ନୂଆଦିଲ୍ଲୀ,୨୪/୦୩: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏପ୍ରିଲ ୨ ରୁ ରେସିପ୍ରୋକାଲ ଟାରିଫ ଲାଗୁ କରିବାକୁ ଘୋଷଣା କରିଥିଲେ, ଯାହା ଅନେକ ଦେଶ ବିଶେଷ କରି ଭାରତ, ଚୀନ୍ ଏବଂ ୟୁରୋପର ଅର୍ଥନୀତି ଉପରେ ପ୍ରଭାବ ପକାଇପାରେ। ବ୍ଲୁମବର୍ଗ ଏବଂ ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ ରିପୋର୍ଟ କରିଛି ଯେ, ସେକ୍ଟର-ବିଶିଷ୍ଟ ଶୁଳ୍କକୁ ବାଦ ଦିଆଯିବ, ଅର୍ଥାତ ପୂର୍ବରୁ ପ୍ରସ୍ତାବିତ ଶୁଳ୍କ ଶିଳ୍ପ କିମ୍ବା ଦେଶ ଉପରେ ଲାଗୁ ହେବ ନାହିଁ ବୋଲି । ଏହି ରିପୋର୍ଟ ଅନୁଯାୟୀ, ଏହା ଭାରତ ପାଇଁ ଆଶ୍ବସ୍ତିମୁଳକ ଖବର ବୋଲି କୁହାଯାଇପାରେ।
ଟ୍ରମ୍ପ ପ୍ରଶାସନ ଯୁକ୍ତି ଦର୍ଶାଉଛି ଯେ, ଯଦି କୌଣସି ଦେଶ ଆମେରିକୀୟ ଉତ୍ପାଦ ଉପରେ ଅଧିକ ଟ୍ୟାକ୍ସ ଲଗାଏ, ତେବେ ଆମେରିକା ମଧ୍ୟ ସେହି ଦେଶର ଉତ୍ପାଦ ଉପରେ ସମାନ ଟ୍ୟାକ୍ସ ଲଗାଇବ। ଉଦାହରଣ ସ୍ୱରୂପ, ଯଦି ଭାରତ ଆମେରିକୀୟ ଉତ୍ପାଦ ଉପରେ ୧୦% ଆମଦାନୀ ଶୁଳ୍କ ଲାଗୁ କରେ, ତେବେ ଆମେରିକା ମଧ୍ୟ ଭାରତୀୟ ଉତ୍ପାଦ ଉପରେ ୧୦% ପ୍ରତିଶୋଧ ଶୁଳ୍କ ଲାଗୁ କରିବ। ଟ୍ରମ୍ପଙ୍କ ଅନୁଯାୟୀ ଏହା ଆମେରିକାର ବାଣିଜ୍ୟ ନୀତିକୁ ଅଧିକ ନିରପେକ୍ଷ କରିବ।
ଫେବୃଆରୀରେ ଟ୍ରମ୍ପ କହିଥିଲେ ଯେ ସେ ଅଟୋମୋବାଇଲ ଉପରେ ୨୫% ଶୁଳ୍କ ଲାଗୁ କରିବାକୁ ଯୋଜନା କରିଛନ୍ତି। ଏହା ମଧ୍ୟ ସେମିକଣ୍ଡକ୍ଟର ଏବଂ ଫାର୍ମାସ୍ୟୁଟିକାଲ୍ ଆମଦାନୀ ଉପରେ ସମାନ ଶୁଳ୍କ ଲାଗୁ କରିବ, କିନ୍ତୁ ଆମେରିକାର ତିନୋଟି ବୃହତ୍ତମ ଅଟୋମୋବାଇଲ୍ କମ୍ପାନୀଗୁଡିକର ଚାପ ପରେ ପ୍ରଶାସନ କିଛି ଅଟୋ ଶୁଳ୍କ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି। ବର୍ତ୍ତମାନ, ଏପ୍ରିଲ୍ ୨ ରେ ସେକ୍ଟର ନିର୍ଦ୍ଦିଷ୍ଟ ଶୁଳ୍କ ଆଉ ଘୋଷଣା କରାଯିବ ନାହିଁ, କିନ୍ତୁ ହ୍ବାଇଟ ହାଉସ୍ ପାରସ୍ପରିକ ଶୁଳ୍କ ଲାଗୁ କରିବାକୁ ଯୋଜନା କରୁଛି ବୋଲି ବ୍ଲୁମବର୍ଗ ନ୍ୟୁଜ୍ ଏବଂ ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ ରିପୋର୍ଟ କରିଛି।
ଆମେରିକାର ଟ୍ରେଜେରୀ ସଚିବ ସ୍କଟ ବେସାଣ୍ଟ ସୂଚାଇ ଦେଇଛନ୍ତି ଯେ କିଛି ଶୁଳ୍କ ସ୍ଥଗିତ ରଖାଯାଇପାରେ, କିନ୍ତୁ ହ୍ବାଇଟ ହାଉସ ଏ ସମ୍ପର୍କରେ ଏପର୍ଯ୍ୟନ୍ତ ସ୍ପଷ୍ଟ ସୂଚନା ଦେଇନାହିଁ। ଏଥି ସହିତ ହ୍ବାଇଟ ହାଉସ କହିଛି ଯେ ଏପ୍ରିଲ ୨ ତାରିଖରୁ ଆମେ ରେସିପ୍ରୋକଲ ଟାରିଫ ଲାଗୁ କରିବାକୁ ଚାହୁଁଛୁ। ତେବେ ଅଧିକାରୀଙ୍କ ଅନୁଯାୟୀ ଏହି ନୀତି ଚୂଡାନ୍ତ ହୋଇନାହିଁ। ଭାରତ ହେଉଛି ଆମେରିକାର ଏକ ପ୍ରମୁଖ ବାଣିଜ୍ୟିକ ଭାଗିଦାରୀ। ଯଦି ପାରସ୍ପରିକ ଶୁଳ୍କ ଲାଗୁ ହୁଏ ତେବେ ଭାରତୀୟ ଔଷଧ, ଆଇଟି ଏବଂ ଅଟୋମୋବାଇଲ୍ କ୍ଷେତ୍ର ପ୍ରଭାବିତ ହୋଇପାରେ। ଆମେରିକାରେ ଉତ୍ପାଦଗୁଡିକ ମହଙ୍ଗା ହେବା କାରଣରୁ ଭାରତୀୟ କମ୍ପାନୀଗୁଡିକ କ୍ଷତି ସହିପାରନ୍ତି।
