ବିଶ୍ୱରେ ଏକାଧିକ ବଡ଼ ବଡ଼ ଷ୍ଟାର ହୋଟେଲ ରହିଛି । ଯେଉଁଠାକୁ ଅଧିକାଂଶ ଧନୀ ବା କୋଟିପତି ଲୋକ ଯାଆନ୍ତି । ଏହି ଷ୍ଟାର ହୋଟେଲ ଭିତରୁ ଗୋଟିଏ ହୋଟେଲ ହେଉଛି ଦୁବାଇର ଜୁମେରାହ ବୁର୍ଜ ଏଆଇ ଆରବ୍ । ଏହି ହୋଟେଲର ବିଶେଷତା ହେଉଛି ଏହା ବିଶ୍ୱର ଏକମାତ୍ର ୧୦ ଷ୍ଟାର ହୋଟେଲ, ଯାହା ନିଜର ବିଳାସପୂର୍ଣ୍ଣ ବ୍ୟବସ୍ଥା ପାଇଁ ଖୁବ୍ ପରିଚିତ । ଅଫିସିଆଲି ଏହାକୁ ସେଭେନ୍ ଷ୍ଟାରର ସ୍ଥାନ ମିଳିଛି । କିନ୍ତୁ, ଏଠାକୁ ଆସୁଥିବା ଗ୍ରାହକମାନେ ଏହି ହୋଟେଲକୁ ୧୦ ଷ୍ଟାର ରେଟିଂ ଦେଇଥାନ୍ତି । ଏହି ଅଲ୍ଟ୍ରା ଲକଜରିୟସ୍ ହୋଟେଲକୁ ଏକ ଆର୍ଟିଫିସିଆଲ ଆଇଲାଣ୍ଡରେ ସ୍ଥାପନା କରାଯାଇଛି । ଗ୍ରାହକଙ୍କୁ ଏହାର ଡିଜାଇନ୍ ସବୁଠାରୁ ବେଶି ଆକର୍ଷିକ କରିଥାଏ । ଏହି ହୋଟେଲକୁ ଟମ୍ ୱାଇଟ୍ ୧୯୯୯ରେ ତିଆରି କରିଥିଲେ । ସେ ଏହାର ମୁଖ୍ୟ ଆର୍କିଟେକ୍ଚର ଥିଲେ । ଏହାକୁ ନିର୍ମାଣ କରିବାକୁ ୧ ଆରବ ଡଲାର ଅର୍ଥାତ୍ ଭାରତୀୟ ମୁଦ୍ରାରେ ୮ ହଜାର ୩୩୦ କୋଟି ଟଙ୍କା ଖର୍ଚ୍ଚ ହୋଇଥିଲା । ଏହାର ଉଚ୍ଚତା ୩୨୧ ମିଟର, ଯାହା ଦୁନିଆର ସବୁଠାରୁ ଉଚ୍ଚ ହୋଟେଲ ଭିତରୁ ଗୋଟିଏ ।
ତେବେ ଏହି ହୋଟେଲର ଉପର ଆଡ଼କୁ ୩୯ ପ୍ରତିଶତ ଅଂଶ ଲୋକଙ୍କ ରହଣୀ ପାଇଁ ଉପଯୋଗୀ ନୁହେଁ । ଏହି ହୋଟେଲ ଉପରେ ଏକ ହେଲିପ୍ୟାଡ୍ ମଧ୍ୟ ରହିଛି, ଯାହା ସ୍ଥଳଭାଗରୁ ୨୧୦ ମିଟର ଉପରେ ଅବସ୍ଥିତ । ଏହି ହୋଟେଲରେ ରହିବା ପାଇଁ ସାରା ବିଶ୍ୱରୁ ଅନେକ ଭିଆଇପି ଓ ବଡ଼ ବଡ଼ ବିଜନେସ୍ ମ୍ୟାନ୍ ଆସିଥାନ୍ତି । ହୋଟେଲ ଭିତରକୁ ୨୪ କ୍ୟାରେଟ୍ ଗୋଲ୍ଡ ଲିଫ୍ରେ ସଜାଯାଇଛି । ଏଥିରେ ୨୦୨ ଡୁପଲେକ୍ସ ସୁଇଟ୍ସ ରହିଛି, ଯାହା ଦେଖିବାକୁ ଖୁବ୍ ସୁନ୍ଦର । ଅଲ ଆରବ ଜୁମେରାହର ଗୋଟିଏ କୋଠରୀରେ ଗୋଟିଏ ରାତି ରହିବା ପାଇଁ ଗ୍ରାହକଙ୍କୁ ୨ ଲକ୍ଷରୁ ଆରମ୍ଭ କରି ୧୦ ଲକ୍ଷ ଟଙ୍କା ଦେବାକୁ ପଡ଼ିଥାଏ । ଏଠାକୁ ଆସୁଥିବା ଗ୍ରାହକମାନେ ହେଲିକପ୍ଟର ସେବା କିମ୍ୱା ରୋଲ୍ସ ରଏସ୍ରେ ହୋଟେଲରେ ପହଞ୍ଚିପାରିବେ ।
ହୋଟେଲଟି ଅନେକ ବିଳାସପୂର୍ଣ୍ଣ ବ୍ୟବସ୍ଥା ପ୍ରଦାନ କରିଥାଏ । ଏହି ହୋଟେଲରେ ଫ୍ରି ୱାଇ-ଫାଇ, ପ୍ରାଇଭେଟ୍ ବିଚ୍, ଏକାଧିକ ସୁଇମିଂ ପୁଲ୍, ସ୍ପା, ଜିମ୍ ଓ ମସାଜ୍ର ବ୍ୟବସ୍ଥା ରହିଛି । ସ୍ପା ସୁବିଧାରେ ଶୋଇବା କକ୍ଷ, ଷ୍ଟିମ୍ ରୁମ୍ ଆଦି ରହିଛି । ଏଠାକାର ଖାଇବା ବ୍ୟବସ୍ଥା ମଧ୍ୟ ଉଚ୍ଚକୋଟିର, ଏହି ହୋଟେଲରେ ବିଶ୍ୱସ୍ତରୀୟ ୮ଟି ରେସ୍ତୋରାଁ ରହିଛି । ଏଠାରେ ଗ୍ରାହକଙ୍କ ସୁବିଧା ପାଇଁ ସମସ୍ତ ପ୍ରକାର ବ୍ୟବସ୍ଥା ରହିଛି । ଗ୍ରାହକଙ୍କୁ ୨୪ ଘଣ୍ଟାର ଷ୍ଟାଫ୍ ସର୍ଭିସ ମଧ୍ୟ ପ୍ରଦାନ କରାଯାଏ ।
