ଭୁବନେଶ୍ୱର,୧୦/୦୯: ଆସନ୍ତା ୧୫ ତାରିଖରେ ଓଡ଼ିଶାରେ ଚାଲିବ  ୩ଟି ବନ୍ଦେ ଭାରତ ଏକ୍ସପ୍ରେସ୍‌ । ଏହି  ୩ଟି ଏକ୍ସପ୍ରେସ୍‌ ଟ୍ରେନ୍‌କୁ ଲୋକାର୍ପଣ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।  ସେଥିମଧ୍ୟରୁ ଗୋଟିଏ ଏକ୍ସପ୍ରେସ୍‌ ଟାଟାନଗରରୁ ବ୍ରହ୍ମପୁର ଚାଲିବ । ଯାହା  ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ  ଜିଲ୍ଲା କେନ୍ଦୁଝର ଦେଇଯିବ । 

ରବିବାର  ଏହାର ପରୀକ୍ଷାମୂଳକ ଚଳାଚଳ ସରିଛି ।  ଦ୍ୱିତୀୟ ବନ୍ଦେ ଭାରତ ଏକ୍ସପ୍ରେସ୍‌ ହାଓଡ଼ାରୁ ରାଉରକେଲା ଚାଲିବ । ଯାହା  ହାଓଡ଼ାରୁ ଛାଡ଼ିବା ପରେ ଖଡ଼ଗପୁର,  ଟାଟାନଗର ଓ ଚକ୍ରଧରପୁର ହୋଇ  ରାଉରକେଲାରେ ପହଞ୍ଚିବ । ତୃତୀୟ  ବନ୍ଦେ ଭାରତ ରାୟପୁରରୁ ବିଶାଖାପାଟଣା  ଯିବ । ଯାହା ରାୟପୁର ଛାଡ଼ିବା ପରେ  ମହାସମୁନ୍ଦ ହୋଇ ଖରିଆର ରୋଡ୍‌,  କଣ୍ଟାବାଞ୍ଜି, ଟିଟିଲାଗଡ଼, କେସିଙ୍ଗା ଓ ରାୟଗଡ଼ା ଦେଇ ଯିବ । ବିଶାଖାପାଟଣା  ପହଞ୍ଚିବା ପୂର୍ବରୁ ବିଜୟନଗରମରେ  ଏହି ଟ୍ରେନ୍‌ ରହଣି ବ୍ୟବସ୍ଥା ଅଛି । 

ଉଲ୍ଲେଖଯୋଗ୍ୟ, ନୂତନ ୩ଟି  ବନ୍ଦେ ଭାରତ ଏକ୍ସପ୍ରେସ୍‌ ମିଳିବା ପରେ  ଓଡ଼ିଶାରେ ବନ୍ଦେ ଭାରତ ଏକ୍ସପ୍ରେସ୍‌  ସଂଖ୍ୟା ୬ରେ ପହଞ୍ଚିବ । ଏହା ରାଜ୍ୟରେ  ପରିବହନ ସେବାକୁ ତ୍ୱରାନ୍ୱିତ କରିବ  ବୋଲି ପୂର୍ବତଟ ରେଳପଥର ବରିଷ୍ଠ  ଅଧିକାରୀ ମତ ଦେଇଛନ୍ତି । ରେଳମନ୍ତ୍ରୀ ଅଶ୍ୱିନୀ କୁମାର ବୈଷ୍ଣବ ଓଡ଼ିଶାରୁ  ରାଜ୍ୟସଭାକୁ ଯିବା ପରେ ଓଡ଼ିଶାରେ  ରେଳବାଇକୁ ଅଧିକ ବଜେଟ୍‌ ମିଳିବା  ସହିତ ରେଳର ପ୍ରଗତି ଆଶାତୀତ  ଭାବେ ବଢ଼ିଛି ବୋଲି ଅଧିକାରୀ  ସୂଚନା ଦେଇଛନ୍ତି । ଶୀଘ୍ର ଭୁବନେଶ୍ୱର  ବିଶ୍ୱସ୍ତରୀୟ ରେଳ ଷ୍ଟେସନ କାମ ସରିବ । ଏହା ଯୁଦ୍ଧକାଳୀନ ଭିତ୍ତିରେ  ଚାଲିଛି ବୋଲି ଅଧିକାରୀ ଜଣକ ସୂଚନା ଦେଇଛନ୍ତି ।