ନୂଆଦିଲ୍ଲୀ,୩୧/୦୧: ଦିନକ ପରେ ସଂସଦରେ ଉପସ୍ଥାପିତ ହେବ ୨୦୨୫-୨୬ ଆର୍ଥିକ ବର୍ଷର ବିତ୍ତୀୟ ନକ୍ସା । ଏହା ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଲଗାତର ଅଷ୍ଟମ ବଜେଟ୍ । ଏଥିରେ ୬ଟି ବଡ଼ ଘୋଷଣା ନେଇ ଆଶା ରହିଛି । ତିନୋଟି ଆଧାରରେ ଏହି ପ୍ରସ୍ତାବଗୁଡ଼ିକ ଆସିପାରେ । ତାହା ହେଉଛି ଲୋକଙ୍କ ଆବଶ୍ୟକତା, ବିଜେପିର ନିର୍ବାଚନୀ ପ୍ରତିଶ୍ରୁତି ଏବଂ ଗଣମାଧ୍ୟମ ରିପୋର୍ଟ ।
ସୂତ୍ର ଅନୁସାରେ, ବଜେଟ୍ରେ ଇନ୍ଧନ ଦର କମିପାରେ । ସାଧାରଣ ଖାଉଟିଙ୍କୁ ଆଶ୍ୱସ୍ତି ଦେବାକୁ ପେଟ୍ରୋଲ ଏବଂ ଡିଜେଲ ଉପରେ ଉତ୍ପାଦ ଶୁଳ୍କ ହ୍ରାସ କରିପାରନ୍ତି ଅର୍ଥମନ୍ତ୍ରୀ । ଯାହାଦ୍ୱାରା ଉଭୟ ଇନ୍ଧନ ଶସ୍ତା ହୋଇପାରେ । ଏବେ ପେଟ୍ରୋଲ ଉପରେ ୧୯.୯୦ ଟଙ୍କା ଏବଂ ଡିଜେଲ ଉପରେ ୧୫.୮୦ ଟଙ୍କାର ଉତ୍ପାଦ ଶୁଳ୍କ ଲାଗୁଛି ।
ସେହିଭଳି କଞ୍ଜ୍ୟୁମର ଇଲେକ୍ଟ୍ରୋନିକ୍ସ ସହ ଜଡ଼ିତ ପାର୍ଟସର ଆମଦାନି ଶୁଳ୍କ କମିପାରେ । ଏବେ ଏହା ଉପରେ ୨୦% ଶୁଳ୍କ ଲାଗୁଛି । ଏହା କମିଲେ ମୋବାଇଲ ଭଳି ଡିଭାଇସ୍ଗୁଡ଼ିକ ଶସ୍ତା ହୋଇପାରେ ।
ସୁନା ଏବଂ ରୁପା ଉପରେ ଆମଦାନି ଶୁଳ୍କ ବଢ଼ିପାରେ । ଏବେ ଏହା ଉପରେ ୬% ଶୁଳ୍କ ଲାଗୁଛି । ଯଦି ଶୁଳ୍କ ବଢ଼େ ତାହେଲେ ସୁନା ରୁପା ଦାମ୍ ଆହୁରି ବଢ଼ିବ । ଗତ ବଜେଟ୍ରେ ସରକାର ସୁନା ଉପରେ ଆମଦାନି ଶୁଳ୍କକୁ ୧୫%ରୁ କମାଇ ୬% କରିଥିଲେ । ଏହାର ତୁରନ୍ତ ବାଦ୍ ୨୦୨୪ ଅଗଷ୍ଟରେ ସୁନାର ବାର୍ଷିକ ଆମଦାନି ୧୦୪% ବଢ଼ି ୮୭ ହଜାର କୋଟି ହୋଇଯାଇଥିଲା । ଏବେ ସରକାର ଆମଦାନି କମାଇବାକୁ ଚାହୁଁଛନ୍ତି, ଯାହାଦ୍ୱାରା ବାଣିଜ୍ୟିକ ନିଅଣ୍ଟ କମିବ ।
ଶୁକ୍ରବାରଠୁ ସଂସଦର ବଜେଟ୍ ଅଧିବେଶନ: କାଲି ଆସିବ ସାଧାରଣ ବଜେଟ୍, ଆସିପାରେ ୧୬ ବିଲ୍
ସେହିଭଳି ନୂଆ ଟିକସ ଢାଞ୍ଚା ଅଧୀନରେ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ବାର୍ଷିକ ଆୟ ଟିକସମୁକ୍ତ ହୋଇପାରେ । ୧୫ରୁ ୨୦ ଲକ୍ଷ ଟଙ୍କା ମଧ୍ୟରେ ଆୟ ପାଇଁ ୨୫%ର ନୂଆ ଟିକସ ସ୍ଲାବ୍ ଅଣାଯାଇପାରେ । ଏବେ ଏଥିରେ ୬ଟି ଟିକସ ଥାକ ରହିଛି । ୧୫ ଲକ୍ଷ ଟଙ୍କାରୁ ଅଧିକ ଆୟରେ ୩୦% ଟିକସ ଲାଗୁଛି । ନୂଆ ଟିକସ ଢାଞ୍ଚା ଅଧୀନରେ ମୂଳ ଟିକସ ଛାଡ଼ ସୀମାକୁ ୩ ଲକ୍ଷ ଟଙ୍କାରୁ ବଢ଼ାଇ ୫ ଲକ୍ଷ ଟଙ୍କା କରାଯାଇପାରେ ।
ପିଏମ୍ କିଷାନ ସହାୟତା ରାଶି ୧୨,୦୦୦ ଟଙ୍କାକୁ ବଢ଼ିପାରେ: ପିଏମ୍ କିଷାନ ସମ୍ମାନ ନିଧି ଯୋଜନା ଅଧୀନରେ କୃଷକଙ୍କୁ ମିଳିପାରେ ଖୁସି ଖବର । ଏହି ସ୍କିମ୍ ଅଧୀନରେ ବାର୍ଷିକ ସହାୟତା ରାଶିକୁ ୬ ହଜାର ଟଙ୍କାରୁ ବଢ଼ାଇ ୧୨ ହଜାର ଟଙ୍କା କରାଯାଇପାରେ । ଆୟୁଷ୍ମାନ ଭାରତ ଯୋଜନାର ପରିସର ବଢ଼ିପାରେ । ଏବେ ଆର୍ଥିକ ଦୁର୍ବଳ ଏବଂ ୭୦ ବର୍ଷରୁ ଅଧିକ ବୟସ୍କ ବୟୋବୃଦ୍ଧଙ୍କୁ ଏ ଯୋଜନାର ଫାଇଦା ମିଳୁଛି । ଅଟଳ ପେନ୍ସନ ଯୋଜନାରେ ପେନ୍ସନ ରାଶିକୁ ଦୁଇ ଗୁଣା ବା ୧୦୦୦୦ ଟଙ୍କା କରାଯାଇପାରେ ।
ଗ୍ରାମାଞ୍ଚଳରେ ଗ୍ରାଜୁଏଟଙ୍କ ପାଇଁ ଆସିପାରେ ଇଣ୍ଟର୍ଣ୍ଣସିପ୍ ପ୍ରୋଗ୍ରାମ: ଏକୀକୃତ ରାଷ୍ଟ୍ରୀୟ ରୋଜଗାର ନୀତି ଆସିପାରେ । ଏଥିରେ ରୋଜଗାର ଦେଉଥିବା ଭିନ୍ନ ଭିନ୍ନ ମନ୍ତ୍ରାଳୟଗୁଡ଼ିକର ଯୋଜନାକୁ ଗୋଟିଏ ପ୍ଲାଟ୍ଫର୍ମକୁ ଅଣାଯାଇପାରେ । ଗ୍ରାମୀଣ ଅଞ୍ଚଳରେ ସରକାରୀ ଅଫିସ୍ଗୁଡ଼ିକରେ କାର୍ଯ୍ୟ କରିବା ପାଇଁ ଇଣ୍ଟର୍ଣ୍ଣସିପ୍ ପ୍ରୋଗ୍ରାମ ଘୋଷଣା ହୋଇପାରେ । କେବଳ ଗ୍ରାଜୁଏଟ୍ମାନଙ୍କ ପାଇଁ ଏହା କାର୍ଯ୍ୟ କରିବ। ବିଦେଶରେ ଚାକିରି ଯୋଗାଇ ଦେବାରେ ସହଯୋଗ ଲାଗି ‘ଇଣ୍ଟର୍ନ୍ୟାସ୍ନାଲ ମୋବିଲିଟି ଅଥରିଟି’ ଗଠନ କରାଯାଇପାରେ ।
ମେଡିକାଲ କଲେଜ୍ଗୁଡ଼ିକରେ ୭୫,୦୦୦ ସିଟ୍ ଯୋଡ଼ିବାକୁ ରୋଡ୍ମ୍ୟାପ୍: ସ୍ୱାସ୍ଥ୍ୟ କ୍ଷେତ୍ର ପାଇଁ ବଜେଟ୍ ବରାଦ ୧୦% ପର୍ଯ୍ୟନ୍ତ ବଢ଼ିପାରେ । ପୂର୍ବ ବଜେଟ୍ରେ ସ୍ୱାସ୍ଥ୍ୟ ପାଇଁ ୯୦,୯୫୮ କୋଟି ଟଙ୍କା ଦିଆଯାଇଥିଲା । ଏମ୍ଆର୍ଆଇ ଭଳି ଚିକିତ୍ସା ଉପକରଣ ଉପରେ ଆମଦାନି ଶୁଳ୍କ କମ୍ ହୋଇପାରେ । ଏବେ ଏହା ଉପରେ ମୂଳ ସୀମା ଶୁଳ୍କ ୭.୫ରୁ ୧୦% ମଧ୍ୟରେ ଅଛି । ଆଗାମୀ ୫ ବର୍ଷରେ ମେଡିକାଲ କଲେଜ୍ଗୁଡ଼ିକରେ ୭୫ ହଜାର ସିଟ୍ ଯୋଡ଼ିବାକୁ ସରକାର ଲକ୍ଷ୍ୟ ରଖିଛନ୍ତି । ଏହାର ରୋଡ୍ମ୍ୟାପ୍ ଏହି ବଜେଟ୍ରେ ଉପସ୍ଥାପନ ହୋଇପାରେ ।
ଶସ୍ତା ଘର କିଣିବାର ପ୍ରାଇସ୍ ଲିମିଟ୍ ବଢ଼ିପାରେ: ମେଟ୍ରୋ ସହରଗୁଡ଼ିକ ପାଇଁ ଶସ୍ତା ବାସଗୃହ ପ୍ରାଇସ୍ ଲିମିଟ୍ ୪୫ ଲକ୍ଷ ଟଙ୍କାରୁ ବଢ଼ାଯାଇ ୭୦ ଲକ୍ଷ ଟଙ୍କା କରାଯାଇପାରେ । ଅର୍ଥାତ୍ ଯଦି ଜଣେ ୭୦ ଲକ୍ଷ ଟଙ୍କା ପର୍ଯ୍ୟନ୍ତ ଘର କିଣୁଛନ୍ତି ତାଙ୍କୁ ସରକାରୀ ଯୋଜନା ଅଧୀନରେ ରିହାତି ମିଳିବ । ଅନ୍ୟ ସହରଗୁଡ଼ିକ ପାଇଁ ଏହି ସୀମା ୫୦ ଲକ୍ଷ ଟଙ୍କା କରାଯାଇପାରେ । ଗୃହ ଋଣ ସୁଧ ହାର ଉପରେ ମିଳୁଥିବା ଟିକସ ରିହାତିକୁ ବଢ଼ାଇ ୫ ଲକ୍ଷ ଟଙ୍କା କରାଯାଇପାରେ । ଏହା ଏବେ ୨ ଲକ୍ଷ ଟଙ୍କା ରହିଛି ।
୧ ଫେବ୍ରୁଆରୀରୁ ଆଉ କରି ପାରିବେ ନାହିଁ ଅନଲାଇନ୍ ପେମେଣ୍ଟ , ଏହି ପରିବର୍ତ୍ତନ ନିହାତି ଜରୁରୀ
