ନୂଆଦିଲ୍ଲୀ: ଗତ ତିନି ବର୍ଷ ଧରି ଚାଲିଥିବା ରୁଷ ଏବଂ ୟୁକ୍ରେନ ମଧ୍ୟରେ ସଂଘର୍ଷ ଥମିବାର ନାଁ ନେଉନାହିଁ । ଆଉ ଏବେ ରୁଷ ପୁଣିଥରେ ରାତିରେ ୟୁକ୍ରେନ ଉପରେ ଆକ୍ରମଣ କରିଛି । ଉତ୍ତର-ପୂର୍ବ ୟୁକ୍ରେନରେ ଏକ ରୁଷିଆ ଡ୍ରୋନ୍ ଏକ ଆପାର୍ଟମେଣ୍ଟ କୋଠାରେ ଆକ୍ରମଣ କରିଥିଲା, ଯେଉଁଥିରେ ଅତି କମରେ ୪ ଜଣଙ୍କର ମୃତ୍ୟୁ ହୋଇଥିବା ଅଧିକାରୀ ମାନେ କହିଛନ୍ତି। ଏହି ଦୁର୍ଘଟଣାରେ ୯ ଜଣ ଆହତ ମଧ୍ୟ ହୋଇଛନ୍ତି। ସୁମି ଆଞ୍ଚଳିକ ପ୍ରଶାସନ କହିଛି ଯେ, ରାତି ୧ଟା ପରେ ଶାହେଦ୍ ଡ୍ରୋନ୍ ସୁମିର ପ୍ରମୁଖ ସହର ଏକ ଆପାର୍ଟମେଣ୍ଟ ବ୍ଲକର କାନ୍ଥ ଏବଂ ଝରକା ଉଡ଼ାଇ ଦେଇଛି। କୋଠାର ଭଗ୍ନାବଶେଷ ମଧ୍ୟରୁ ଚାରି ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା । ଆହତ ମାନଙ୍କ ମଧ୍ୟରେ ଜଣେ ଶିଶୁ ମଧ୍ୟ ରହିଛି । ଏହା ବ୍ୟତୀତ ୧୨୦ ଜଣଙ୍କୁ ଭଗ୍ନାବଶେଷ ମଧ୍ୟରୁ ବାହାର କରାଯାଇଥିଲା।
ୟୁକ୍ରେନର ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏହି ଆକ୍ରମଣକୁ ଏକ ଭୟଙ୍କର ଷଡଯନ୍ତ୍ର ବୋଲି କହିଛନ୍ତି । ରୁଷ-ୟୁକ୍ରେନ ବିବାଦ ଚତୁର୍ଥ ବର୍ଷରେ ପ୍ରବେଶ କରିବାକୁ ଯାଉଛି, କିନ୍ତୁ ଏପର୍ଯ୍ୟନ୍ତ ଏହା ଶେଷ ହେବାର କୌଣସି ସଙ୍କେତ ଦେଉନାହିଁ। ଏହି ସଂଘର୍ଷରେ ଏପର୍ଯ୍ୟନ୍ତ ୧୦ ହଜାରରୁ ଅଧିକ ୟୁକ୍ରେନୀୟ ନାଗରିକଙ୍କ ମୃତ୍ୟୁ ହୋଇସାରିଛି । ରୁଷ ୟୁକ୍ରେନରେ ପାୱାର ଗ୍ରୀଡ ଉପରେ ମଧ୍ୟ ଆକ୍ରମଣ କରୁଛି, ଯାହା ଫଳରେ ୟୁକ୍ରେନୀୟ ନାଗରିକ ମାନେ ବିଦ୍ୟୁତ ଏବଂ ପାଣି ସମସ୍ୟାର ସମ୍ମୁଖୀନ ହେଉଛନ୍ତି।
ରୁଷ ରାତାରାତି ୟୁକ୍ରେନ ଉପରେ ୮୦ରୁ ଅଧିକ ଡ୍ରୋନ ମାଡ଼ କରିଛି। ୟୁକ୍ରେନର ଦକ୍ଷିଣ ଓଡେସା ଅଞ୍ଚଳରେ ରୁଷୀୟ ଡ୍ରୋନଗୁଡ଼ିକ ଏକ ହସ୍ପିଟାଲ ଏବଂ ଦୁଇଟି ଆପାର୍ଟମେଣ୍ଟ କୋଠାକୁ କ୍ଷତି ପହଞ୍ଚାଇଛି । ଏହି ଆକ୍ରମଣର କିଛି ଦିନ ପୂର୍ବରୁ, ରୁଷ ପୂର୍ବ ୟୁକ୍ରେନରେ ଥିବା ସହର ଉପରେ ରଣନୈତିକ ଦଖଲ ଦାବି କରିଥିଲା।
