ମାଲକାନଗିରି,୨୪/୩: ମାଲକାନଗିରି ବ୍ଲକସ୍ଥ ଏମଭି ୨୩ ଗ୍ରାମରେ ବେଆଇନ ଭାବେ ମୂଲ୍ୟବାନ ଶାଗୁଆନ କାଠ ସାମଗ୍ରୀ ନିର୍ମାଣ ଚାଲିଥିବା ନେଇ ଖବର ପାଇଥିଲା ବନ ବିଭାଗ । ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶ କ୍ରମେ ମାଲକାନଗିରି ବନାଞ୍ଚଳ ଅଧିକାରୀଙ୍କ ନେତୃତ୍ୱରେ ବନ କର୍ମଚାରୀ, ପାରା ଷ୍ଟାଫ ଗ୍ରାମର ଶ୍ରୀବାସ ବେପାରୀଙ୍କ ଘର ଉପରେ ଚଢ଼ାଉ କରିଥିଲେ । ତାଙ୍କ ଘରେ ଲୁଚାଇ ରଖିଥିବା ୪୬ଟି ମୂଲ୍ୟବାନ ଶାଗୁଆନ ପଟା ଓ ୧୪ଟି ପିଆଶାଳ ପଟା ଜବତ କରିଛି ବିଭାଗ। ବନ ବିଭାଗ ଅଧିକାରୀଙ୍କୁ ଦେଖି ଶ୍ରୀ ବେପାରୀ ଫେରାର ହୋଇ ଯାଇଥିଲେ। କାଠ ପଟା ଓ ଅର୍ଦ୍ଧ ନିର୍ମିତ ପଲଙ୍କ ସାମଗ୍ରୀକୁ ଜବତ କରି ବନ ବିଭାଗ ରେଞ୍ଜ ଅଫିସକୁ ଆଣି ଏକ ମାମଲା ରୁଜୁ କରି ତଦନ୍ତ ଚଲାଇଛନ୍ତି। ଏହି କାଠ ପଟା ଗୁଡିକର ମୂଲ୍ୟ ପ୍ରାୟ ଏକ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡିଛି।