ନୂଆଦିଲ୍ଲୀ: ଭିସ୍ତାରା ବିମାନକୁ ବୋମା ଧମକ ମିଳିବା ପରେ ହଇଚଇ । ମୁମ୍ବାଇରୁ ଜର୍ମାନୀର ଫ୍ରାଙ୍କଫର୍ଟ ଯାଉଥିବା ଭିସ୍ତାରା UK 27  ବିମାନ ତୁର୍କିଏରେ ଅବତରଣ କରିଛି । ମିଳିଥିବା ସୂଚନା ଅନୁସାରେ, ମୁମ୍ବାଇରୁ ଫ୍ରାଙ୍କଫର୍ଟ ଅଭିମୁଖେ ଯାତ୍ରା ଆରମ୍ଭ କରିଥିଲା ଭିସ୍ତାରା ବୋଇଂ ୭୮୭ । ଏହି ସମୟରେ ବିମାନର ଶୌଚାଳୟରେ ଏକ ଟିସ୍ୟୁ ପେପର ସମସ୍ତଙ୍କ ଚିନ୍ତା ବଢ଼ାଇ ଦେଇଥିଲା । ଏଥିରେ ବିମାନରେ ବୋମା ଅଛି ବୋଲି ଲେଖାଥିଲା । ଏନେଇ ଜଣାପଡ଼ିବା ପରେ ବିମାନ କର୍ମଚାରୀଙ୍କ ସମେତ ଯାତ୍ରୀଙ୍କ ଗହଣରେ ହଇଚଇ ସୃଷ୍ଟି ହୋଇଥିଲା । ଏହା ପରେ ପାଇଲଟ୍‌ ବିମାନକୁ ତୁର୍କିଏର ଏର୍ଜୁରୁମ ବିମାନବନ୍ଦରରେ ଜରୁରି ଅବତରଣ କରାଇଥିଲେ । ସେଠାରେ ବିମାନରେ ବୋମା ଅଛି କି ନାହିଁ ଯାଞ୍ଚ କରାଯାଇଛି । 

ଏନେଇ ଭିସ୍ତାରା ଏୟାର ଲାଇନର ମୁଖପାତ୍ର କହିଛନ୍ତି, ‘ସେପ୍ଟମ୍ବର ୬ (ଶୁକ୍ରବାର)ରେ ଭିସ୍ତାରା ବିମାନ ୟୁକେ ୨୭ ମୁମ୍ବାଇରୁ ଫ୍ରାଙ୍କଫର୍ଟ ଲାଗି ଉଡ଼ାଣ ଭରିଥିଲା । ଯାହାକୁ ସୁରକ୍ଷା ଦୃଷ୍ଟିରୁ ତୁର୍କିଏକୁ ଡାଇଭର୍ଟ କରାଯାଇଛି । ବିମାନଟି ଏର୍ଜୁରୁମ ବିମାନବନ୍ଦରରେ ସୁରକ୍ଷିତ ଭାବେ ଲ୍ୟାଣ୍ଡ କରିଛି । ସେଠାରେ ସଂପର୍କିତ ବିଭାଗ ଦ୍ବାରା ବିମାନଟିକୁ ଯାଞ୍ଚ କରାଯାଉଥିବା ବେଳେ ଆମେ ତାଙ୍କୁ ଯଥାସମ୍ଭବ ସହାୟତା କରିବାକୁ ଚେଷ୍ଟା କରୁଛୁ । ଯାତ୍ରୀ, କ୍ରିଉ ସଦସ୍ୟ ଏବଂ ଏୟାରକ୍ରାଫ୍ଟର ସୁରକ୍ଷା ଭିସ୍ତାରାର ମୁଖ୍ୟ ପ୍ରାଥମିକତା ।’  

ଅନ୍ୟପଟେ ବିମାନରେ ଯଦି ବୋମା ଥିବା ଖବର ମିଥ୍ୟା ହୁଏ ତେବେ ପୁଣି ଥରେ ଗସ୍ତବ୍ୟସ୍ଥଳକୁ ଯାତ୍ରା ଆରମ୍ଭ ହେବ । ଏହା ସହ ଟିସ୍ୟୁ ପେପରରେ କାହା ହାତଲେଖା ରହିଛି ତାହା ତଦନ୍ତ କରାଯିବ । ଏଭଳି ମିଥ୍ୟା ଖବର ଦ୍ବାରା ଯାତ୍ରୀମାନଙ୍କୁ ଅଯଥା ହଇରାଣ ହରକତ ହେବାକୁ ପଡ଼ୁଥିବା ବେଳେ ଏୟାର ଲାଇନକୁ ଅଧିକ ଖର୍ଚ୍ଚାନ୍ତ ହେବାକୁ ପଡ଼େ ବୋଲି ଜଣେ ବରିଷ୍ଠ ପାଇଲଟ୍‌ କହିଛନ୍ତି ।