର ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଗଭୀର ଅବପାତ ସୋମବାର ଦିନ ସାଢ଼େ ୧୧ଟାରେ ପୁରୀ ପାଖରେ ଓଡ଼ିଶା ଉପକୂଳ ଅତିକ୍ରମ କରିଥିଲା । ଏହା ଉତ୍ତର ପଶ୍ଚିମ ଦିଗରେ ଅଗ୍ରସର ହେବା ସହ ଆଭ୍ୟନ୍ତରୀଣ ଓଡ଼ିଶା ଆଡ଼କୁ ଯାଉଛି । ମଧ୍ୟରାତ୍ରି ସୁଦ୍ଧା ଏହା ଦୁର୍ବଳ ହୋଇ ଅବପାତକୁ ଖସିବ ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି । ଆସନ୍ତା ୨୪ ଘଣ୍ଟାରେ ଏହା ଉତ୍ତର ଛତିଶଗଡ଼ ଆଡ଼କୁ ଗତି କରିବ ।
ମଙ୍ଗଳବାର ସନ୍ଧ୍ୟା ସୁଦ୍ଧା ଏହା ଆହୁରି ଦୁର୍ବଳ ହୋଇ ସୁଦୃଶ୍ୟ ଲଘୁଚାପକୁ ଖସିଯିବ ବୋଲି ଆକଳନ କରାଯାଇଛି । ଏହା ପ୍ରଭାବରେ ଆଭ୍ୟନ୍ତରୀଣ ଓଡ଼ିଶା ଓ ଛତିଶଗଡ଼ରେ ପ୍ରବଳ ବର୍ଷା ଆଶଙ୍କା ଅଛି । ମଙ୍ଗଳବାର ବରଗଡ଼, ନୂଆପଡ଼ା ଓ ଝାରସୁଗୁଡ଼ାରେ ପ୍ରବଳରୁ ଅତିପ୍ରବଳ ବର୍ଷା ସମ୍ଭାବନା ଅଛି । ଏହି ୩ ଜିଲ୍ଲାରେ ୭୦ରୁ ୨୦୦ମିମି ପର୍ଯ୍ୟନ୍ତ ବର୍ଷା ହୋଇପାରେ । ବଲାଙ୍ଗୀର, ସୋନପୁର, ସମ୍ବଲପୁର ଓ ସୁନ୍ଦରଗଡ଼ରେ ବି ନିର୍ଧୁମ ବର୍ଷିବ । ୭୦ରୁ ୧୦୦ମିମି ବର୍ଷା ସମ୍ଭାବନା ଅଛି ।
ଆସନ୍ତା ୨୪ ଘଣ୍ଟାରେ(ମଙ୍ଗଳବାର ଦିନ ସାଢ଼େ ୧୧ଟା ଯାଏ) ବଲାଙ୍ଗୀର, ବାଲେଶ୍ୱର, ବୌଦ୍ଧ, ଦେବଗଡ଼, ଗଞ୍ଜାମ, ଜଗତସିଂହପୁର, କଳାହାଣ୍ଡି, କନ୍ଧମାଳ, କେନ୍ଦୁଝର, କୋରାପୁଟ, ମାଲକାନଗିରି, ମୟୂରଭଞ୍ଜ, ନବରଙ୍ଗପୁର, ନୟାଗଡ଼, ନୂଆପଡ଼ା, ପୁରୀ, ରାୟଗଡ଼ା, ସମ୍ବଲପୁର, ସୋନପୁର ଓ ସୁନ୍ଦରଗଡ଼ ଜିଲ୍ଲାରେ ପ୍ରବଳ ବର୍ଷା ଆଶଙ୍କା ଥିବାରୁ ମଧ୍ୟମ ଧରଣର ବନ୍ୟା(ଫ୍ଲାସ୍ ପ୍ଲଡ୍) ସ୍ଥିତି ସୃଷ୍ଟି ହୋଇପାରେ ବୋଲି ଭାରତୀୟ ପାଣିପାଗ ବିଭାଗ(ଆଇଏମଡି) ସତର୍କ କରାଇଛି । ୧୧ ତାରିଖ ବା ବୁଧବାର ବାଲେଶ୍ୱର, ମୟୂରଭଞ୍ଜ, କେନ୍ଦୁଝର ଓ ସୁନ୍ଦରଗଡ଼ରେ ବି ବର୍ଷା ହୋଇପାରେ ।
ରାଜ୍ୟର ଅନେକ ସ୍ଥାନରେ ଲଗାଣ ବର୍ଷା ହୋଇଛି । ଏଥିପାଇଁ ମାଲକାନଗିରି ଜିଲ୍ଲାରେ ବନ୍ୟା ସ୍ଥିତି ସୃଷ୍ଟି ହୋଇଛି । ମାଲକାନଗିରି-ମୋଟୁ ଜାତୀୟ ରାଜପଥର ପୋଟେରୁ,କାଙ୍ଗୁରୁକୋଣ୍ଡା, ଏମ୍ଭି-୯୬, ଏମ୍ଭି-୭ ଓ କନ୍ୟାଶ୍ରମ ପୋଲ ଉପରେ ପାଣି ଚାଲୁଛି । ସାବେରୀ, ସିଲେରୁ, ସପ୍ତଧାରା, ତମସା ନଦୀ ଜଳସ୍ତର ହଠାତ୍ ବଢ଼ିଯାଇଛି । ଭୂସ୍ଖଳନ ଯୋଗୁ ବାଲିମେଳା-ଚିତ୍ରକୋଣ୍ଡା ଘାଟି ଭାଲ୍ବ ହାଉସ ଛକରେ ମାଟି ଅତଡ଼ା ଧସି ଚିତ୍ରକୋଣ୍ଡାରୁ ଆନ୍ଧ୍ରପ୍ରଦେଶକୁ ଯୋଗାଯୋଗ ବନ୍ଦ ହୋଇଯାଇଛି।
ଖଇରପୁଟ ବ୍ଲକ୍ ବଣ୍ଡାଘାଟି ଅଞ୍ଚଳ ଅଧିକ ପ୍ରଭାବିତ ହୋଇଛି । ବର୍ଷା ଲାଗି ରହିବାରୁ ଭୂସ୍ଖଳନ ହୋଇଛି । ମାଙ୍କଡ଼ଝୋଲା ପାଖ ପାହାଡ଼ରୁ ପଥର ଖସି ରାସ୍ତାରେ ପଡ଼ିଛି । ବଣ୍ଡାଘାଟିରେ ବହୁ ଲୋକଙ୍କ ଘର ଭାଙ୍ଗିଯାଇଛି । ବ୍ଲକ୍ ସଦର ମହାକୁମାରେ ରହୁଥିବା ଜଣେ ଲୋକଙ୍କ ଉପରେ କାନ୍ଥ ଭାଙ୍ଗି ପଡ଼ିଯିବାରୁ ସେ ଗୁରୁତର ହୋଇଛନ୍ତି । କାଲିମେଳାର ଏମ୍ପିଭି-୧୬ ଗାଁରେ ପାଣିରେ ଫସି ରହିଥିବା ୬୦ ପରିବାରକୁ ଜିଲ୍ଲା ପ୍ରଶାସନ ଉଦ୍ଧାର କରି ଆଶ୍ରୟସ୍ଥଳୀକୁ ନେଇଛି ।
ମଙ୍ଗଳବାର ବି ବର୍ଷା ଆଶଙ୍କା ଥିବାରୁ ମାଲକାନଗିରି ଓ ଗଞ୍ଜାମ ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ବନ୍ଦ ପାଇଁ ଜିଲ୍ଲାପାଳ ନିର୍ଦ୍ଦେଶନାମା ଜାରି ରହିଛି । ମାଛକୁଣ୍ଡ ବିଦ୍ୟୁତ୍ ପ୍ରକଳ୍ପ ୟୁନିଟ୍ ଭିତରେ ପାଣି ପଶିଯାଇଛି ।ଏଥିପାଇଁ ବିଦ୍ୟୁତ ଉତ୍ପାଦନ ବାଧାପ୍ରାପ୍ତ ହୋଇଛି। ବିଦ୍ୟୁତ୍ ପ୍ରକଳ୍ପର ମୁଖ୍ୟ ଜଳଭଣ୍ଡାରରେ ବନ୍ୟା ଜଳ ବିପଦ ସଙ୍କେତ ଉପରେ ପ୍ରବାହିତ ହେଉଛି । ଏଥିପାଇଁ ଜଳଭଣ୍ଡାରର ୫ଟି ଗେଟ୍ ଖୋଲାଯାଇଛି । ଲଗାଣ ବର୍ଷାରେ କୋରାପୁଟ ଓ ରାୟଗଡ଼ାର ବହୁ ଗାଁ ପାଣିଘେରରେ ରହିଛି । ମୁନିଗୁଡ଼ା ବ୍ଲକ୍ ରାଣୀପିଣ୍ଡା ନିକଟ ନଦୀ ପୋଲ ଉପରେ ପାଣି ଚାଲିବା ଯୋଗୁ କଳାହାଣ୍ଡିକୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକରେ କାନ୍ଥ ପଡ଼ି ଜଣେ ଯୁବତୀ ଗୁରୁତର ହୋଇଛି । ବର୍ଷା ସ୍ଥିତିକୁ ଦେଖି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋମବାର ସମ୍ବଲପୁରରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀଙ୍କ ସହ ଜରୁରୀ ଆଲୋଚନା କରିଛନ୍ତି । ଲଗାଣ ବର୍ଷା ଯୋଗୁ ମାଲକାନଗିରି, କୋରାପୁଟ ସମେତ ବିଭିନ୍ନ ଜିଲ୍ଲାରେ ଯାତାୟତ ବାଧାପ୍ରାପ୍ତ ହୋଇଛି । ଲୋକେ ପ୍ରଭାବିତ ହୋଇଛନ୍ତି । ତୁରନ୍ତ ପଦକ୍ଷେପ ନେବାକୁ ଏସ୍ଆରସି ଓ ଦୁଇ ଜିଲ୍ଲାର ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ।
ଆଗାମୀ ୪୮ ଘଣ୍ଟାରେ ଉପକୂଳବର୍ତ୍ତୀ ଅଞ୍ଚଳରେ ଭାରି ବର୍ଷା ଆଶଙ୍କା ଅଛି । ଜିଲ୍ଲାପାଳମାନେ ପ୍ରସ୍ତୁତ ରହିବାକୁ କୁହାଯାଇଛି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀ ଓ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ପ୍ରମୁଖ ସଚିବ ବିଷ୍ଣୁପଦ ସେଠୀ ଓ ଦକ୍ଷିଣାଞ୍ଚଳ ଡିଆଇଜି ଚରଣ ମୀନା ମାଲକାନଗିରି ଜିଲ୍ଲା ଯାଇଛନ୍ତି । ଏହି ୩ ବରିଷ୍ଠ ଅଧିକାରୀ ସେଠାରେ ରହି ବନ୍ୟା ସ୍ଥିତିର ମୁକାବିଲା କାମକୁ ତଦାରଖ କରିବେ । ରାଜ୍ୟରେ ବନ୍ୟା ଆଶଙ୍କା ଥିବାରୁ ସ୍ଥିତିର ସମୀକ୍ଷା କରିଛନ୍ତି ଏସ୍ଆରସି ଦେଓରଞ୍ଜନ କୁମାର ସିଂ ।
ରାଜ୍ୟରେ ବନ୍ୟା ସ୍ଥିତି ନାହିଁ । ମଙ୍ଗଳବାରଠାରୁ ଦକ୍ଷିଣ ଓଡ଼ିଶାରେ ସ୍ଥିତିରେ ସୁଧାର ଆସିବ ବୋଲି ସେ କହିଛନ୍ତି । ଲଗାଣ ବର୍ଷାରେ ମାଲକାନଗିରି ଜିଲ୍ଲାର କାଲିମେଳା ବ୍ଲକ ଅଧିକ ପ୍ରଭାବିତ ହୋଇଛି । ମାଲକାନଗିରିର ୬ଟି ଗାଁ ଓ କୋରାପୁଟର ୩୬ ଗାଁ ପ୍ରଭାବିତ ହୋଇଛି । କୋରାପୁଟ ଜିଲ୍ଲାର ୧୫୦ ଘର ଆଂଶିକ କ୍ଷତିଗ୍ରସ୍ତ ହୋଇଛି । ବିଭିନ୍ନ ଜିଲ୍ଲାରେ ଓଡ୍ରାଫ୍ ଓ ଏନଡିଆରଏଫ ଟିମ୍କୁ ନିୟୋଜିତ କରାଯାଇଛି । ୭ ଜିଲ୍ଲାକୁ ଓଡ୍ରାଫ୍ ଟିମ୍ ପଠାଯାଇଥିବାବେଳେ ୪ ଜିଲ୍ଲାକୁ ଏନଡିଆରଏଫ ଟିମ୍କୁ ନିୟୋଜିତ କରାଯାଇଛି । ସମ୍ଭାବ୍ୟ ସ୍ଥିତିକୁ ମୁକାବିଲା ପାଇଁ ଆମେ ପ୍ରସ୍ତୁତ ଅଛୁ ବୋଲି ଏସ୍ଆରସି ସୂଚନା ଦେଇଛନ୍ତି । ସେପଟେ ବର୍ଷା ଆଶଙ୍କାରେ ସମସ୍ତ ପୌରାଞ୍ଚଳକୁ ହାଇଆଲର୍ଟରେ ରହିବାକୁ ନିର୍ଦ୍ଦେଶ ଦେଇଛନ୍ତି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ସଚିବ ଉଷା ପାଢୀ । ସହରର ତଳିଆ ଅଞ୍ଚଳରେ ପାଣି ଜମିପାରେ । ଏଥିପାଇଁ ଆଗୁଆ ପଦକ୍ଷେପ ନେବାକୁ ସେ ନିର୍ଦ୍ଦେଶ ଦେଇଛନ୍ତି ।
